Hatutan.com, (20 Janeiru 2026), Díli-Polísia Nasionál Timor-Leste (PNTL) identifika Leonito Dasi Tai ne’ebé mate iha ai-laran parte Cailaco, Munisípiu Bobonaro, deskonfia ema oho.

Portavós Polísia Nasionál Timor-Leste (PNTL) Superintendente Polísia João Belo dos Reis relata informasaun seguransa ba jornalista sira, Tersa (20/01/2026), iha sala konferénsia Komandu Jerál PNTL. Foto/Juvinal Cabral dos Santos

“Kazu omesidiu ida iha parte Cailaco sidadaun Timoroan ida mate iha ne’ebá nia naran Leonito Dasi Tai, mate iha ai-laran. Investigasaun la’o hela no Polísia Munisípiu Bobonaro liuhusi Seksaun Investigasaun rejistu ona kazu ne’e ba Ministériu Públiku (MP), ekipa husi Diresaun Servisu Investigasaun Kriminál Nasionál (DSIKN) agora dadaun iha dalan ona atu ajuda prosesu investigasaun iha ne’ebá,” Portavós Polísia Nasionál Timor-Leste (PNTL) Superintendente Polísia João Belo dos Reis, ba jornalista sira iha sala konferénsia Komandu Jerál PNTL, Tersa (20/01/2026).

Portavós PNTL, dehan, mate isin halo ona otópsia depois prosesu sei aprezenta iha tempu badak nia laran.

“Deskonfia kakorok hetan ko’a prosesu investigasaun la’o hela, nia hela iha Porugua iha parte Cailaco.  Prosesu investigasaun la’o hela sira ne’ebé mak iha informasaun ita presiza rekolla no Polísia sei bolu,  agora prosesu la’o hela ne’ebé,” Superintendente Polísia João Belo dos Reis hateten.

Matebian  Luis Bau Dupla Sidadania

Polísia Nasionál Timor-Leste (PNTL) identifika mós kazu sidadaun ida ho naran Luis Bau ne’ebé  mate iha Mota Memo, Munisípiu Bobonaro, dupla sidadania Timorense ho Indonéziu.

Portavós Polísia Nasionál Timor-Leste (PNTL) Superintendente Polísia João Belo dos Reis,  informa, sidadaun ne’ebé mate iha Mota Memo nia iha kartaun rua, kartaun eleitoral Timor-Leste nian no Kartu Tanda Penduduk (KTP) husi Indonézia.

“Kona-ba sidadaun mane ida ho idade tinan 72 ho identidade Luis Bau mate iha Mota Memo nian, identifika katak sidadaun ne’e mésmu moris iha Indonézia, aleinde nia militar reformadu Indonézia nian ne’ebé nia mate iha ne’ebá bainhira mai vizita nia família,” Superintendente Polísia João Belo dos Reis haktuir.

Nia afirma, sidadaun Luis Bau refere deskonfia mota lori, maibé prosesu investigasaun tomak iha sira nia liman, maibé autoridade seguransa Indonézia sei relata kona-ba lala’ok prosesu ne’e rasik mai PNTL.

“Liu-liu família ne’ebé mak nia hela ba mai iha Memo, ita bolu ona  husi Polísia Munisípiu Bobonaro liuhusi seksaun Investigasaun munisípiu nian bolu ona família sira atu foti informasaun relativamente ba kazu ne’e,” João Belo dos Reis hateten.

Jornalista: Juvinal Cabral dos Santos