Hatutan.com, (14 Maiu 2026) Díli-Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl “Falur Rate Laek”,  orienta ona ekipa halo investigasaun hodi prosesu ba oin fó sansaun ba ofisiál F-FDTL ho Ofisiál Polísia Suku (OPS) tiru povu nia karau iha lutu laran iha Aldeia Halik, Suku Beco, Postu-Administrativu Suai, Munisípiu Covalima. 

Lee mós: Ministru Interiór Husu Komunidade Halo Keixa Kontra Ofisiál F-FDTL ho OPS Ne’ebé Tiru Povu Nia Karau Iha Aldeia Halik

Xefe Estadu Maiór Jenerál FALINTIL-Forsa Defeza Timor-Leste (F-FDTL) Tenente Jenerál Domingos Raúl “Falur Rate Laek”.

“Prosesu ona, ha’u simu informasaun primeiru hora kedas ha’u iha reuniaun estadu maior jeneral ninian ha’u fó sai kedas sira ba halo investigasaun iha terenu, buka halo relatóriu para prosesu administrativamente,” Tenente Jenerál Domingos Raúl “Falur Rate Laek,  informa ba jornalista sira iha Díli, Kinta(14/05/2026).

Xefe Estadu Maiór Jenerál F-FDTL  ne’e konsidera, membru utiliza armas hodi hamate komunidade sira nia animal haki’ak ida ne’e indisiplina.

“Ami iha ne’e agora  sistema reforsa kontrola arma sira ne’e, sistema ne’e sistema rigirozu, medida fó sai kontrola saida nia tenke aturizasaun buat sira ne’e hotu,” Falur Rate Laek informa.

Xefe Estadu preukupa,  sira ne’ebé badinas depois sira ba iha misaun sira ne’e hotu mak ba hola inisiativa sira iha ne’ebá maibé kastigu ne’e la para rai hela de’it.

“Baibain sansaun ne’e tuir regulamentu interna sira ne’ebé kuandu grave, hahú husi represaun agravada, detensaun agravada depois prosesu disiplinar sa’e tan, depois to’o iha parte ne’ebé mak ba Prizaun ne’e Prizaun ba sira”, Jeneral Falur Rate Laek esplika.

Rekorda fali katak, deskonfia, ofisiál membru FALINTIL-Forsa Defeza Timor-Leste (F-FDTL) hamutuk ho Ofisiál Polísia Suku (OPS) balun tiru  povu nia karau ne’ebé husik hela iha lutu laran iha Aldeia Halik,  Suku Beco, Postu Administrativu  Suai, Munisípiu Covalima.

Akontesimentu ne’e iha Segunda, 11 Maiu 2026, no tuir fontes sira informa katak parte sira ne’ebé tiru povu nia karau ne’e utiliza karreta ho númeru matrikula 211 bainhira husi Maliana hamutuk ho OPS halo operasaun iha Aldeia Halik.

Sasin sira ne’ebé husu atu la bele públika nia identidade tanba kestaun seguransa, haktuir karreta ho numéru matrikula 211 mai husi Maliana tula ofisiál F-FDTL no OPS  tiru povu nia karau iha lutu laran no bainhira komunidade balun hase hodi husu tanbasá tiru karau sira ne’e, membru OPS ne’e (seidauk hetene nia identidade klaru) ameasa hikas komunidade ne’ebé haree atuasaun illegal ne’e tanba tiru povu nia karau haki’ak iha lutu laran.

Informasaun ne’ebé iha katak karau na’in sira hato’o ona keixa no aprezenta mós prova sira ba ona Komandante Jerál Polísia Nasionál Timor-Leste (PNTL), Komisariu Asistente Polísia Afonso dos Santos ho Xefe Estadu Maior Jenerál F-FDTL Tenente Jenerál Domingos Raúl “Falur Rate Laek”.

Joranlista: Juvinal Cabral dos Santos