Hatutan.com, (05 Setembru 2025), Díli-Uma Kreda Timor hamutuk ho sarani sira, Kuarta (10/09/2025), sei halibur malu iha altar santa Tasi-tolu hodi selebra tinan-ida misa agradesimentu vizita Papa Francisco mai Timor-Leste.

Lee Mós: Sarani Timoroan Rihun-resin ho Domin Boot Partisipa Misa Funerál Papa Francisco iha Tasi-Tolu

Uma Kreda Timor fó sai atividade misa agradesimentu tinan-ida vizita Papa Francisco mai Timor-Leste. Foto/Juvinal Cabral dos Santos

Papa Francisco hala’o nia vizita pastorál mai Timor-Leste iha loron 09 to’o loron 11 fulan-Setembru 2024 no ba  serimónia misa agradesimentu ne’e, Bispu na’in-tolu, uma Kreda Timor nian konvida  sarani hotu atu partisipa iha santa misa asaun grasa ne’e.

“Ho fuan ne’ebé nakonu ho ksolok no gratidaun, Konferênsia Episkopál Timorense (CET, sigla portugés) konvida sarani sira hotu atu mai partisipa iha Santa missa asaun grasa nian, ba okaziaun primeiru aniversáriu visita Sua Santidade Papa Francisco nian mai rai doben Timor-Leste. Ita nia fuan no neon sei manas hela hodi hanoin prezensa istórika  maktoban  Papa Francisco nian iha ita-rain, iha loron 09-11 fulan-Setembru tinan 2024,” portavós Amo Carlos Roben hateten liuhosi Komferénsia Imprensa, Sexsta (05/09/2025).

Amu Carlos Roben hateten, Papa nia visita sai nu’udár bensaun ida ba Timor, no liu husi nia enkontru sira ho ukun nain sira, ho katuas no ferik sira, ho foin-sa’e sira, ho labarik sira no ho ema moras sira, hatudu duni katak Papa nia domin boot povu Timor ne’ebé simples no fiar nain.

Amu Carlos Roben haktuir, molok  Papa Francisco  fila hikas ba Roma, iha enkontru ho foin-sa’e sira, nia husik hela lia menon ida-ne’e, “Obrigadu ba imi nia prezensa, ha’u sei husik hela rai ida-ne’e, ne’ebé nakonu ho hamnasa, ho imi nia oin midar sira no ho esperansa katak imi hotu iha ha’u nia fuan. Maromak haraik bensaun ba imi hotu.”

Papa Francisco deklara iha nia viajen fila ba Roma, ho liafuan murak ida, “ha’u nia laran monu tiha ona ba Timor-Leste”. Tan Papa nia domin ida bo’ot nune’ e, fiar katak oras ne’e Maktoban Papa Francisco, harohan hamutuk ho Santu no Santa sira iha Lalehan mai rai no povu doben Timor-Leste.”

Iha fatin hanesan Prezidente Ezekutivu Komisaun Nasionál Juventude Katólika Timor-Leste (CNJCTL-sigla portugés) Koordenador Geral Ekipa Sinodal  Padre Francisco Indra do Nascimento Tex Seran, hateten CNJCTL maka órgaun ofisiál husi CET ne’ebé hakna’ar nu’udár responsável ba asuntu pastoral foin-sa’e Katólika nian iha Kreda Timor.

Relasiona ho informasaun ne’ebé hato’o ona, tinan ne’e,  CET fó konfiansa CNJCTL liu husi Ekipa Sinodal ne’ebé envolve foin-sa’e sira husi komisaun diosezana tolu, Movimento Juvenil, Katólika no Universitáriu sira hodi sai nu’udár responsavel másimu ba programa selebrasaun tinan ida vizita Sua Santidade iha Timor-Leste.

Programa sira ne’ebé sei hala’o iha loron  10 fulan-Setembru 2025 mak hanesan;

• Missa agradesimentu iha tuku, 18:00 lokraik, prezide husi Sua Eminênsia Dom Virgílio Kardeál do Carmo da Silva, SDB.
• Depois misa, sei iha sasin ka partilla kona-bá Santu Padre nia visita iha tuku 20:00-21:00 Otl
• Konsertu joven barullu tuku 21:30 to’o remata ne’ebé sei anima husi banda Nasionál, banda komisaun diosezana, movimentu juvenil Katólika no asosiasaun juventude Independente

Maktoban Papa Francisco ho nia Menssagem sira ne’ebe husik hela mai Timor oan hotu iha rai doben Timor-Leste. Belun foinsa’e sira no Sarani tomak, keta haluha halo ita nia fiar sai hanesan Ita nia kultura, (Que a Vossa Fé, Seja a Vossa Cultura).

 Jornalista: Juvinal Cabral dos Santos