Hatutan.com, (30 Juñu 2025), Díli—IX Governu Konstitusionál prevee  tetu indikativu global dezpeza nian ba  Orsamentu Jerál Estadu (OJE) tinan 2026 ho montante billaun $1,85.

Lee Mós: Xanana Promete OJE 2025 Benefisia Povu

Reuniaun Konsellu Ministru.Foto/Dok

Komunikadu imprensa ne’ebé Hatutan.com asesu husi portal ofisial Governu Timor-Leste (timor-leste.gov.tl), Segunda (30/06/2025), relata tetu indikativu globál despeza nian ba OJE 2026 estabelese iha biliaun $1,85, ho nia distribuisaun tetu orsamentál agregadu ba Administrasaun Sentrál iha OJE     2026 bazeia ba setór estratéjiku sira ne’ebé define hosi Programa Governu no Planu Estratéjiku Dezenvolvimentu, ho 36% aloka ba Setór Kuadru Institusionál, 28% ba Setór Kapitál Sosiál, 28% ba Dezenvolvimentu Infraestrutura, no 7% Dezenvolvimentu Ekonómiku no 1% ba Boa Governasaun no Kombate Korrupsaun.

Liuhosi reuniaun Konsellu Ministru iha Palásiu Governu, Dili, ohin,  hafoin halo análize ba aprezentasaun husi Ministra Finansas, Santina José Rodrigues F. Viegas Cardoso, delibera atu aprova Deklarasaun Estratéjika Orsamentál no tetu indikativu despeza nian ba Orsamentu Jerál Estadu tinan 2026 (OJE 2026).

Instrumentu hirak-ne’e, prevee ona iha Lei Enkuadramentu Orsamentu Jerál Estadu no jestaun finanseira públika (Lei n. 3/2025, loron 23 fulan-abríl) nian, orienta polítika fiskál ba médiu prazu, asegura koerénsia entre objetivus dezenvolvimentu nasionál no rekursu sira ne’ebé disponivel, no estabelese limite despeza ba setór oioin iha Administrasaun Públika.

Ministra Finansas, Santina José Rodrigues F. Viegas Cardoso, aprezenta previzaun ida ba kreximentu ekonómiku 2,7% husi Produtu Internu Brutu (PIB) ba tinan 2026, iha kontestu ida konsolidasaun orsamentál nian, hafoin kreximentu ida ne’ebé prevee ona ho valór 4,3% iha tinan 2025. Taxa inflasaun kontinua iha trajetória ida ne’ebé tun, prevee katak atu atinje 1,8% iha tinan 2025, no estabiliza besik 2% iha tinan lima oin mai.

Kalendáriu prosesu orsamentál estabelese distribuisaun tetu dezagregadu ba entidade sira iha loron 4 fulan-jullu, submisaun proposta ministeriál sira to’o loron 24 fulan-jullu, hala’o reuniaun Komité Revizaun Orsamentál entre loron 4 no 20 fulan-agostu, no submisaun proposta OJE 2026 ba Parlamentu Nasionál to’o loron 1 fulan-outubru tinan 2025. 

Jornalista: Zita Menezes