Hatutan.com, (10 Marsu 2026), Díli-Polísia Nasionál Timor-Leste (PNTL) identifika ona suspeita ho inisiál JRO ne’ebé abandona bebe durante semana tolu iha Ospitál Nasionál Guido Valadares (HNGV).

Komandante Polísia Eskuadra Kristu-Rei, Inspetór Xefe Polísia Paulino de Carvalho. Foto/Juvinal Cabral dos Santos

Polísia Nasionál Timor-Leste Eskuadra Kristu-Rei  fó prazu tempu oras 24 nia laran ba suspeita JRO atu integra an.

“Segunda (09/03/2026), hale’u tuku 11:00 Otl, ha’u rasik hetan telefone husi seguransa no ofisiál atendimentu ba labarik nian iha HNGV, entaun ha’u ba to’o duni iha ne’ebá hetan duni situasaun kazu abandona bebe,”  Komandante Polísia Eskuadra Kristu-Rei, Inspetór Xefe Polísia Paulino de Carvalho informa  ba jornalista sira iha nia knaar fatin, Becora,  Díli, Tersa (10/03/2026).

Polísia  buka informasaun relevante ba paradeiru alin-feto ne’ebé ba partu iha HNGV, nia husik hela bebe durasaun tempu semana tolu. Maibé, Tersa dadeer ne’e, família sira mós hatene ona alin-feto ne’ebé partu bebe iha HNGV nia bin nain rua presta ona deklarasaun iha Eskudra Kristu-Rei.

“Ha’u kanaliza kedas ba investigasaun  iha parte Vulneravle Person Unit (VPU) Munisípiu Díli para atu haree kontinuasaun ba prosesu ne’e la’o oinsá no daudaun ne’e ekipa saúde, madre sira, no funsionáriu HNGV mak trata hela bebe ne’e to’o agora kondisaun di’ak hela,” Inspetór Xefe Polísia Paulino de Carvalho hateten.

Nia haktuir bainhira média sosiál públika kona-bá kazu abandona bebe, horseik, inan ne’ebé ba bebe ne’e nia bin sira hatene hotu ona, entaun ohin bolu hotu ona, nune’e koko tenta para hatene paradeiru suspeita ne’ebé husik hela nia oan iha HNGV.

Jornalista: Juvinal Cabral dos Santos