Hatutan.com,  (20 Fevereiru 2026) Díli– Polísia Sientífiku Ivestigasaun Kriminál (PCIC-sigla portugés) finaliza ona ezame bá objetu sira husi  Komisaun Anti-Korrupsaun (CAC) ne’ebé rekolla iha buska no apreensaun ba  dirijente Timor GAP,E.P ho inisiál AC nia rezidénsia.

Lee Mós: CAC Halo Buska Bá Dirijente Timor Gap ho Inisiál AC

Diretór Nasionál PCIC, Vicente Fernandes e Brito. Foto/Marcelino Tomae

Diretór  Nasionál PCIC, Vicente Fernandes e Brito, bá  jornalista sira hafoin partisipa  Aniversáriu CAC bá dala-XVI  iha Edifisiu CAC, Díli, Sesta (20/02/2026), hateten, PCIC finaliza ona  ezame dijitàl  forensik bá telemovél  ho objetu  sira  seluk husi dirijente Timor GAP,E.P ho inisiàl AC nian.

“Ha’u prezume prosesu ne’e remete ona bá iha Ministériu Públiku ba rezultadu ezame telfone, ezaminasaun ba telfone no kualker ba objetu aprendidu sira ne’e. Ha’u hanoin bá ekipamentu sira ne’e no ha’u ladún haree apreensaun, ha’u só  hatun despaisu de’it para dijitál forense bá PCIC prosede ezame krusiál, konforme prazu ne’ebé mak iha despaisu,” Vicente Fernandes e Brito hateten.

Nia dehan, kazu ne’e agora dadaun iha ona Mínisteriu Públiku nia liman tanba PCIC remete ona ba Ministeriu Públiku.

Vicente e Brito informa mós  katak, durante tinan  2025 kazu krime pendente ne’ebé PCIC atende ne’e husi  Baucau, Covalima, Dili no Oé-cusse hamutuk 140 -resin.

Nia dehan, husi kazu sira ne’e maioria  kazu burla agravadu, falsifikasaun dokumentu hosi veteranu sira, violasaun seksuál, esplorasaun ilísitu jogu no omesidu.

Nia informa, kazu sira ne’ebé mak pendente barak ne’e, tanba sei iha prosesu investigasaun nia laran no PCIC presiza konklui hafoin bele remete ba iha Ministériu Públiku. 

Fó hanoin fali katak iha loron 17 fulan-Dezembru 2025, Komisaun Anti-Korrupsaun (CAC), liu husi Servisu Investigasaun Kriminál, halo buska no apreensaun ba direjente Timor GAP, empreza públika (Timor Gap,E.P)  ho inisiál AC iha ninia rezidénsia privadu ne’ebé lokaliza iha Aldeia Moris Foun, Suku Comoro, Pontu Administrativu Dom Aleixo, Munisípiu Díli.

Durante  buska  ne’e, CAC konsege foti dokumentu sira iha kaixa rua,  no mós  halo apreensaun ba karreta kor malahok marka Countryman, ho númeru  sapa matríkula XXX 31XX TL.

Jornalista: Marcelino Tomae