Hatutan.com, (07 Abríl 2026), Díli– Segundu Komandante Jerál Polísia Nasionál Timor-Leste (PNTL), Komisária Asistente Natércia Eufrazia Soares Martins, hateten membru PNTL sira na’in-100-resin ne’ebé ho idade tama ba reforma iha faze avaliasaun.

Lee Mós: Ofisiál PNTL ho Idade Reforma Labele Kompete Vaga Komisáriu Jerál

Segundu Komandante Jerál PNTL Komisaria Asistente Polísia Natércia Eufrazia Soares Martins. Foto/Juvinal Cabral dos Satos

“Ami sei halo avaliasaun nesesidade depois hetan tiha nia finalidade mak ita foin deside responde ba pedidu baun husi Ministru Interiór Francisco da Costa Guterres, ne’ebé husu atu Komandu Jerál PN TL aprezenta lista membru sira ne’ebé tama ona idade reforma” Segundu Komandante Jerál PNTL Komisaria Asistente Polísia Natércia Eufrazia Soares Martins, hateten hodi responde jornalista sira iha Kuartel Jerál PNTL, Tersa (07/04/2026).

Segundu komandante jerál PNTL hateten, bainhira mak reforma, rekrutamentu foun mós la’o dadaun ona para bele troka sira nia fatin.

Tuir Dekretu-Lei Nú. 35/2024, Estatutu Polísia Nasionál Timor-Leste iha  artigu  63 ko’alia  kona-bá Limite Idade hateten;

Ofisiál diritente no superior sira limite idade tinan-60, Ofisiál subaltern no sarjentu sira limite idade tinan-58 no Ajente sira limite idade tinan-56.

“Ha’u seidauk bele halo komentáriu klaru, tanba ita sei iha hela faze ida halo hela avaliasaun nesesidade ne’e. Maibé depois de remata, ita sei públika sai para nune’e ita ninia públiku mós bele akompaña,” Segundu Komandante Jerál PNTL afirma.

Segundu Komandante Jerál  PNTL ne’e mós seidauk halo komentáriu kona-bá rekrutamentu bainhira mak hahú loke no sá fulan tanba seidauk determina.

“Ida-ne’e mós ha’u seidauk ko’alia ninia ajenda no ninia kalendariu klaru tanba ida-ne’e mós liga mós avaliasaun nesesidade ida-ne’e. Ita-nia esperansa tinan ida ne’e ita tenke halo rekrutamentu foun no ha’u la hateten dehan monu iha fulan saida  no iha loron saida,” Komisária Asistente Polísia Natércia informa.

Nia hatutan, kona-ba komandante jerál nia proposta rekrutamentu 750 ne’e  númeru overall ne’ebé instituisaun PNTL presiza.

Segundu komandante PNTL afirma, nia hanoin númeru ne’e sufisiente para responde nesesidade primaria, nesesidade ida ne’ebé sai prioridade tanba iha tinan ida-ne’e faze preparasaun no tinan oin mai iha eventu lubuk ida mak ita sei hasoru.

“Ita sei enfrenta kampaña no eleisaun jerál sira, ita sei hasoru eventu internasionál sira, entaun ita tenke iha pesoal ne’ebé kapasitadu, pesoal sira ne’ebé preparadu duni atu hasoru eventu sira ne’e, atu nune’e, bele lori kontrola seguransa ne’ebé hakmatek ba ita nia sidadaun no komunidade sira,” Komisária Asistente Polísia Natércia afirma.

Jornalista: Juvinal Cabral dos Santos