Hatutan.com, (20 Abríl 2026), Díli–  Polísia Nasionál Timor-Leste dezmente informasaun ne’ebé publika iha mídia sira katak Xinés na’in-rua ne’ebé Domingu ne’e hal oviajen ho aviaun Citilink nu’udár suspeitu ne’ebé envolve lori osan falsu ba sosa sasan iha Centro Supermerkadu.

Lee Mós: STOP PRESS: Suspeitu Na’in-Rua Lori Osan Falsu Ba Sosa Sasán iha Centro Halai Sai Ona Husi TL

Portavós PNTL, Superintendente Xefe Polísia João Belo dos Reis. Foto/Juvinal Cabral dos Santos

Portavós PNTL,   Superintendente Xefe Polísia João Belo dos Reis, bá Jornalista Segunda (20/04/2026), hateten  prosesu investigasaun bá kazu osan falsu nianhetan ona setensa husi  Tribunál Judisiál Primeira Instánsia Díli (TJPID)  hodi kumprr medida koasaun  prizaun preventiva.

“Suspeitu prinsipál na’in-tolu ne’ebé envolve iha kazu osan falsu ho montante tokon 4-resin USD mak Tribunál aplika ona prizaun preventive no iha mós autór balu iha indentifikasaun nia laran, tanba ne’e suspeitu sira ne’ebé Polísia buka ne’e la inklui Xinés na’in-rua ne’ebé fó sai iha média katak halai tiha ona husi Timor-Leste,” Superintendente Xefe Polísia  João Belo  dos Reis, hateten.

Kona-bá  suspeitu na’in hira maka sei proaesu investigasaun, tuir nia katak,buat ne’ebé iha segredu justisa nia laran, la bele ko’alia sai hotu, sé lae  ema sira ne’e halai hotu.

“Ema lubuk ida maka ita sei investiga, sira ne’ebé maka hatene, sira ne’ebé maka pasa  informasaun ita sei bolu hotu,” nia dehan tan.

Nia subliña, bá autór sirkula  osan falsu ne’ebé  dadaun iha ne’e, la inklui ho sidadaun Xineza na’in-rua ne’ebé Domingu (19/04/2026), halai ona.

“Sira nia oin mak kuaze hanensan, maibé prosesu ne’ebé la’o  sei indentifika sese maka envolve iha kazu osan falsu ne’e,” João Belo dos Reis hateten.

Nia  dehan,  PNTL kontinua aprezenta suspeitu sira hotu ne’ebé envolve iha kazu osan falsu ba Ministériu Públiku atu hasai medadu detensaun no apreensaun.

“Suspeitu sira nia naran iha lista,  ami sei ko’alia, ami sei koordena, komunika bá iha autoridade Migrasaun, para  pelu menus ho situasaun sira hanensan ne’e mai sira impede hodi entrega servisu ne’e bá ami,”  nia dehan.

Nia afirma, iha Mandatu Komandu Jerál PNTL interior nia kada fulan ne’e, halo enkontru ho sidadáun estranjeiru ne’ebé loke negosiu  iha Timor-Leste, hodi hato’o informasaun prevensaun, atu nune’e, sidadaun estranjeiru sira hatene lei hothotu  iha Timor-Leste, hodi prevene aan husi aktu krime orgnanizadu sira.

Fó hanoin fali katak, Informasaun ne’ebé Hatutan.com asesu husi  fontes servisu sekreta haktuir, suspeitu na’in-rua (mesak mane) ho nasionalidade Xina, sai husi Aeroportu Internasionál Prezidente Nicolau Lobato ho aviaun Citilink ho rota Díli-Denpasar,Bali-Indonézia.

Autoridade seguransa sira durante ne’e buka hela supeitu na’in-rua ne’e bazeia ba prova gravasaun CCTV iha Centro Sepermerkadu bainhira sira na’in-rua lori osan falsu ba sosa sasán. Maibé, sira na’in-rua konsege dezvia (subar) husi autoridade seguransa Timor-Leste nian to’o halai sai husi área jurizdisaun Timor-Leste ho aviaun Citilink.

Informasaun husi fontes servisu sekreta ne’e mós konfirma katak oras balun molok aviaun Citilink take-off,  família balun husi arguidu na’in-tolu seluk ne’ebé kumpre ona prizaun preventiva, kontakta ba Polísia hodi informa katak suspeitu na’in-rua ne’ebé lori osan falsu ba sosa sasán iha Centro Supermerkadu iha ona Aeroportu Internasionál Prezidente Nicolau Lobato atu halai.

Rona tiha informasaun ne’e, autoridade seguransa halo esforsu ba halo kapturasaun, maibé bainhira autoridade seguransa sira to’o iha aeroportu, suspeitu na’in-rua ne’e iha tiha ona aviaun laran no kondisaun aviaun mós komesa book aan ona iha pista aeroportu nian atu semo ka take-off.

Informasaun ne’ebé autoridade seguransa sira halibur katak suspeitu na’in-rua ne’e mak lori osan falsu US$100.00 husi totál montante tokon US$4-resin ne’e hodi ba sosa sasán ka halo tranzasaun iha merkadoria.

Iha loron 15 Abríl 2026, Polísia Nasionál Timor-Leste (PNTL) liu husi Diresaun Servisu  Investigasaun Kriminál  (DSIK) ezekuta mandadu buska husi Ministériu Públiku (MP) ba armajen Y&W iha Bidau, Díli, no deskobre osan falsu ho montante tokon US$4 -resin .

Armajen Y&W ne’e lokaliza iha Aldeia Sagrada Família, Suku Bidau Santana, Postu Administrativu Cristo Rei, Munisípiu Díli. Iha prosesu buska no apreensaun ne’e, DSIK detein suspeitu sira nu’udar sidadaun estrenjeiru na’in-haat.

Polísia halo tiha buska no apreensaun ne’e  lori kedas evidénsia  osan falsu no asegura sidadaun estranjeiru na’in-haat nu’udar taballadór  ba loja no armajen  Y&W hodi ba halo indentifikasaun no submete ba investigasaun iha edifísiu Diresaun Servisu Investigasaun Kriminál iha Kuartel Jerál PNTL.

Liuhosi julgamentu primeira interogatóriu iha Tribunál Judisiál Primeira Instánsia Dìli (TJPIS), Sábadu (18/04/2026), Juiza prosesu Ana Palu Fonseca, aplika medida koasaun prizaun preventiva  bá arguidu na’in-tolu  ho naran inisiál  WYF, JT  no  WY   ne’ebé deskonfia envolve iha kazu osan falsu US$100.00 ho total tokon US$4-resin.

Arguidu na’in-tolu ho nasionalidade Xina  ne’e sai hanesan jerente importante iha kompañia Y&W, ho kompozisaun mka hanesan arguida WYF, nu’udar Diretora Ezekutiva, Arguidu JT nu’udar Manejer ho Arguidu WY, nu’udár  xefe armajen.

Jornalista:Marcelino Tomae