Hatutan.com, (23 Setembru 2025),Díli—Ministru Interiór (MI), Francisco da Costa Guterres  hateten, atu atu haruka fila ka repatria (haruka fila ba nia nasaun)  fujitivu Kalumban Mali alias Leonardo Benigno Tilman, ne’ebé  haksumik aan tinan barak ona iha Timor-Leste depende ba relatóriu husi Ministériu Justisa nian.

Lee Mós: Ministru Justisa Sérgio Hornai Kontinua Análize Kazu Fujitivu Kalumban Mali

Ministru Interiór, Francisco da Costa Guterres. Foto/Juvinal Cabral dos Santos

Ministru  Interiór Francisco da Costa Guterres bá jornalista sira iha resintu  Kuartel Jerál Polísia Nasionál Timor-Leste (PNTL), Tersa  (23/09/2025), hateten prosesu atu haruka fila fujitivu   Kalbumban Mali  entrega tiha ona bá Ministériu Justisa atu halo servisu.

Ministru  Justisa, Sérgio Hornai  maka sei haree, ne’ebé Ministériu Interiól la  bele hakat nafatin  tanba iha institusaun ida nia liman  no entrega bá institusaun ida nia liman.

“Husik bá Ministériu Jusitisa  la’o tuir, halo nia servisu  sei haruka fila fujitivu ne’e, ita  fó apoia, maibé   ita  hein rezultadu ka relatóriu  Ministériu Justisa ninian,”  Ministru Interior Francisco Guterres hateten.

Membru Governu  ne’e nia firma,    kazu fujitivu kalumban Mali,parte  Ministériu Justisa  nia  kompeténsia, ne’ebé  lidera husi Ministru Sérgio da Costa Hornai, depois maka liga bá parte Migrasaun kona-bá saída maka atu halo bá ema ne’e.

 “Ne’ebé ita  la bele bá  bainhira Ministériu Justisa kaer ona, ita la bele  tama tan bá  husik sira halo hotu sira nia prosesu hotu lai, kunadu sira nia prosesu hotu ona, sira sei envolve ho institusaun ne’ebé maka  iha,  hanesan Migrasaun, para depois Migrasaun  fó apoia  mak ita hola asoens bá  ema hanesan ne’e,”  nia dehan.

Fó hanoin fila fali katak, Hatutan.com halo enrevista ida ho Minisru Justusa Ministru Justisa, Sérgio da Costa Hornai   iha resintu  palásiu prezidensiál, tersa (02 /09/2025),  hateten kontinua   análize  kazu  fujitivu Kalumban Mali.

“Fasil atu deside, maibé ita tenke forma pensar sira, halo análize  kle’an depois maka foin halo  desizaun  tanba situasaun sira hanesan ne’e haree bá ema nia direitu  fundamentál,”  Ministru Justisa  Sérgio da Costa Hornai  hateten .

Nia haktuir, kazu fujitivu Kalumban Mali alias Leonardo Benigno Tilman,  presiza  haree kle’an,  labele ohin tama la’ós halo irregularidade  ninia vistu iha Timor-Leste  maibé tanba nia hetan kondenasaun  entaun presiza chack In re-chack  bá kazu ne’e  molok iha bá  halo desizaun.

Ministru Sérgio Hornai esplika, prosesu bá kazu fujitivu Kalumban Mali tenke haree  mós iha  reseposidade Estadu Timor-Leste nian entre sidadaun estranjeiru ida  tama iha territóriu nasionál  ka iha área Timor nia judisionál.

Kalumban Mali, fujitivu Prokuradoria Nusa Tengara Timur (NTT) ho Prokuradoria Jerál Repúblika Indonézia nian dézde kedas tinan 2016. Nia orijen husi Lamaknen, Postu Administrativu Atambua, Provínsia Kupang, Indonézia,  ne’ebé deskonfia falsifia  dokumentu  hodi sai sidadaun Timorense ho naran Leonardo Benigno Tilman.

Fujitivu Kalumban  Mali,  hetan sentensa husi Painél Juis Tribunál Krime Korrupsaun ka  Pengadilan Tindak Pidana Korupsi (Tipikor) Kupang  tinan-15 prizaun efetivu iha tinan 2016. Maibé, prosesu julgamentu bá kazu ne’e ho karater  in-absénsia ho ajenda akuzasaun final,  Kalumban Mali halai lakon to’o ohin loron.

Kalumban Mali, envolve kazu fornesimentu adubu ka pupuk ho kuantidade tonelada  575 ho valor orsamentu millaun Rp. 976. Nia nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha Jullu 2013, Kalumban Mali sai hanesan kandidatu membru lejislativu husi  Partidu Amat Nasonal (PAN) bá DPRD-NTT.

Jornalista: Marcelino Tomae