Hatutan.com, (08 Abríl 2026) Díli– Prezidente Konsellu Administrasaun Eletrisidade Timor-Leste, Empreza Públiku (EDTL,E.P), Paulo da Silva, hasai ona karta hodi devolve fali karreta bucket truck ne’ebé fornese husi empreza vensidór Haksolok Group tanba la prienxe rekizitu balu iha BoQ.

Lee Mós: Projetu Karreta Bucket Truck EDTL,E.P La Kumpre Rekizitu Balu iha BoQ, CAC Submete Ona Bá MP

EDTL,E.P

Informasaun ne’ebé Hatutan.com asesa husi fonte sira EDTL,E.P katak to’o agora EDTL,E.P seidauk halo pagamentu ba empreza fornesidór karreta bucket truck unidade tolu (3) ho kustu projetu US$216,000.00 tanba marka karreta refere la refleta iha pedidu kontratu.

Iha kontratu inisiál hateten karreta bucket truck unidade tolu ne’e tenke marka Isuzu, maibé Haksolok Group fonese fali karreta ho marka Triton.

Bá kestaun ne’e, Kuarta (08/04/2026),  Hatutan.com halo konfirmasaun ho Komisáriu Ezekutivu Korporativu (KEK) EDTL, E.P, Júlio de Jesus Gonçalves, informa projetu fornesimentu karreta bucket truck unidade tolu (3) iha   Kompaña lubun ida mak konkore,  maibé iha kompañia tolu ka haat maka manán, nune’e banhira sira manán sira tenke halo fornesimentu bá estadu tuir sira nia kontratu.

“Banhira empeza  fornese sira-nia sasán bá Estadu ne’e,  maibé  sei halo inspensaun maka foin selu,  agora atu devolve fali ne’e, ita (EDTL,E.P) mós seidauk selu kompaña  oinsá maka atu devolve fali,”  Júlio de Jesus Gonçalves informa.

Kona-bá empreza fornesidór Haksolok Group la konsege kumpre rekizitu balu iha BoQ tanba karreta bucket truck ne’ebé kontempla iha kontratu ne’e karreta ho marka Isuzu, maibé Haksolok Group fonese fali karreta ho marka Triton,  Komisáriu Júlio de Jesus Gonçalves, hateten ekipa   EDTL sei halo inspensaun no prepara relatóriu  hodi haree di’ak.

Nia subliña, tanba iha prosesu fornesimentu ne’e, iha  keixa balu tama, nune’e ekipa EDTL,  sei halo inspensaun hodi haree didi’ak molok atu halo pagamentu.

Komisáriu Ezekutivu Korporativu (KEK) EDTL, E.P, Júlio de Jesus Gonçalves. Foto/EDTL,E.P

Relativa  ho kazu karreta bucket truck EDTL,E.P iha ona Ministériu Públiku, Komisáriu Júlio Gonçalves reazen  katak, ne’e  segredu justisa no Komisaun Anti Korrupsaun  (CAC) maka hatene.

“Husi ami, kuandu parte CAC mai husu dokumentu sira ne’e, ita fó bá sira,  tanba ita kompleta servisu ne’ebé maka ita kolabora, ita kontinua, maibé dehan kazu ne’e iha ona Ministériu Públiku, ami la hatene, ami foin hatene husi ita boot sira,  keta Hatutan.com maka hatene to’o iha ne’ebá karik,” Júlio Gonçalve afirma.

Husi sorin seluk, Hatutan.com tenta atu konfirma  liu-husi  telefonika bá Diretóra Ezekutiva Empreza Haksolok Group, Domingas Maria Fátima Ximenes, kona-bá  despaixu Prezidente Konsellu Administrasaun EDTL,E.P nian hodi devolve karreta bucket truck tolu ne’e ba Haksolok Group, maibé nia seidauk bele komentáriu tanba sei  viajen bá  estranjeiru hodi halo tratamentu saúde.

“Deskulpa ha’u seidauk iha tempu atu ko’alia kona-bá problema ne’e, tanba ha’u sei  bá halo tratamentu saúde,” nia informa hodi kompromete katak iha fulan-Maiu nia laran  maka foin bele halo entrevista ho nia kona-bá  problema projetu fornesimentu  karreta bucket truck unidade tolu (3) bá EDTL,E.P.

Empreza Haksolok Group.

Fó hanoin fali katak Projetu fornesimentu karreta bucket truck   unidade tolu (3) ho kustu US$216,000.00 ne’ebé manan husi empreza fornesidór Haksolok Group la konsege kumpre rekizu balu iha BoQ tanba karreta  bucket truck   ne’ebé sitada iha kontratu ne’e karreta ho marka Isuzu, maibé  Haksolok Group fonese fali karreta ho marka Triton.

La’ós ne’e de’it, tuir avaliasaun tékniku sira-nian katak bucket ne’ebé hatuur iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Tuir fontes balun iha EDTL,E.P ne’ebé husu atu la bele públika nia identidade hateten, karreta bucket truck    ne’e la tuir ona espsifikasaun, maibé tékniku sira ne’ebé envolve iha projetu ne’e asina tiha ona P.O, maske nune’e, Prezidente Konsellu Administrasaun EDTL,E.P, Paulo da Silva, husu parte sira atu haruka fila karreta ne’e ba empreza fornesidór.

Jornalista: Marcelino Tomae