Hatutan.com, (29  Maiu 2026) Díli– Polísia Sientífika no Investigasaun Kriminál (PCIC-sigla portugés) ho ekipa Servisu Nasionál  Intelijénsia (SNI) detein membru Igreja Katólika Karismatika Timor-Leste (ICCTL, sigla portugés)  na’in-rua ne’ebé deskonfia utiliza konta Facebook “Rinha Costa” hodi insulta no injúria bá Arsebispu Arkidiosese Metropolitana Díli, Dom Virgílio Kardeál do Carmo da Silva, SDB no Bispu Dioseze Baucau, Dom Leandro Mari Alves iha média sosial.

Diretór Nasionál PCIC Vicente Fernandes e Brito lori suspeitu na’in-rua husi ICCTL aprezenta ba Dom Virgílio Kardeal do Carmo da Silva, SDB hodi husu perdaun ba sira-nia hahalok utiliza konta Facebook “Rinha Costa” halo injuria ba Kardeál ho Bispu sira. Foto/Juvinal Cabral dos Santos

Informasaun ne’ebé Hatutan.com asesu husi fontes servisu sekreta, Sesta (29/05/2026), konfirma katak  iha Kinta, 28 Maiu 2026, hale’u tuku 19:00 Otl, PCIC  hamutuk ho SNI detein ona suspeitu ne’ebé utiliza konta Facebook “Rinha Costa” hodi halo injúria no insulta ba Kardeál no Bispu sira.

“PCIC ho SNI detein ona suspeitu ne’ebé utiliza konta Facebook “Rinha Costa” ne’ebé halo injúria (insulta ka tolok) Kardeál no bispu sira,” fontes PCIC ne’e hateten.

Iha Sesta (29/05/2026), hale’u tuku 16:30 Otl,  PCIC   akompaña suspeitu  na’in-rua husi ICCTL lori ba rezidénsia Dom Virgílio Kardeál do Carmo da Silva, SDB   nian  iha Lecidere ho objetivu atu husu perdaun diretamente bá lider relijiozu sira ne’ebé hetan ofensa.

Observasaun Hatutan.com iha rejidénsia Dom Virgílio Kardeal do Carmo da Silva nian iha  Lecidere, hatudu katak Diretór  Nasionál PCIC Vicente Fernandes e Brito, no  ekipa ivestigadór husi PCIC  aprezenta ona autór na’in-rua bá Dom Virgílio Kardeál do Carmo da Silva, SDB.

Jormalista: Marcelino Tomae