Hatutan.com, (25 Maiu 2026) Díli– Keixa Eugenio, Segunda (25/05/2026), ba presta deklarasaun iha Polísia Eskuadra Nain Feto, Munisípiu Díli, tanba  lansa postajen  “bandalizmu” iha média sosiál  Facebook ba Sekretariu Estadu Asuntu Toponimia no  Organizasaun Urbana (SEATOU) Germano Santa Bristes Dias.

Eugenio Sarmento ba presta deklarasaun iha Polísia Eskuadra Nain Feto, Díli, Segunda (25/05/2026). Foto/Juvinal Cabral dos Santos

Komandante Operasaun PNTL Munisípiu Díli, Superintendente-Asistente Polísia Luis Amaral, haktuir, autoridade seguransa bolu Eugenio Sarmento tanba hetan keixa husi Sekretáriu Estadu Asuntu Toponimia Organizasaun Urbana (SEATOU) kona-bá deklarasaun iha konta  Facebook Eugenio Sarmento katak hahalok SEATOU bandalizmu.

“Primeiru bazeia ba keixa ne’ebé SEATOU fó, tanba nia halo servisu hodi hapara atividade ne’ebé mak kalan ho múzika ne’ebé lian boot tanba pstajen ne’ebé mak señór Eugénio tau iha média sosiál. Tanba ne’e mak ami bolu atu husu kona-ba postajen ne’ebé nia tau no momentu ne’ebá mós señór Eugénio la iha fatin atuasaun tanba ne’e mak ita bolu atu presta deklarasaun”, Superintendente-Asistente polísia Luis Amaral, informa ba jornalista iha Kuartel Jerál PNTL.

Nia dehan SEATOU ho hahalok bandalizmu, entaun ida-ne’e mak PNTL bolu atu husu tuir nia kronolojia, se nia la satisfaz sei iha dalan seluk atu halo keixa hodi bele haree liután no hadia servisu Estadu nia.

Komandante operasaun Polísia Munisípiu Díli afirma, hanesan autoridade seguransa kuandu pedidu mai Komandu PNTL sira kontinua akompaña no apoiu servisu governu nian iha terrenu.

“Ha’u hanoin Governu durante ne’e buka meiu oin-oin no oinsá atu dezenvolve sidade Dili ne’e furak hanesan Feto-Ran ida oinsá ema hotu fihir hela bá iha buat barak ne’ebé governu halo bá ha’u sempre promove husi ha’u nia pájina Facebook ofisiál ema fahe barak. Maibé iha mós buat balun la di’ak ha’u mós labele nonok sé ha’u nonok ha’u makerek”, Eugenio Sarmento ba jornalista sira hafoin remata presta deklarasaun iha Eskuadra Nain Feto.

Eugenio Sarmento haktuir, lamentasaun ne’ebé nia tau iha nia  pájina  Facebook kona-bá asaun Sekretáriu Estadu Asuntu Toponimia Organizasaun Urbanas (SEATOU) halo ba nia oan feto nia diskoteka “Agua de Coco”  ne’ebé lokaliza iha Formoza nia konsidera atuasaun ilegal la iha notifikasaun.

“Tuir loloos ne’e SEATOU ba bolu ha’u nia mane foun ka oan feto husu lisensa ba sira na’in-rua no aprezenta ka esplika objetivu tama Bar ne’e, la’ós tama bá ho bainaka sira hemu tua rame hela, depois sobu dadauk ona seim iha koñesimentu husi uma na’in ne’e kan bandalizmu ha’u dehan hanesan ne’e duni, tanba karakter bandalizmu hanesan ne’e duni depois seim iha notifikasaun ruma”, Eugenio Sarmento haktuir.

Eugenio Sarmento hateten, tanba saida iha loron ne’e la bá hateten atividade ne’e para ona, tinan kotuk Polísia ba duni dehan hatun volume oituan loos, no uma ne’ebá viziñu la’ós barak hanesan fatin seluk, tanba iha sorin-sorin estrada no kampu demokrasia vizinu iha rua, moru aas, vizinu sé mak telefone halo keixa ba SEATOU , vizinu kalan ne’e mós ba apoiu hotu.

Nia afirma, presta deklarasaun iha Eskuadra Nain Feto tanba ho liafuan ida Bandalizmu, maibé signifika husi ne’e katak bainhira tama uma ida ko’alia uma na’in la’ós ko’alia fali ema sira hemu iha diskoteka ne’e sobu kedas ema nia ekipamentu múzika sira, tanba ida-ne’e mak bolu Bandalizmu.

“Parte ida bandalizmu tanba  ita nia etika la iha hanesan membru governu ida tenke hatudu mós respeitu ba ema kiik sira antes ita  halo asaun”, Eugenio Sarmento rekomenda.

Nia afirma, kona-ba nia postajen  ninja ne’e tanba sira ba uza maskara ida falun oin metin hotu mak akompaña SEATOU hodi sobu ekipamentu múzika nian ne’e objetivu saida, ida ne’e halo ta’uk ema ida ne’e mak tenke tau iha ulun.

“Ha’u nia oan feto mós foin partu fulan rua bainhira sira ba halo asaun tarutu ba mai, ha’u nia oan tanis nune’e telefone ha’u ho lamentavel asustadu tanba ho akontesimentu mosu derepenti ne’ebé la espera”, nia tenik.

Eugenio Sarmento esplika, nia sente kontenti tanba ho Polísia Nasionál Timor-Leste (PNTL) liuhusi Komadante Eskuadra Nain Feto ho membru sira ba nia rezidensia aprezenta uluk objetivu, nune’e nia koopera no bá direta Eskuadra Nain Feto hodi presta deklarasaun.

Tuir informasaun ne’ebé Hatutan.com asesu,  Sesta (22/05/2026) ekipa konjunta ne’ebé lidera husi Sekretáriu Estadu Asuntu Toponimia Organizasaun Urbanas (SEATOU) Germano Santa Brites Dias, akompaña husi PNTL halo operasaun hodi prende ekipamentu live múzika ne’ebé organiza husi HENEIKEN iha loja Divaria área Santa Cruz, no kontinua kedas  hale’u tuku 11:30 Otl liu ekipa konjunta  tama diskoteka Agua de Coco ne’ebé lokaliza iha Formoza hodi foti ekipamentu múzika tanba hetan keixa husi komunidade balun.

Hatama Keixa ba MP Kontra SEATOU

“Ami mós halo keixa ba Tribunál la’ós de’it bolu ha’u mai hatan iha polísia, la’ós ami mesak mak hatan ne’e lae, ami mós prepara tiha ona karta ba iha Ministériu Públiku (MP) tanba ita ne’e iha Leí”, Eugenio Sarmento hateten ba joranlista sira iha hafoin remata presta deklarasaun iha Eskuadra Nain Feto.

Eugenio rekoñese, nia sala mak la halo karta ida ba Sekretariu Estadu Asuntu Toponimia Organizasaun Urbanas (SEATOU), maibé públika informasaun iha pájina Facebook.

“Ha’u nia esperiénsia tinan 45 nia laran iha servisu, ita kuandu halo karta hanesan ne’e dalaruma mós SEATOU tempu la iha la lee entaun ita halo postajen iha Facebook ne’e la’ós atu odiu fali partikular ka saida. Ha’u orgullu señór SEATOU ema ida ne’ebé tegas halo buat hotu mais iha sala ita tenke hadia ida-ne’e mak ha’u nia objetivu”, Eugenio hateten.

Joranlista: Juvinal Cabral dos Santos