Hatutan.com, (16 Fevereiru 2026), Díli-Polisia Nasionál Timor-Leste (PNTL) Munisípiu Díli detein suspeita ho inisial HRA ne’ebé sona nia laen AM (katuas-oan) iha Aldeia Naroman, Suku Madohi, Postu-Administrativu Dom Aleixo, Munisípiu Díli, Domingu (15/02/2026).

Tiduk ne’ebé suspeita utiliza hodi sona nia katuas-oan. Foto/Espesiál

Kronólojia husi parte Polísia katak kazu violénsia domestika ne’e akontese iha Domingu ne’e, tuku 15:45 Otl, bainhira vitíma ho inisiál AM halo hela serbisu hadi’a telefone, derrepenti mak suspeita ho inisial HRA (vitíma nia ferik-oan) ho tudik sona vítima iha nia serbisu fatin, sona kedas iha vítima nia kelen parte loos, hodi rezulta kanek no ran sai maka’ás.

Komandante PNTL Munisípiu Díli, Superientendente Xefe Polísia Orlando Gomes, Segunda(16/02/2026), informa bainhira kazu ne’e akontese Polísia Batallaun Orden Públiku (BOP) sira mós to’o kedas lokal akonteismentu no halo prevensaun iha momentu ne’ebá.

Bainhira polísia to’o iha fatin akontesimentu, vítima nia família entrega suspeita ba PNTL ho evidénsia tomak hodi lori mai iha Eskuadra Polísia Dom Aleixo, nune’e kontinua halo prosesu.

“Tanba kazu ne’e flagrante delitu entaun suspeita ita hatama ba sela detensaun  durante oras 72  no vítima evakua kedas ba ospitál hodi halo tratamentu,” Superientendente Xefe Polísia Orlando Gomes hateten.

“Suspeita ita detein ona 72 oras, vítima agora halo hela tratamentu iha ospitál seidauk bele presta nia deklarasaun tanba ho kondisaun sei iha tratamentu nia laran”, Komandante PNTL munisípiu Díli informa.

Kazu fen no laen ne’e PNTL konsidera violénsia domestika mais ida-ne’e hanesan tentativa omesidiu tanba suspeita ho tudik sona katuas oan la konsege mate, mais sona iha kelen. Tanba suspeita atu sona tan  vítima nia isin lolon mak vítima nia aman haree hodi hadau tiha tudik, kazu ne’e nia motivu seidauk hatene tanba vítima sei halo hela tratamentu.

Jornalista: Juvinal Cabral dos Santos