Hatutan.com, (26 Marsu 2026), Díli-Ministru Transporte no Komunikasaun (MTK), Miguel Marques Gonçalves “Manetelu” informa  Governu asina ona Air Services Agreements voo dahuluk Aero Dili nian ba Kuala Lumpur, Malázia,  ne’ebé atu realiza iha Sábadu (28/03/2026).

Lee Mós: Impaktu Funu Médiu Oriente, Aero Dili Hasa’e Folin Tiketi 20%

Sábadu, 28 Marsu 2026, Aero Dili hahú voo dahuluk ba Kuala Lumpur, Malázia. Foto/Juvinal Cabral dos Santos

“Estadu  no governu nia obrigasaun ne’e mak ita asina Air Services Agreements, agora aviaun atu semo la semo, ne’e depende ba kompañia airline sira. Atu dehan katak MTK asina ona  Air Services Agreements ho Kuala Lumpur atu Aero Dili bele halo nia voo ba rota foun Dili-Kuala Lumpur,” Ministru Transporte no Komunikasaun (MTK) Miguel Marques Gonçalves “Manetelu”  informa bá jornalista sira hafoin reuniaun Konsellu Ministru iha Palásiu Governu, Kuarta (25/03/2025).

Nia dehan, governu asina ona nasaun barak, maibé Timor-Leste nian foin semo ba nasaun balun.

“Aero Dili iha esforsu atu semo ba Darwin-Austrália, nune’e  iha loron  28 fulan-Marsu tinan 2026, hahú semo tan ba Kuala Lumpur-Malázia ne’e tanba ita asina ona Air Services Agreements ba nasaun sira ne’e, ne’ebé estadu  no governu nia ne’e to’o iha ne’ebá. Agora ida ne’e la’ós kompania governu nian ne’ebé  ita mak deside semo ba iha ne’ebé,” Miguel Manetelu hateten.

Ministru Miguel Manetelu realsa tan,  Aero Dili ne’e operasaun hakarak semo bá iha ne’ebé ninia direitu, tanba governu loke tiha dalan ona liu husi asina Air Services Agreements.

Kona-bá proposta  AirAsia Indonézia nian ne’ebé submete proposta ba Governu atu halo operasaun mai Timor-Leste ho rota Denpasar-Dili no Dili-Denpasar, Ministru MTK Miguel Marques Gonçalves “Manetelu” afirma seidauk iha informasaun klaru.

“Imi hein, ha’u sempre hateten katak buat ne’ebé governu atu foti ka Ministru Transporte no Komunikasaun atu foti kuandu to’o momentu ida ha’u sei ko’alia. Ha’u bolu duni Señór Lourenço de Oliveira na’in ba Aero Dili tanba iha hodibainrua iha Sentru Konvensaun Díli (CCD-sigla Portuges) Timor-oan hamutuk iha ne’ebá ho governu no emprezariu, ita haree para oinsá mak medida sira ne’ebé mak atu foti karik iha futuru ne’e labele hamate emprezariu Timor-oan,” Ministru Miguel “Manetelu” esplika.

Jornalista: Juvinal Cabral dos Santos