Hatutan.com, (09 Outubru 2025), Díli– Prezidente Komisaun F  Parlamentu Nasionál ne’ebé trata asuntu Saúde, Seguransa Sosiál no Igualdade Jeneru, Deputada Maria Gorumali Barreto, konfirma katak iha audiénsia públika ba Orsamentu Jerál Estadu 2026 nian,  sei husu klarifikasaun ba Vise-Ministru bá asuntu Fortalesimentu Instituisionál Saúde (VMFIS) José dos Reis Magno kona-bá nia oan feto ne’ebé servisu iha nia gabinete hetan mós bolsu estudu iha Ministériu Saúde.

Lee Mós: Vise-Ministru Saúde José dos Reis Magno Nia Oan Feto Servisu iha Nia Gabinete Hetán Bolsu Estudu Mós iha Ministériu Saúde

Prezidente Komisaun F Parlamentu Nasionál, Deputada Maria Gorumali Barreto. Foto/Zita Menezes

“Asuntu ne’e ami akompañia de’it liuhosi mídia sosiál, pesoalmente ha’u maibé ami komisaun F seidauk simu keixa ka hasoru malu direita ho Vise-Ministru bá asuntu Fortalesimentu Instituisionál Saúde (VMFIS) José dos Reis Magno para atu haree bá asuntu ida-ne’e,” Deputada Maria Gorumali Barreto bá jornalista sira iha PN, Kinta (09/10/2025).

Deputada ne’e afirma  iha parte ida mós katak Parlamentu Nasionál  foin tama husi fali resesu  iha  loron 15 fulan-Setembru, tama mai ho situasaun ne’ebé iha manifestasaun hasoru Parlamentu Nasionál. Nune’e, Komisaun F seidauk bele bolu Vise-Ministru bá asuntu Fortalesimentu Instituisionál Saúde (VMFIS) José dos Reis Magno para mai hato’o asuntu ida-ne’e.

“Ami aguarda bá iha audiénsia públiku OJE 2026 maka komisaun F sei husu ida-ne’e para Vise-Ministru Saúde bele informa bá iha komisaun relevante liga asuntu nepotizmu ne’ebé iha,” afirma Deputada Maria Gorumali Barreto.

Reprezentante povu ne’e hateten tuir nia opiniaun pesoál katak tanba lei ida mós la bandu katak ema ida  nia aman ministru ka vise-Ministru nia oan  labele tuir ida-ne’e ida ne’ebá. Imporante mak nia tenke preinxe rekezitu.

“Sé Vise-Ministru José dos Reis Magno nia ona preinxe rekezitu maka nia liu, ha’u hanoin ne’e iha direitu asesu bá iha ne’ebá, mais sé kuandu nia la preinxe rekezitu depois nia mós servisu fali iha Gabinete nia aman nian ka inan nia sé nian, ida-ne’e maka ita kestiona. Mais ida-ne’e informasaun ami seidauk hetan ida kredivél ha’u  seidauk bele fó razaun ida ne’ebé maka forte bá asuntu ida-ne’e,” nia hateten.

Jornalista : Zita Menezes