Hatutan.com, (07 Abríl 2026), Díli-Deskonfia pesoál membru Polísia Nasionál Timor-Leste (PNTL) husi Unidade Polísia Maritíma (UPM) inisiál GSP  no pesoál membru FALINTIL-Forsa Defeza Timor-Leste (F-FDTL) husi komponente Naval ho inisiál EDSP Involve hatama motór marka  Yamaha RX-King ilegal husi Indonézia mai Timor-Leste.

Autoridade sira asegura motór Yamaha RX-King ne’ebé hatama ilegal husi Indonézia mai Timor-Leste. Foto/PNTL

Iha Sesta, 03 Abríl 2026,  hale’u tuku 04:00 Otl, ekipa Konjunta husi parte Polísia nian  no Servisu Nasionál Intelijénsia (SNI) ho mós intelijénsia F-FDTL nian konsege deteta movimentu transporte balun ne’ebé mak transporta sasán kontra bandu mai husi fronteira tama kapitál Dili.

Ekipa konjunta duni tuir konsege deteta katak  husi soldadu  F-FDTL balun ne’ebé mak fasilita hela transaksaun sasán kontra bandu motór  ho marka Yamaha RX-King ida.

“Sidadaun ne’e ho inisiál EDSP ita asegura kedas iha tempu ne’ebá ho sasán evidensia depois halo ona prosesu ho NUK:00117/2026-PNSIK ne’ebé aprezenta ona bá Ministeriu Públiku,” portavós PNTL Superintendente-Xefe Polísia João Belo dos Reis, informa ba jornalista sira, Tersa (07/04/2026), iha Díli.

Aleinde ne’e iha informasaun ne’ebé mak Diresaun Servisu Investigasaun Kriminál (DSIK) rekolla katak membru PNTL husi Unidade Polísia Maritima (UPM) ho naran inisiál GSP mós inklui depois loke investigasaun.

“Loke investigasaun ne’e ita deteta katak  bainhira relasaun família kolega ida foti nia karreta ba uza ne’e la iha koñesimentu ba nia depois karreta ne’e to’o iha fronteira nia na’in la hatene, karreta no motór agora dadaun asegura hela iha Polísia hodi aprezenta  ba Ministériu Públiku (MP),”  Superintendente-Xefe Polísia João Belo dos Reis  hateten.

Sasán kontra bandu ne’e tama iha parte fronteira Palaka Batugade nian depois mak servisu sekreta sira deteta tenta hapara mais lakohi para no duni tuir konsege tama kapitál Dili mak kaptura.

Iha sorin seluk Segundu Komandante Jerál PNTL Komisaria Asistente Polísia Natércia Eufrazia Soares Martins, hateten individu ida ka rua mak kontra fila-fali ninia dever ne’e rasik, entaun iha ne’ebá regra ida forte atu bele aplika, maibé tuir nia prosedimentu.

“Leí ko’alia klaru, satán membru sira ne’ebé mak hala’o nia knaar nu’udar autoridade seguransa liu-liu Polísia Nasionál Timor-Leste nia iha papel,” Segundu Komandante Jerál PNTL Komisaria Asistente Polísia Natércia Eufrazia Soares Martins hateten.

Papel primeiru mak eduka ema atu kumpri Leí obriga ema atu tenke komprende Leí mais husi ida ne’e, individu ida rua mak kontra fila-fali ninia dever ne’e rasik, entaun iha ne’ebá regra ida forte atu bele aplika, maibé tuir nia prosedimentu.

“Ne’ebé iha ita nia Leí Kriminál, ita nia Leí disiplinar ida-ne’e mak sei aplika bá kualker pesoal ida-ne’ebé mak komete aktu iregularidade tantu krimi no disiplina”, Segundu Komandante Jerál PNTL afirma.

Nia dehan, kazu ida-ne’e agora daudaun iha Investigasaun Kriminál ne’ebé sira hatene iha ne’ebá iha prosedimentu krime ne’ebé mak sira sei utiliza para bele prosesa kazu ne’e.

Orientasaun husi Komandu jerál PNTL ida-idak hola nia responsabilidade iha nia kada Unidade responsabilidade, departamentu, munisípiu ida-idak hatene ninia dever, ne’ebé hakerek ona iha Leí sira ida-idak nia kompetensia.

Jornalista: Juvinal Cabral dos Santos