Hatutan.com, (21 Jullu 2025), Díli—Desizaun husi  Prezidente Konsellu Administrativu Rádiu Televizaun Timor-Leste, Empreza Públika (RTTL,E.P), Elizeu Isaac Fernandes, hodi indika empreza Mãe da Graça Unipessoal, Lda, mak fornese kombustivel ba RTTL,E.P deskonfia forte iha relasaun família no mós relasaun grupu arte-marsiál (GAM) ho oan mane ida iha empreza refere.

Lee Mós: Kazu Fornesimentu Kombustivel ho Manutensaun Karreta RTTL,E.P, JSMP Konsidera Viola RJA Artigu 64 no Husu CAC Labele Tuur Nonook

Jornalista Hatutan.com halo entrevista doorstop ho prezidente konsellu administrasuan RTTL,E.P, Elizeu Isaac Fernandes iha estádiu Munisipál Díli, Segunda (21/07/2025). Foto/Juvinal Cabral dos Santos

Informasaun ne’ebé Hatutan.com halibur hosi parte oioin sira katak prezidente RTTL,E.P, Elizeu Isaac Fernandes sei iha relasaun família ho na’in ba empreza Mãe da Graça nia oan-mane ida tanba Elizeu Isaac Fernandes nia prima-rasik ida mak kaben ho empreza Mãe da Graça nia oan-mane ne’e.

Informasaun ne’ebé iha mós katak oan-mane husi empreza Mãe da Graça nian ne’ebé kaben ho Elizeu Isaac Fernandes nia prima ne’e hola parte mós hanesan maun-alin (saudara) ba Elizeu Isaac Fernandes iha organizasaun arte-marsiál ida.

Iha ne’ebé  Elizeu  Isaac Fernandes  ho nia prima nia kaben ne’e  maun-alin  iha organizasaun GAM ne’e no bolu malu letting tanba sira na’in-rua hetan graduasaun  iha tinan hanesan iha 2022.

Iha Sábadu, 19 fulan-Jullu 2025, Hatutan.com halo konfirmasaun direta informasaun relasaun família ne’e Jerente kompañia Mãe da  Graça Unipesoal, Lda,   Giovanio M.F Gomes, rekuza informasaun ne’e.

Nia hateten,  sira (empreza Mãe da Graça-red) laiha relasaun família ho prezidente Konsellu Administrasaun RTTL,E.P, Elizeu Isaac Fernandes, maibé prosesu Mãe da Graça fornese  kombustivel ba RTTL,E.P liuhosi konkursu públiku.

Iha Segunda, 21 fulan-Jullu ne’e, Hatutan.com halo esforsu konfirma ho Prezidente RTTL,E.P, Elizeu Isaac Fernandes.  Nune’e,  iha parte dadeer, hale’u tuku 10.00 Otl,  jornalista Hatutan.com hakat to’o edifísiu RTTL,E.P atu halo audiénsia no entrevista ho prezidente Konsellu Administrasaun RTTL,E.P, Elizeu Isaac Fernandes, maibé  parte pesoál servisu resepsionista informa prezidente laiha fatin no sai hela ba enkontru (la informa klaru enkontru iha ne’ebé). Nune’e, Hatutan.com tenta telefone liuhosi WhatsApp ba númeru kontaktu privadu prezidente nian, inklui haruka mensajen WhatsApp atu bele halo entrevista, maibé prezidente Konsellu Administrasaun RTTL,E.P la simu telefónika no lee tiha de’it mensajen sira-ne’e mós la responde.

Iha parte loro-kraik, hahú husi tuku 02:34 to’o tuku 3:17 Otl, Hatutan.com kontinua manda mensajen  WhatsApp no telefone ba prezidente Konsellu Administrasaun RTTL,E.P,  maibé kontinua la atende telefone no la responde mensajen.

Iha fali tuku 3:24 to’o tuku  4:36  loro-kraik, Hatutan.com kontinua ba fali edifísiu RTTL,E.P, no hasoru pesoal resepsionista hodi marka audiénsia entrevista  prezidente, maibé pesoál resepsionista  informa de’it katak prezidente laiha fatin no sai tiha ba munisípiu ona.    

Hale’u tuku 5:17 loro-kraik, Hatutan.com hetan prezidente Konsellu Administrasaun RTTL,E.P, Elizieu Isaac Fernandes iha tribune Estádiu Munisipál Díli  hodi aprezenta aan husu tempu halo entrevista doorstop (Doorstop interview).

Prezidente rasik disponivel hela, maibé pesoál funsionária ida ne’ebé la hatane nia identidade, tuur husi prezidente RTTL,E.P  nia kotuk  impede hodi lia-tuun dehan la bele- la bele ba kantor de’it no haruka taka tiha gravasaun ne’ebé atu hahú daudaun entrevista.

Iha momentu ne’e prezidente Konsellu Administrasaun RTTL,E.P, Elizeu Isaac Fernandes mós hateten lakohi fó komentáriu tanba nia sei foku bá atividade CPLP.

Kona-bá  empreza Mãe da Graça nia oan mane ne’e sei iha mós relasaun ho grupu arte-marsiál ne’ebé uluk prezidente Konsellu Administrasaun RTTL,E.P hola parte ba no graduasaun hamutuk iha tinan 2022 (letting 022), Elizeu Isaac Fernandes dezmente kedas hodi  dehan ema bulak bá fó informasaun bá  Hatutan.com

“Ema bulak maka ko’alia ne’e imi bá husu ema ne’e, ha’u la hatene ida,  ha’u foku hela bá  CPLP ne’e, labele obriga ha’u favor ida, ha’u foku bá CPLP, agora ne’e jogu CPLP hela,” Elizeu Isaac Fernandes hateten.

Hatutan.com  tenta atu konfirma tan asuntu balun, maibé prezidente  Konsellu Administrasaun  RTTL, E.P  ne’e ho lian  makas hodi hapara tiha pergunta  ida kona-bá desizaun foti fó Mãe da Graça ne’e, tanba oan mane  ida husi na’in bá Empreza Mãe da Graça nian ne’ebé kaben ho nia prima ne’e.

Empreza Mãe da Graça Garante La Sai Vensedór

Jerente kompañia Mãe da Graça Unipessoal, Lda Giovanio M.F Gomes. Foto/Juvinal Cabral dos Santos

Jerente kompañia Mãe da  Graça Unipessoal, Lda,  Giovanio M.F Gomes, hateten  prosesu kona-bá  sira tuir tender ka konkursu públiku iha  RTTL,E.P fó  bazeia ba avizu ne’ebé RTTL,E.P publika. Nune’e, Mãe da Graça submete dokumentu hamutuk ho kompañia sira seluk tan.

 “Ami submete tiha ami nia dokumentu  husi kompañia nian  dokumentu legál sira ne’e, ami mós la garante katak ami mak manan, tanba ami hein kuaze semana ida  depois  RTTL,EP fó sai avizu katak  ami nia kompañia maka manan,”  Jerente kompañia Mãe da  Graça Unipessoal, Lda  Giovanio M.F Gomes hateten  bá Hatutan.com iha nia knár fatin Sentru Kombustivel Mãe da Graça iha Pantai Kelapa, Díli, Sábadu (19/07/2025).

Nia dehan,  depois RTTL.EP fó sai rezultadu katak  kompañia Mãe da Graça  mak manán sente  agradese, maibé maske manán ka lakon mós nafatin agradese,  tanba  submete dokumentu tuir tkonkursu publiku ba fornesimentu kombustivel  ne’e,  sempre iha manán no iha mós lakon,  maibé husi RTTL,EP fó sai avizu   katak Mãe da Grasa maka manán.

“Ami maka  sai  manan na’in, RTTL,E.P bolu ami bá asina kontratu, hotu ami  mós fornese mina ne’ebé  maka durante ne’e  ami prosesu bá Governu oferese bá sira, entaun  prosesu ne’ebé durante ami la’o normál,”  nia tenik.

Kompañia Mãe da Graça aprezenta kotasaun  kada litru  iha Díli no Munisípiu sira, mak hanesan iha Dili  gazóleu   litru ida   $1.20 sentavu  no gazolina  kada litru $1.18 sentavu.

Enkuantu   bá munisípiu sira kompañia halo parseiru  iha  kotasaun  laran hanesan hotu de’it $1,40 sentavu  kada litru no fornesimentu kombustivel ba tanke jerador iha Sentru Sentral no Beterlau $3,50 sentavu kada litru

Tuir karta  aprezentasaun kotasaun  ne’ebé  Hatutan.com   simu direita husi Jerente Kompañia Mãe da Graça  katak iha loron  03 fulan-Abríl 2025 kompañia Mãe da Graça  hato’o   liu-husi dokumentu  tenderizasaun bá Diretora Nasionál Administrasaun   Finansas,  Noviana de Pina Nahak hodi husu akizisaun  servisu fornesimentu kombustivel bá veíkulu no jeradór Nú.RFQ : 001/B&S/DNAF/RTTL,E.P/2025 ho konkordánsia tuir kláuzula  ne’ebé termu iha kontratu no akompaña mós iha kotasaun ne’e presu ne’ebé Mãe da Graça oferta.

Tuir mai diskrisaun tabela fornesimentu kombustivel bá RTTL,E.P Nú. RFQ  – QTY/LTR presu kada litru folin gazóleu  ba karreta $1.20 sentavu no gazolina bá karreta $1.18 sentavu kada litru  no fornesimentu kombustivel  bá tanke jeradór iha sentru sentrál Caicoli ho Biterlau-Fatu-Ahi totál $3.50 sentavu.

 Kona-bá resivu ka envoice  tuir dokumentu ofisiu númeriu 132/DANF-RTTL,EP/VI /2025,  direrora kompañia  Mãe de Graça, Lourdes Menezes  CC arkivu no asuntu fornesimentu kombustivel gazóleu  bá jerador  hodi husi bá departamentu lojistika  liu-husi diresaun nasinál administrasaun  finansas hato’o bá kompañia Mãe de Graça  atu bele fonrese kombustivel gazóleu   bá depozitu jeradór iha Caicoli Díli bazeia bá  kontratu ne’ebé estabele ona parte entre  rua ho númeiru 006/B&S/RTTL,EP/V/2025.

Kompañia  Mãe da Graça hato’o ona pedidu  envoice dala-haat bá RTTL,EP hodi halo pagamentu bá fornesimentu kombusvel hahú iha loron  5-10 fulan- Juñu 2025,  bá item kombustivel jerádor  RTTL,E.P    litru 833,33,  husi  kada liru $1.20 sentavu, pagamentu ne’e iha loron 30 fulan-Juñu 2025  totál orsamentu $1000,00.

Iha loron  04-07 fulan-Jullu 2025 komapañia  Mãe da Graça  halo  pedidu  bá  Xefe Lojistiku Patrimonia RTT,E.P, Raimundo dos S. Pareira, nú.INV.3/MG/VII/2025, deliberasaun  hodi husu pagamentu fornesimentu kombustivel gazóleu  ba Jeradór RTTL,EP,  ho litru 833,33, totál pagamentu  $1000,00.

Aitula Fuel’s  Hakfodak  ho Hahalok  Elizeu Issac Fernandes

Jerente  Aitula Fuel’s  Unipesoál, Lda,  Fátima da Silva Fereira. Foto/Juvinal Cabral dos Santos

Empreza Aitula Fuel’s, Unipessoal Lda, ne’ebé sai hanensan manan na’in tuir desizaun ekipa juri nian ba fornesimentu kombustivel ba RTTL,E.P  hafodak ho  hahalok prezidente RTTL,E.P Elizeu Issac Fernandes  hodi hatun despaixu husu favor Diresaun Nasionál Administrasaun no Finansas (DNAF) trata asuntu ne’e fó oportunidade ba kompañia Mãe da Graça Unipessoal, Lda.

Jerente  Empreza Aitula Fuel’s  Unipessoál, Lda,  Fátima da Silva Fereira bá Hatutan.com  iha nia knaar fatin,  Segunda (21/07/2025), hateten tuir loloos  submete dokumentu sira ne’e ba RTTL,E.P parte ekipa juri halo selesaun dokumentu no deside ona katak Aitula Fuels mak manan tanba presu razoavel no selesaun dokumentu ho valor boot maka Autila Fuel’s mak  tenke sai manan na’in, la’ós prezidente RTTL uza fali nia kompeténsia la refleta iha Lei Rejime Jurídiku Aprovizionamentu hodi fó fali ba kompañia Mãe da Graça Unipessoal, Lda ne’ebé aprezenta presu boot, la kumpre rekizitu administrativu no hetan valor ki’ik iha selesaun dokumentu.

“Ami simu de’it desizaun ne’e, mézmu ami hakfodak tanba prezidente RTTL hakarak fó oportunidade ba Mãe da Graça,” Fátima da Silva Fereira afirma.

Nia esplika, presu ne’ebá   empreza  Aitula Fuel’s konsta iha dokumentu ne’e bá Munusípiu no mós Díli ba Gazoleu  kada litru $1.21 sentavu,  gazolina kada litru  $1.17 sentavu,  totál husi intem rua ne’e $2.38 sentavu.

“Preseu ne’e la’ós permanente, maibé tun sa’e kada semana rua,  fulan ida dala rua kuandu  iha mudansa,  kuandu laiha mudansa  mantein,” nia esplika.

Presu Kombustivel kada litru ne’ebé Aitula fuel’s konsta iha dokuentu. Foto/repro

Desizaun ekipa juri nian deside katak Aitula Fuel’s mak prienxe rekizitu no  presu razoavel hodi sai manan na’in bá koukrusu fornesimentu kombustivel ne’e, tuir nia, maibé  prezidente RTTL,E.P hatun despaxu fó fali ba kompañia Mãe da Graça ne’ebe la prienxe rekizitu no presu la refutavel, inklu dokumentu balun laiha, empreza Aitula Fuel’s, sente hakfodak bainhira lee informasaun sira husi  Hatutan.com.

“Iha ne’e ami la bele hatene to’o  iha ne’ebá, tanba ne’e sira nia desizaun,  prezidente RTTL,EP  nia  desizaun ne’e boot liu, ami la bele ko’alia oioin tanba  ne’e desizaun ne’e husi nia, maibé dehan katak ekipa juri  dehan ami maka sai vensedór,  ami lee tiha ona informasaun ne’e husi ita-boot sira nia  mídia Hatutan.com,   maka ami foin hatene katak prosesu loloos ne’e hanesan ne’e, ami mós la  hatente katak prezidente  RTTL,EP halo hahalok hanesan ne’e,”  nia hateten.

Fó hanoin fali katak Prezidente Konsellu Administrasaun RTTL,E.P,  Elizeu Isaac Fernandes nia entrevista ho  Hatutan.com  katak nia deside fó bá  empreza Mãe da Grasa tanba hakarak hakotu korrente ne’ebé durante ne’e mosu iha RTTL,E.P, Jerente Aitula Fuel’s ne’e afirma katak Aitula Fule’s laiha relasaun família  husi kualker lideransa sé de’it  iha RTTL,E.P.

“Kona-bá ami iha relasaun ruma iha ne’ebá, deskulpa, ne’e laiha, tanba iha ami-nia dokumentu ne’ebé sira ami submete bá konkursu ne’e ami  submete hotu, ami nein iha relasaun ho  ema ruma iha RTTL,E.P,” Fátima da Silva Fereira subliña.

“Ami simu ho fuan, ami la sai vensedór mós la buat ida,  tanba karik ami  iha tinan kotuk ami  nia esperensia ladún di’ak, maibé duraten fornese bá   laih komplein  ruma husi RTTL,EP,”  nia tenik tan.

Lee Mós: Deskonfia Prezidente RTTL,E.P Halo Abuzu Podér no Hamosu Prejuízu Ba Estadu iha Projetu Fornesimentu Kombustivel no Manutensaun Karreta

Jornalista: Marcelino Tomae/ Juvinal Cabral dos Santos