Hatutan.com, (12 Jullu 2025), Díli– Empreza Ti-Oan Fintech husi grupu Esperança Timor Oan (ETO) apoiu osan insentivu ka bonus  ho montante $100,000.00 bá Selesaun Nasionál Futeból Feminina.

Lee Mós: Nilton Gusmão Eleitu ba Prezidente FFTL Bá Restante Mandatu 2022-2026

Empreza Ti-Oan Fintech husi grupu Esperança Timor Oan (ETO) apoiu osan insentivu ka bonus $100,000.00 bá Selesaun Nasionál Futeból Feminina. Foto/Marcelino Tomae

Reprezentante empreza Ti-Oan Fintech  Edmundo Freitas Lopes, hateten, osan insentivu ka bonus  ne’e  bá daruak ona mak empreza Ti-Oan  oferese ba jogadór selesaun nasionál Timor-Leste nian, iha ne’ebé dahuluk oferese ba jogadór selesaun nasionál mane ho montante $100,000.00 no ba dala ida-ne’e (daruak nian)  oferse ba jogadór selesaun nasionál feminina ho montante hanesan ($100,000.00)

“Kompromisu  ne’ebé ami iha katak  nafatin suporta ekipa selesaun nasionál ne’ebé reprezenta Timor-Leste ba tuir kompetisaun rejionál no internasionál maske  la sai kampionatu maibé minimal  ita tenke halo buat ruma bá ita nia jogadór sira,” Edmundo Freitas Lopes hateten iha ámbitu serimónia entrega insentivu  ba jogadór selesaun nasionál feminina ne’ebé hala’o iha Xanana Sport Centre, Sábadu (12/07/2025).

Reprezentante Ti-Oan Fintech ne’e  husik hela mensajen  ida katak,   selesaun ne’e bele halo prestasaun  melor liu iha jogu sira  tuir mai, liga ho eventu sira husi rejionál no internasionál

Nia subliña, infraestruturamente dirijente sira FFTL nian hahú prepara daudaun  hanesan harii estádiu ho padraun internasionál no estádiu indoor padraun internasionál iha Tasi-tolu, nune’e  preparasaun   bá futeból  tenke di’ak liután iha futuru.

Iha fatin hanesan Diretór  Selesaun Nasionál  Federasaun Futeból Timor-Leste (FFTL),  João Maneco, hato’o nia agradesimentu   bá  empreza grupu ETO, liu-husi ninia  subsidiária  Empreza Ti-Oan Fintech  nia oferta tan bonus $100,000.00  bá selesaun feminina nu’udár  agradesimentu ne’ebé  boot tebes hodi  apresia saída maka  jogadór nasionál feminina halo ona iha jogu sira liubá.

Nia  hateten ho apoiu sira hanesan Ti-Oan Fintech ne’e bele motiva  liután   atleta jogadór feminina sira ne’ebé  hola parte iha selesaun futeból atu esforsa aan hodi hatudu buat ne’ebé  di’ak liután iha futuru.

Reprezentante jogadór selesaun nasionál feminina,  Dolores Verdiana da Silva hateten,  hanesan ekipa selesaun futeból feminina  orgullu ho bonus  empreza Ti-Oan Fintech tanba  apoiu ne’e foin  primeira-vez bá sira simu iha sira-nia karreira nu’udár jogadór.

Dolores Verdiana da Silva esperesa katak ho intensivu husi empreza nasionál Ti-Oan  Fintech bele motiva atu jogadór sira halo esforsu liután no hadi’a performa iha jogu sira nivel rejionál no internasionál iha futuru.

Bonus ne’ebé selesaun feto hetan husi Ti-Oan Fintech,   Dolores ho nia kolega sira seluk sei utiliza  hodi sustenta sira nesesidade no   uza hodi sosa  ekipamentu.

Ekipa selesaun nasionál feminina ne’ebé sai hanesan benefisiáriu ba bonus ka insentivu husi Ti-Oan Fintech ne’e hamutuk na’in-33, kompostu husi jogadór na’in-23  ho ofisiál  na’in-10.

Jornalista: Marcelino Tomae