Hatutan.com,  (30 Marsu 2026), Díli– Membru Parlamentu Nasionál husi  Bankad CNRT, Cedelizia Faria dos Santos, husu Governu atu kontinua monitoriza presu kombustível atu kumpre dekretu-lei ne’ebé Governu aprová ona iha loron 25 fulan Marsu 2026.

Lee Mós: Governu Harii Komisaun Kontrola Presu Konvustível

Tékniku sira husi ANP,I.P halo inspesaun rotina ba estasaun bomba kombustivel ETO Mandarin-Díli. Foto/dok.Espesiál

Liu hosi  plenária, Segunda (30/03/2026), Deputada Cedelizia Faria dos Santos, apresia ba dokumentu ne’ebé foin daudaun Parlamentu Nasionál simu ona, katak Governu aprová ona temporariamente atu estabiliza presu kombustivél.

“Ami husu ba Governu labele dekretu lei sai de’it, maibé ita la kontrola ba da-ne’e. Kadavéz ita nia kompañia fornesidór sira ne’e maské dekretu lei iha ona, maibé sira nakar uituan sira la kumpri,” Deputada Cedelizia Faria  hateten.

Iha Kuarta, 25 Marsu 2026, Konsellu Ministru aprova ona projetu Dekretu-Lei, ne’ebé aprezenta husi Ministru Petróleu no Rekursu Minerais, Francisco da Costa Monteiro, kona-ba medida ba estabilizasaun temporária folin kombustivel no seguransa fornesimentu.

Diploma ida-ne’e ho objetivu prinsipál atu hamenus impaktu instabilidade internasionál atuál iha setór enerjétiku, garante estabilidade folin kombustivel iha territóriu nasionál, no garante kontinuidade ba nia abastesimentu.

Medida prinsipál sira ne’ebé aprova ona, destaka estabelesimentu limite másimu ba folin kombustivel nian, ne’ebé Estadu fó subsídiu ne’ebé finansia hosi Orsamentu Jerál Estadu. Nune’e, presu kombustível hanesan gozuliña kada litru labele liu US$1,50,  gozúleu la bele liu US$1,65 kada litru, avtur kada litru la bele fa’an liu US$2,50  no gás (LPG) fa’an la bele liu US$4,20 kada kilograma.

Dekretu-Lei ne’e define mós mekanizmus ba koordenasaun entre entidade públika no operadór kombustível sira atu garante abastesimentu, no mós medida exepsionál sira ba kontrolu merkadu nian, fiskalizasaun reforsada, no aplikasaun sansaun sira iha kazu infrasaun, inklui kombate dezviu ilegál (uzu ilegál) hosi kombustivel subsidiadu sira.

Ho desizaun ida-ne’e, Governu hanoin atu proteje kbiit sosa família sira nian, hamenus impaktu aumentu folin ne’ebé karik akontese iha ekonomia, no mós garante funsionamentu regulár hosi atividades ekonómikas, iha tempu hanesan hodi asegura disponibilidade hosi kombustivel durante períodu instabilidade internasionál.

 Jornalista : Zita Menezes