Hatutan.com, (05 Novembru 2025), Díli-Ministru Ensinu Superiór, Siénsia no Kultura (MESSK), José Honório da Costa Pereira Jerónimo, afirma kona-ba kazu bebé ida lakon vida hafoin simu vasina husi estajiária finalista Universidade Nasional Timor Lorosa’e (UNTL) iha Sentru Saúde Munisípiu Liquiça tenke investiga kle’an autór mak se.

Lee Mós: Ministériu Saúde Halo Investigasaun bá Bebé ida Mate Hafoin Vasina iha Liquiça

Ministru Ensinu Superiór, Siénsia no Kultura, José Honório da Costa Pereira Jerónimo. Foto/uvinal Cabral dos Santos

“Ha’u hanoin situasaun ida ne’e ita la bele rasionaliza katak kursu ne’ebé estudante sira foti ne’e la di’ak, kazu ida ita labele rasionaliza situasaun hotu. Primeiru lugar atu hateten katak ha’u mós akompaña kazu ne’e mis ita hein investigasaun ne’e la’o hodi hateten katak ne’e mal-prátika ka buat seluk, ita labele hateten kedas tanba bebé ida mate depois ita rasionaliza katak ensinu superior iha Timor la iha kualidade ne’e ha’u triste,” Ministru Ensinu Superiór, Siénsia no Kultura, José Honório da Costa Pereira Jerónimo, ba jornalista iha resintu Parlamentu Nasional (PN), Kuarta (05/11/2025).

MESSK nia hanoin estudante sira ne’e aprende sira hatene sira ba halo  prátika mais karik mosu buat balun ne’ebé la espera ida ne’e bele akontese.

Nia hatutan, vise-Ministru Saúde husu atu halo investigasaun ba bebé ne’e nia mate, se-se mak atende bebé ne’e to’o ikus mai nia bele hakotu nia iis, ida ne’e mak importante, maibé estudante sira ne’ebé halo prátika ne’e sira halo preparasaun ne’ebé mós di’ak, maibé dala ida tan labele rasionaliza situasaun hodi hateten katak Fakuldade Medesina nia estudante sira la iha kualidade.

MESSK husu ba instituisaun kompetente halo investigasaun kle’an ba kazu ne’e hodi alerta ba públiku katak kazu ne’e mai hanesan ne’e.

Prosedimentu estudante sira estuda Medesina sira mak hatene liu mais , husu nafatin halo investigasaun kle’an liu atu hatene autór importante ba mal prátika ne’e se.

Ministra Saúde (MS), Élia A.A. dos Reis Amaral. Foyo/Juvinal Cabral dos Santos

Tuir nia, UNTL iha rekizitu ne’ebé rigirozu bainhira atu foti Medesina, maibé ba esnsinu superior privadu sira iha autonomia atu deside, se estudante ne’e kursu sosial nia labele foti fali kursu Medesina  iha regras ne’e labele, ema estuda biologia, fizika, matematika nia bele foti kursu sira ne’ebé relasaun Medesina.

Iha fatin hanesan Ministra Saúde (MS), Élia A.A. dos Reis Amaral hateten relasiona kazu mal-prátika bebé ida hetan vasina iha Sentru Saúde Liquiça atende husi estajiaria finalista UNTL to’o lakon vida ne’e universidade mak atensaun másimu.

“Kazu ne’e Universidade sira mak presiza tau atensaun, atu nune’e, ita atu hadi’a situasaun ne’e, no presiza halo investigasaun ba prosesu sira ne’ebé akontese,”, Ministra Élia dos Reis Amaral hateten.

Jornalista: Juvinal Cabral dos Santos