Hatutan.com, (07 Agostu 2025), Díli—Mega projetu konstrusaun Aeroportu Internasionál Nicolau Lobato (INL) iha hela faze ida ne’ebé kompañia internasionál PT Waskita Karya  (Persero) Tbk, prepara detail engineering design  ka detallu dezeñu enjeñaria nian (DED, sigla inglés).

Lee Mós: Projetu Aeroportu Prezidente Nicolau Lobato Sei iha Revizaun

PT Waskita Karya (Persero) Tbk ho Governu Timor Leste, liuhosi Ministru Transporte no Telekomunikasaun, José Agostinho da Silva, asina kontratu ba projetu expansaun Aeroportu Internasionál Prezidente Nicolau dos Reis Lobato, Segunda (29 Maiu 2023). Foto/Dok

Ministru Transporte no Komunikasaun, Miguel  Marques Gonçalves Mantelu, hateten empreza PT Waskita Karya (Persero) Tbk halo hela teste bá rai, sukat terrenu no seluk tan hodi kompleta  sira nia análize dadus atu  finaliza detail engineering design.

“Ha’u ko’alia kona-bá DED  ne’e ema krítika ha’u, maibé  realidade maka hanesan ne’e, tanba  ha’u hakarak ita-boot sira mós bá entrevista PT Waskita Karya (Persero) Tbk katak tanbasá maka imi manan tiha kontratu ne’e maka foin halo fali dezeñu,” Ministru Miguel Manetelu hateten ba Hatutan.com hafoin aprezenta polítika planu orsamentu jerál 2026 MTK nian ba Komisaun Revizaun Orsamentu  iha Ministériu Finansa, Kinta (07/08/2025).

Ministru Miguel Manetelu hateten kontratu ba projetu konstrusaun Aeroportu INL ne’e halo iha Governu anteriór nian, mas agora ema barak la entende buka fó sala  ba Governu atuál to’o balun politiza tiha kestaun interese nasionál ne’e.

“Sei ha’u ko’alia agora públika atu halo reajen fali, tanba ne’e  ha’u  enkoraja Hatutan.com ho   órgaun komunikasaun sosiál seluk hodi buka  entrevista ho eis Ministru Transporte no Komunikasaun José Agustinho da Silva,  hodi konfirma kona-bá VIII Governu halo  asina kontratu ne’e DED ne’e  iha ona ka  lae,”  Miguel Manetelu hatutan.

Nia afirma,  prosesu konstrusaun  ne’e ema enjeñaria bele esplika,  Wasktia manán ne’e ho modalidade ida, ho dezeñu real, katak  mana to’o tiha bá  halo dezeñu depois halo konstrusaun, maibé agora nia halo dezeñu.

Detallu Projetu expansaun dezenvolvimentu no expansaun Aeroportu Internasionál Prezidente Nicolau Lobato sei garante kondisaun sira ne’ebé presiza atu atende pasajeiru besik millaun ida tuir padraun seguransa aas ne’ebé mak  define iha programa IX Governu Konstitusionál.

Iha loron 03 fulan-Fevereiru 2025, Ministériu Transporte no Komunikasaun (MTC) ho Konsórsiu Negósiu Japonés, ne’ebé kompostu husi Japan Airport Consultants Inc, Ehira Architects and Engineers Inc, Oriental Consultants Global Co, Ltd,  ho Nippon Koie Co, Ltd, firma ona kontratu bá  elaborasaun Dezeñu Tékniku Detalladu (DED) bá terminal pasajeiru iha Aeroportu Internasionál Presidente Nicolau Lobato.

Jornalista:  Marcelino Tomae