Hatutan.com, (23 Abríl 2026), Díli– Fundu Dezemovlimentu Kapitál Umanu (FDCH) sei la devolve ka la reimbolsa osan propinas bá  Jornalista na’in-10 ne’ebé sai hanesan benefisáriu  bolsu estudu Sekretária Estadu Komunikasaun Sosiál  (SEKOMS) ne’ebé halo  estudu iha Universidade Nasionál Timor Lorosa’e (UNTL) iha  Fakuldade Siénsia Sosiál no Polítika (FSSP), Departamentu Komunikasaun Sosiál (DKS).

Lee Mós: FDCH Laiha Koñesimentu Bolsu Estudu SEKOMS Bá Jornalista Na’in-10

Jornalista Hatutan.com halo konfirmasaun ho SEKOMS iha Palásiu Prezidensiál, Kinta (23/04/2026). Foto/supply

Diretór  Fundu Dezenvolvimentu Kapitál Umanu (FDCH), Júlio Aparício bá  Hatutan.com via telefonika, Kinta (23/04/2026) , esplika to’o agora  karta ne’ebé Sekretáriu Estadu Komunikasaun Sosiál (SEKOMS), Expedito Dias Ximenes submete bá Ministériu Planeamentu no Investimentu Estratéjiku (MPIE)  to’o iha FDCH  kona-bá Jornalista na’in-10  eskola iha UNTL,  maibé Jornalista sira-ne’e sira nia dokumentu laiha hotu.

“Jornalista sira nia naran maka iha ne’e, hanesan proposta, maibé dokumentu ida laiha,  nune’e ami la selu  bá estudante Jornalista na’in-10 ne’e, ami só selu ba universidade  ne’e bele tanba FDCH la iha mekanizmu atu  devolve  osan-tahan (cash)   ba estudante sira,” Júlio Aparício informa.

Nia hatutan, jornalista na’in-10 ne’ebé SEKOMS konsidera fasilita bolsu estudu ba sira ne’e  ne’e seidauk iha base legál atu FDCH devolve sira-nia osan durante selu propina  maske SEKOMS, Expedito  Dias Ximenes, ko’alia ona kona-bá asuntu ne’e.

Tuir Júlio Aparício,  prosedimentu  FDCH nian tenke tuir regulamentu ne’ebé iha, la’ós tuir desizaun ema ida-idak nia  vontade.

“FDCH iha regulamentu klaru. Ami labele tuir instituisaun ida nia hakarak. To’o agora ami nunka devolve osan direta ba estudante sira,” nia afirma.

Diretór FDCH lee ona karta ofisiál husi SEKOMS nian  maibé dokumentu ne’e seidauk klaru, tanba ne’e, FDCH sei halo konsultasaun ho asesor jurídiku sira, liu-liu kona-bá fundu operasional antes foti desizaun final.

Husi sorin seluk Sekretáriu Estadu Komunikasaun Sosiál Expedito Dias Ximenes hateten, Jornalista na’in-10 ne’e bele tuir ona aula iha UNTL, no  seluk rasik sira nia propina, tanba SEKOMS konfirma katak nia  halo ona karta ofisiál ida bá MPIE  hodi konsidera jornalista na’in-10 ne’e bolu dehan bolsu parsiál,  ida-ne’e FDCH sei selu de’it sira nia propina,  la’ós Bolsu Estudu, ida-ne’e selu de’it bolsu parsiál.

“Jornalista na’in- 10 ne’ebé agora hetan oportunidade  hodi  Eskola iha Universidade,   sira maka hili, atu iha UNITAL ka UCT,  ka UNTL, ne’e depende sira  maka hili, maibé atu selu sira nia propina ne’e depois  FDCH maka sei selu, maibé bolsu parsiál,” Expedito Ximenes hateten.

Nia akresenta,  FDCH sei presiza verifika liután informasaun husi jornalista na’in-10 refere, tanba evidénsia dokumentál seidauk kompletu.

“Kona-bá osan ne’e iha FDCH, kona-bá eskola ne’e ami servisu hamutuk ho ensinu  Ministériu Ensinu Superior Siénsia Kultura, hanesan ha’u hato’o ona, Ministériu Ensinu Superior Siénsia Kultura maka husu bá ami atu aprezenta Jornalista na’in-10,” nia dehan.

Expedito Ximenes, hateten  Governu liu-husi SEKOMS haruka tiha ona karta ofisiál ba Fundu Dezenvolvimentu Kapital Umanu (FDCH) hodi fasilita prosesu apoiu ba jornalista na’in-10 ne’ebé daudaun hala’o estudu iha Universidade Nasionál Timor Lorosa’e.

Tuir nia ,  karta ofisiál ne’e nia rasik maka asina no entrega ona ba Ministériu Planeamentu no Investimentu Estratéjiku, ne’ebé tutela ba FDCH, simu ona dokumentu refere no agora daudaun hela iha  faze prosesu.

“Ha’u ko’alia ona ho Ministru no Diretór FDCH sira, sira simu tiha ona surat ne’e no agora sira prosesa hela,” dehan Expedito.

Nia esplika,  jornalista sira presiza aprezenta relatóriu ka dokumentu evidénsia, inklui resibu pagamentu propinas,  tanba   sira presiza selu rasik propina, depois mak FDCH sei rembolsa fila.

“Ezemplu jornalista na’in lima ona tama iha prosesu ne’e, sira  tenke  rai resibu hanesan evidénsia,” nia dehan .

Maski nune’e, Expedito  seidauk hatene klaru hotu kona-bá desizaun finál, bá verifikasaun ba lista jornalista na’in-10 ne’ebé submete ona, maibé dokumentu  iha FDCH laiha.

Nia dehan, Jornalista na’in-10 ne’ebé daudaun ne’e halo ona Estudu iha Universidade Nasionál Timor Lorosa’e,  Govenru liu-husi SEKOMS haruka tiha ona karta ofisiál  bá FDCH iha fulan-rua ka fulan-tolu liubá.

Jornalista:Marcelino Tomae