Hatutan.com, (12 Feveiru 2026), Díli– Governu rekoñese irregularidade iha prosesu rekrutamentu kadete Polísia Nasionál Timor-Leste (PNTL). Ho nune’e, Governu se kria komisaun internasionál ne’ebé envovle mós Polísia Portugal ho Austrália atu kurije irregularidade sira-ne’e.

Lee Mós: Governu Suspende Tempráriu Rekrutamentu Ajente PNTL 2025

Kadete foun PNTL balun la satisfas ho prosesu rekrutamentu no konsidera iha familiarizmu no nepotizmu. Foto/Juvinal Cabral dos Santos

Primeriu-Ministru, Xanana Gusmão, Kinta (12/02/2026), informa ih reuniaun Konsellu Ministru nian, Kuarta-ne’e, Governu haree rezolve  no buka hatene problema nia hun. Nune’e, Governu suspende provizóriu rekrutamentu ne’e hodi hanoin atu kria komisaun internasionál atu haree didi’ak no kurije lapsu sira ne’e.

“Iha orden palavra  husi  sira ne’ebé la satisfas ho rekrutamentu hakilar iha Palásiu Govenrnu nia oin, katak  Polísia saláriu ki’ik, Xanana korruptór tanba ne’e, objetivu kria komisaun internasionál ne’e hodi  hasai desizaun foun,  ka halo foun fali, saída maka presiza atu hadi’a  hodi simu polísia foun.

“Ho  komisaun foun ne’e hodi monta bá ita nia rain katak, kuandu iha rekrutamentu bá Polísia  presiza ida-ne’e, ida ne’ebá, mais halo ho loloos, la bele hanensan babain sira temi famíliarizmu buat sira ne’e hotu,” PM Xanana hateten.

Fó hanoin fila fali katak |euniaun Konsellu Ministru (KM), Kuarta 11 Fevereru 2026, iha Palásiu Governu, deside  suspende provizóriu rekrutamentu ajente Polísia Nasionál Timor-Leste (PNTL) tinan 2025 tanba deskonfia iha prátika favoritizmu no familiarizmu iha prosesu selesaun.

Desizaun ne’e foti hafoin membru Governu sira hetan informasaun preliminar kona-bá alegasaun irregularidade iha prosesu rekrutamentu ajente PNTL foun.

Konsellu Ministru konsidera katak presiza halo avaliassaun kle’an no independente atu garante transparénsia, justisa no meritu iha prosesu rekrutamentu ba instituisaun seguransa nasionál.

Jornalista: Marcelino Tomae