Hatutan.com, (07 Abríl 2026), Díli–Komisaun Anti Korrupsaun (CAC-sigla portugés) submete ona kazu fornesimentu  bucket truck unidade tolu (3) iha Eletrisidade Timor-Leste, Empreza Públika (EDTL,E.P)  bá Ministériu Públiku (MP) iha fulan-Fevereiru 2026 tanba CAC identifika iha prosesu ne’e empreza Haksolok Group la prienxe rekizitu balun iha BoQ.  

Lee Mós: Dirijénte EDTL,E.P Kontínua Nonook ho Kazu Karreta Bucket Truck ho Kustu US$216,000.00

Karreta bucket truck ne’ebé empreza Haksolok Group fornese ba EDTL,E.P la tuir espesifikasaun tanba iha BoQ kontempla karreta nia marka Isuzu maibé hatama fali Triton. Foto/EDTL,E.P

Projetu fornesimentu karreta bucket truck unidade tolu (3) ho kustu US$216,000.00 neʼe manan husi empreza fornesidór Haksolok Group la konsege kumpre rekizu balun iha BoQ tanba karreta bucket truck ne’ebé kontempla iha kontratu ne’e karreta ho marka Isuzu, maibé Haksolok Group fonese fali karreta ho marka Triton.

Komisáriu Adjuntu CAC ba asuntu Investigasaun Kriminál, Alvaro Maria Freitas, Tersa (07/04/2026), bá Hatutan.com  liu-husi telefonika konfirma katak  evidénsia ne’ebé  CAC  rekolla no averigua   bá kazu projetu fornesimentu karreta bucket truck unidade tolu (3) bá EDTL,E.P ne’e konklui ona investigasaun  no  submete  ona bá Ministériu Públiku.

“CAC Investigasaun bá Kazu Karreta Bucket Truck EDTL,E.P termina ona ita  haruka ona bá Ministériu Públiku iha fulan-Fevereiru 2026, agora iha ona Ministériu Públiku, sira maka sei kontinua kazu ne’e,  maibé sei sira hakarak delega mai fali CAC, hodi kontinua investigasaun ami hein de’it  delegasaun,” Komisáriu Adjuntu CAC ba asuntu Investigasaun Kriminál, Alvaro Maria Freitas hateten.

Nia dehan,  kazu projetu fornesimentu karreta bucket truck unidade tolu (3) bá EDTL,E.P,  Ministériu Públiku bele delega fila fali bá  CAC hodi kontinua  investigasaun.

Nia  esplika, tuir lei no kompeténsia Ministériu Públiku nian, instituisaun ne’e iha podér atu delega fali bá  CAC hodi halo kontinuasaun ba investigasaun sira ne’ebé la’o hela.  Maibé, iha kazu balun, Ministériu Públiku konsidera katak sira rasik mak iha kapasidade no autoridade atu hala’o investigasaun to’o remata, ho objetivu atu asegura prosesu ne’e la’o ho efisiénsia no tuir prosedimentu legal sira ne’ebé vigora.

Adjuntu Komisáriu CAC ne’e subliña katak kazu projetu fornesimentu karreta bucket truck unidade tolu (3) hatudu ona indikasaun ba krime. Maibé, atu apura loloos faktu sira ne’ebé envolve iha projetu ne’e, presiza hala’o investigasaun ida profunda, ho kolleta evidénsia no analizé tékniku ne’ebé kompletu.

Nia hateten  prosesu investigasaun ne’e importante atu asegura katak desizaun ne’ebé sei foti tuir lei no bazeia ba prova sira ne’ebé klaru, hodi garante transparénsia no responsabilizasaun ba parte hotu-hotu ne’ebé envolve iha kazu refere.

“Tanba kazu projetu fornesimentu karreta bucket truck unidade tolu (3) íha indikasaun bá krime, maibé atu apura loloos presiza investigasaun ida profunda,” nia hateten.

Fó hanoin fali katak projetu fornesimentu karreta bucket truck   unidade tolu (3) ho kustu US$216,000.00 ne’ebé manan husi empreza fornesidór Haksolok Group la konsege kumpre rekizu balun iha BoQ tanba karreta  bucket truck   ne’ebé sitada iha kontratu ne’e karreta ho marka Isuzu, maibé  Haksolok Group fonese fali karreta ho marka Triton.

La’ós ne’e de’it, tuir avaliasaun tékniku sira-nian katak bucket ne’ebé hatuur iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin ka poste eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Tuir fontes balun iha EDTL,E.P ne’ebé husu atu la bele públika nia identidade hateten, karreta bucket truck    ne’e la tuir ona espsifikasaun, maibé tékniku sira ne’ebé envolve iha projetu ne’e asina tiha ona P.O, maske nune’e, Prezidente Konsellu Administrasaun EDTL,E.P, Paulo da Silva, husu parte sira atu haruka fila karreta ne’e ba empreza fornesidór.

Mézmu nune’e, fontes ne’e hateten, Komisáriu Ezekutivu Korporativu (KEK) EDTL,E.P, Júlio de Jesus Gonçalves, ezije ba parte sira administrasaun no finansas atu prosesa lalais ona pagamentu tanba EDTL,E.P simu ona karreta refere no rajaun seluk ne’ebé nu’udár fundamentu Komisáriu Ezekutivu Korporativu, Júlio de Jesus Gonçalves nian katak karreta bucket truck marka Isuzu ne’e difisil tebes atu hetan iha merkadu ho tempu ne’ebé limitadu. 

Pagamentu ba projetu fornesimentu karreta bucket truck unidade tolu ne’e to’o agora sei pendente hela tanba Prezidente Konsellu Administrasaun EDTL,E.P, Paulo da Silva,  husu atu haruka fila karreta ne’e no halo justifikasaun katak karreta ne’e la tuir nia espesifikasaun.

Jornalista: Marcelino Tomae