Hatutan.com, (26 Agostu 2025), Díli- Komisaun Anti-Korrupsaun (CAC-sigla Portugés) ho Polísia Nasionál Timor-Leste liuhosi Diresaun Servisu Investigasaun Kriminál (DSIK),  Tersa (26/08/2025), hale’u tuku 07:00 dadeer, halo buska no apreensaun ba emprezáriu Timoroan ida ho inisiál L tanba deskunfia envolve iha krime partisipasaun ekonomia negosiu no fraude konstrusaun.

CAC ho Polísia halo buska no apreensaun domesiliáriu ba emprezáriu Timoroan ida ho inisiál L, Tersa (26/08/2025). Foto/Juvinal Cabral dos Santos

Atuasaun CAC nian ne’ebé hetan apoiu husi PNTL liuhosi DSIK ne’e baze ba mandadu  buska no apreensaun  husi Tribunal Judisiál Primeira Instánsia Dili (TJPID) ho Númeru Úniku Krimi (NUK) 0013/25.CACTL.

Tuir informasaun órgaun polisiál nian katak aktu emprezáriu Timoroan ho inisiál L ne’e hamosu prezuiju ba estadu Republika Demokratika Timor-Leste (RDTL) tuir krime ne’ebé deskunfia suspeitu komete ne’ebé konsta iha artigu 86°  kona-bá partisipasaun ekonómia negosiu A no fraude konstrusaun iha artigu. 96° Lei Nú. 07/2022.

Advogadu privadu  ne’ebé fó asistensia legal ba suspeitu L, Câncio Freitas ifnorma katak kazu ida kona-bá prosesu ida ne’ebé iha relasaun ho buat ne’ebé suspeita husi CAC no DSIK ba krimi fraude konstrusaun no partisipasaun ekonomia.

“Ita la hatene faktu ne’e oinsá no tanba saida mak buat sira ne’e akontese mai buska domisiliáriu ne’e tanba iha mandadu Tribunál ne’ebé maka autoriza Polísia no CAC  atu halo sira nia servisu para bele mai rekolla informasaun sira ne’ebé mak relasaun ho krimi fraude konstrusaun no partisipasaun ekonomia,” Advogadu Câncio Freitas informa ba jornalista sira.

Advogadu ne’e esplika nia kliente ne’e emprezáriu Timoroan ida depois investigasaun mak klareza, kona-ba prosesu ne’e nia kliente seidauk iha estatutu ida kona-áa arguidu ka suspeitu.

Informasaun husi parte balun katak buska no apreesaun ne’e kazu projetu irrigasaun balun iha Seloi Malere, Aileu nianm Advogadu Câncio Freitas  hateten seidauk hatene kona-bá informasaun no faze investigasaun mak bele hatene.

“Ita kumpri de’it mak buska domilisiariu ne’ebé mak Tribunál notifika mai sai iha loron 30 fulan-Jullu 2025 no Polísia sira mai halo nia servisu no dokumentu sira ne’ebé arolla sei iha auto notísia sira ne’e depois mak dokumentu sira ne’e entrega ba imi jornalista sira karik iha ona akuzasaun,” nia hateten.

Hafoin  remata buska no apreesaun iha edífisiu empreza nian iha área balun iha Dili laran, kontínua ho buska no aprrensaun demisiliáriu iha emprezáriu L nia rezidensiá iha parte Tibar.

“Tuir Lei, ita hanesan sidadaun ita tenke  koopera no kontribui ba ita-nia dezenvolvimentu iha ita nia rai laran,” Câncio Freitas afirma.

Buska no apreesaun ne’e  ekipa DSIK ho CAC arolla dokumentu kareta nian ho marka ida númeru matrikula B.22.xxx, konta bankaria BNCTL kompañia nian, telemovel no inklui dokumentos balun iha box  ida.

 Jornalista: Juvinal Cabral dos Santos