Hatutan.com, (10 Agostu 2025), Díli–Jogu liga Timorense Segunda divizaun la kontínua ka paradu iha dalan klaran tanba kestaun osan klube futeból haat iha segunda divizaun nia seidauk simu subsídiu 30% inklui osan $1000 ba dezlokasaun nian.

Lee Mós: Ipolito Soares Eleitu ba Prezidente Ezekutivu LFTL Períodu 2025-2029

Logotipu Liga Timorense. Foto/LFTL

Abertura Jogu Liga Timorense Segunda Divizaun ne’ebé hala’o iha Estádiu Gleno-Ermera iha loron 24 fulan-Juñu 2025, konsege la’o de’it to’o jornada da-haat, tanba deskonfia osan ne’ebé transfere husi  Federasaun Futeból Timor-Leste (FFTL) ba Órgaun Liga Timorense  ka Liga Futeból Timor-Leste (LFTL) ho montante $250,000.00 hotu ona no nia utilizasaun la ho transparente.

La’ós ne’e de’it, informasaun ne’ebé Hatutan.com rekolla husi klube futeból segunda divizaun sira, katak osan subsídiu 30%  husi montante $100,000.00  ne’ebé pertense ba direitu klube segunda divizaun sira nian to’o agora Órgaun Liga ka LFTL seidauk transfere ba klube haat husi klube futeból hitu iha segunda divizaun nian.  

Klube hitu (7)  iha segunda divizaun mak hanesan;  Aitana FC, Nagarjo FC, Zebra FC, Santa Cruz FC, Fitun Estudante Lorosa’e FC,  Lica-Lica, Lemorai FC ho Kablaki FC.

Klube sira segunda divizaun  duvida no deskonfia osan transferénsia husi FFTL ba Órgaun Liga ka LFTL atu finansia atividade jogu Liga Timorense Segunda Divizaun  utiliza la ho transparente no deskonfia uza la loos. Nune’e, klube sira segunda divizaun nian husu beibeik ona atu Órgaun Liga aprezenta justifikasaun, maibé to’o ohin loron informasaun la klaru.

Situasaun sira-ne’e hatudu katak kompetisaun Liga Timorense iha primeiru no segunda divizaun la bele la’o normál  tanba falta osan operasaun, falta pagamentu ba arbitrajen no  falta osan dezlokasaun bá jogu.

Treinadór FC Zebra,  Rogério Mok, hateten,  dezde inísiu to’o agora  iha klube futeból segunda divizaun ne’e,  klube futeból  tolu maka   hetan ona  subsídiu ka direitu 30%, maibé  klube haat segunda divizaun nian to’o agora la hetan buat ida husi subsídiu  30%  inklui seidauk hetan osan dezlokasaun ba kada klube $1000.

“Hela jogu rua de’it ona, maibé   subsídiu  30% no aumenta tan ho osan ba dezlokasaun nian kada klube $1000 seidauk hetan,” Rogério Mok hateten hodi responde Hatutan.com via telefónika, Domingu (10/08/2025).

Iha semana hirak liubá klube futeból  hitu  hosi segunda divizaun  jogu Liga Timorense submete   karta “petisaun”  bá Liga Futeból Timor-Leste (LFTL) atu bele ezije sira  nia direitu ne’e, no husi LFTL  konfirma katak osan  komesa tama ona  iha klube sira nia kontra bankária, maibé  seidauk klube sira rasik mak seidauk ba verifika ka seidauk ba halo levantamentu iha banku.

“Ami fó ultimatu ba LFTL katak osan ne’e ami foti tenke 100%, ami lakohi ona foti 30%, se ami foti 30% ami sei realiza jogu tuir mai,”  nia hateten.

Nia esplika orsamentu  ne’ebé  aloka bá klube segundu divizaun, $10,000.00 no bá   iha primeiru divizaun $30,000.00, tanba  klube sira segunda divizaun konsidera   hamosu diskriminasaun bá  klube segundu divizaun sira.

 “Ami nia karta ba LFTL relata hotu iha laran katak,  husu atu hasae ami nia  subsídiu tanba $10,000.00  kompara ho primeiru divizaun $30,000.00 ne’e  ami haree katak laiha ekivalénsia. Foufoun ne’e mai rona katak, sira atu hatama de’it  $5000,  ami seidauk hatene nia klaridade hanesan ne’e duni ka lae, maibé ami seidauk bá foti osan ne’e  iha banku  hodi haree duni  osan iha ona  ka la?,” nia  hateten.

Kona-bá klube segunda divizaun falla iha sira-nia konta bankária rasik,  tuir nia katak, dezde inísiu kedas,  konta bankária submete  hotu  tiha ona fulan kotuk liubá. La’ós dehan  konta bankária no depois fallansu iha banku, ne’e laiha, fallansu ne’e  iha LFTL nia manejamentu,.

“Ami nia karta foin daudauk manda bá ne’e, maka FFTL aloka  orsamentu  $100,000.00,  se ami  nia karta la bá mós osan  ne’e laiha. Tanba orsamentu  FFTL  haruka bá ne’e, tenke liu husi asembleia ida   bazeia bá ida-ne’e maka FFTL manda osan bá,  tanba ne’e ita konsidera falla husi LFTL nia jestaun rasik,” Rogério Mok afirma.

Nia husu LFTL labele bobar lia katak, konta bankária maka taka, klube haat ne’ebé seidauk simu subsídiu husi 100% ne’e maka Nagarjo FC,  Santa Cruz, FC, Zebra FC, Kablaki FC. Tanba ne’e klube sira segunda divizaun nian  hein de’it osan $10,000.00 ne’e se la aloka kompletu sei la joga.

Karta petisaun klube futeból segunda divizaun nian ne’e hato’o mós ba MJDAK, FFTL ho LFTL. Tanba ne’e, osan ba direitu klube sira segunda divizaun ne’e bainhira la selu 100% maka jogu Liga Timorense segunda divizaun sei la realiza tuir kalendáriu ne’ebé LFTL fó sai.

“Ami nia karta ne’e mai fundamenta maka ne’e, sira  tenke selu ami nia subsídiu 100%,  no hasae  ami nia osan  husi $10,000,00,” Rogério Mok hateten.

Prezidente Klube FC Aitana, João Samanta Sousa  konfirma katak sira-nia parte hamutuk ho klube futeból rua seluk hetan tiha ona subsidiu  30%, no klube haat sira seluk ne’e  to’o agora sira seidauk simu.

“Ami simu tiha ona $3000,  maibé osan dezlokasaun ne’e  maka seidauk, osan  hamutuk $450 ida-ne’e maka ami seidauk simu dala ida,  maibé tuir  ami rona katak iha Segunda to’o Kuarta-ne’e sira halo ona pagamentu, ne’ebé  ami ne’ebé simu iha ona  30% maka Aitana FC, Fitun Estudante Lorosa’e ho FC Lica-Lica Lemorai,” João Samanta Sousa   informa.

Bá kestaun ne’e,  Prezidente Ezekutivu Liga Futeból Timor-Leste (LFTL), Ipolito Soares,  hateten katak    liga nunka halo diskrisaun bá klube futeból  sira, tantu husi primeiru divizaun no segundu divizaun.

“Ha’u husu obrigadu bá  Hatutan.com,  bele mai konfirma ho ami katak Órgaun Liga ka LFTL laiha hanoin  atu diskrimina tantu  klube primeira divizaun no segunda divizaun, maibé momentu ne’ebá  sira nia subsídiu  hotu-hotu mai meza prezidente,  momentu ne’e ha’u asina hotu kedas,” Ipolito Soares hateten.

Ipolito esplika, kestaun ida-ne’e iha  problema balun akontese, tanba momentu ne’e konta bankária  husi klube refere, iha problema uitoan, portantu  sira lori fali mai verifika iha liga, ida-ne’e maka dala ruma prosesu administrasaun iha banku ne’e maka halo klube sira sente diskrimina.

Problema seluk ne’ebé iha, tuir nia katak,   tanba  orsamentu transferénsia husi FFTL  bá ba LFTL  tarde, entaun  ida-ne’e afeta atu halo transferénsia bá segunda divizaun, tanba sira mós joga tarde la signifika    diskriminasaun  bá sira (segundu divizaun- red), maibé  LFTL  nafatin  iha kompromisu katak   sei  selu hotu klube  segundu divizaun sira  nia direitu.

Nia dehan, asina ona akordu ho  FFTL,  signifika semana ida-ne’e liga sei simu transferénsia husi  FFTL, nune’e  sei selu la’ós 30% maibé  sei selu sira nia direitu full katak 100% iha semana oin.

Nia dehan, klube haat maka seidauk  simu sira nia direitu  tanba iha problema uitoan kona-bá  administrasaun iha banku, mais  nia  promote  semana oin sira simu 100% kompletu.  Tanba iha primeiru divizaun joga  uluk,  portantu hahú liga  inisiativa   momentu ne’e antes atu joga sira  joga  simu 30%, maibé segundu divizaun LFTL atraza uitoan tanba  iha falla komunikasaun entre  liga ho klube segundu divizaun.

Kona-bá Klube haat ne’ebé maka seidauk hetan subsídiu 30%, Ipolito Soares ladún hatene fixu, maibé promete sei konsulta ho nia finansas.

Jornalista: Marcelino Tomse