Hatutan.com, (15 Abríl 2026), Díli – Ministru Justisa, Sérgio da Costa Hornai, hatete katak sei buka dalan atu rezolve dezentendimentu ne’ebé mosu entre Komisáriu Komisaun Anti-Korrupsaun (CAC-sigla Protugés)  Rui dos Santos Pereira ho Prokuradór Jerál Repúblika (PGR)  Nelson de Carvalho.

Lee Mós: Deputadu sira Preokupa PGR Avoka Inkéritu Kazu Korupusaun sira iha CAC

Ministru Justisa, Sergio da Costa Hornai. Foto/Zita Menezes

Dezentendimentu   entre  Komisáriu CAC Rui Pereira ho PGR Nelson de Carvalho  mosu hafoin hatun despaisu iha 03 Fevereiru 2026  hodi avoka hotu prosesu inkéritu no investigasaun bá kazu krime korrupsaun sira ne’ebé la’o iha CAC,   konsege influénsia  debate públiku  kona-bá kompeténsia institusional iha área investigasaun kriminál.

Ministru Justisa Sérgio da Costa  Hornai  hateten bá Jornalista sira hafoin remata reuiaun Konsellu Ministru  iha Palasíu Governu, Kuarta (14/04/2026), esplika tuir lei, Ministériu Públiku mak órgaun sentrál ne’ebé iha autoridade atu diriji no komanda prosesu investigasaun kriminál,  tanba  Prokuradór Jerál Repúblika  maka titulár asaun penál, no órgaun polisiál kriminál sira, inklui CAC, hala’o servisu hanesan órgaun koajuvadór.

“Ha’u hanoin ita sei iha meius atu buka solusaun bá dezentendimentu   entre   Prokuradór Jerál ho Komisáriu CAC. Maske iha dezentendimentu balu, ida-ne’e bele ultrapasa,”  Ministru Sérgio Hornai  hateten.

Antigu Komisáriu CAC ne’e hatutan, servisu investigasaun kriminál iha natureza sentrál ida. Titular asaun penál maka Prokuradór Jerál Repúblika, tanba Ministériu Públiku mak komanda órgaun polisiál kriminál sira.

Maske nune’e, Ministru Justisa rekoñese  katak iha dezentendimentu balu ne’ebé mosu entre instituisaun sira. Maibé nia konfiansa katak situasaun ne’e bele rezolve ho diálogu no mekanizmu legál sira ne’ebé iha.

Ministru Justisa hatete katak Prokuradór Jerál Repúblika (PGR) iha kapasidade lejítimu no kompeténsia própriu atu buka solusaun ba problema sira ne’ebé agora dadaun mosu iha Ministériu Públiku   ho Komisaun Anti Korrupsaun.

Nia  subliña katak Komisáriu Komisaun Anti Korrupsaun (CAC), Rui dos Santos Pereira, iha personalidade no kapasidade atu rezolve situasaun ne’ebé mosu entre instituisaun  rua  refere.

“Ha’u haree katak lideransa rua ne’e iha kapasidade atu buka dalan di’ak hodi rezolve problema ne’ebé iha,” dehan Ministru Justisa.

Sérgio Hornai akresenta tan katak  katak Governu, liu husi   Ministériu  justisa, prontu kontribui atu pasifika situasaun bainhira iha nesesidade, hodi asegura estabilidade no funsionamentu normal instituisaun  judisiáriu sira hanesan CAC ho Ministériu Públiku.

Maske nune’e, nia reafirma katak CAC sei kontinua iha kompeténsia legál atu halo prosesu inkéritu no investigasaun ba kazu sira ne’ebé iha indísiu korrupsaun, tuir lei vigora iha paíz   ida-ne’e .

Tuir  nia katak  agora dadauk, Ministériu Públiku sei avoka hela prosesu averiguasaun ,no dilijénsia balun ne’ebé relasiona ho investigasaun sira ne’ebé la’o hela. situasaun ida-ne’e bele mosu tanba kestaun administrativa balun, no governu liu husi Ministériu Justisa sei buka dalan atu halo konsiliasaun entre instituisaun sira ne’ebé envolve.

“Ita haree de’it katak Ministériu Públiku avoka hela prosesu averiguasaun balun ka dilijénsia sira balun ne’ebé halo investigasaun iha ne’ebá. Kestaun administrativa sira sei halo konsiliasaun ba ida-ne’e, atu bele ajusta liután sira-nia kooperasaun ida ne’ebé importante liu entre orgaun polisiál kriminál sira no autoridade sentrál hanesan titulár asaun penál,” hatete  nia

Ministru Sérgio grantia ho  konsiliasaun ida-ne’e,  bele hadia relasaun servisu no aumenta kooperasaun entre Ministériu Públiku ho orgaun sira seluk iha área justisa, hodi asegura prosesu investigasaun krime sira la’o ho efisiénsia no transparénsia.

“Momentu ne’e ita iha  haree de’it maka Ministériu Públiku avoka hela prosesu  averiguasaun balun ka dilijénsia sira  balu ne’ebé maka halo  hela investigasaun iha  ne’ebá, bele kestaun administrativa sira sei halo konsiliasaun bá ida-ne’e para atu bele  ajutas liután sira nia kooperasaun  ida ke mentin liu entre  orgaun posiliál krimininál, no autoridade sentrál nu’udar  titulár asaun penál,” nia tenik.

Jornalista:Marcelino Tomae