Hatutan.com, (01 Juñu 2026) Díli-Tribunal Judisiál Primeira Instánsia Díli (TJPID), Segunda  (01/06/2026), hatun despaixu  aplika medida koasaun prizaun preventiva ba arguidu na’in-rua ho inisiál ASP ho JPX no arguidu ho inisiál CSP  aprezentasaun períodika.

Lee Mós: Polísia Hein Mandadu Tribunál Kaptura Suspeitu Oho Constâncio Saldanha Bere Iha Bidau

Arguidu na’in-rua kumpre prizaun preventiva. Foto/Juvinal Cabral dos Santos

Arguidu na’in-tolu ne’e deskofia envolve iha kazu omesídiu ne’ebé  rezulta  Constâncio Saldanha Bere lakon vida iha Aldeia Toko Baru 2, Suku  KuluHun, Postu-Administrativu Cristo Rei, Munisípiu Díli, Sesta madrugada, 20 Maiu 2026.

“Despaixu Tribunál nian ba ha’u nia asistidu na’in-tolu;  na’in-ida hetan Aprezentasaun Períodika, no na’in-rua hetan prizaun preventiva,” Advogado Privadu Americo Martins ne’ebé fó asistensia legá ba arguidu sira haktuir ba jornalista sira iha Tribunál Judisiál Primeira Instansia Díli (TJPID).

Tuir promosaun Ministériu Públiku nian ba faktus ne’e sira laiha koñesimentu no arguidu sira nega no lahatene buat ida no krime tentativa ho suisilo armas brankas ne’ebé MP imputa mós arguido sira lahatene.

Advogadu haktuir, bazeia ba deklarasaun ne’ebé mak sira fó perante ba tribunal, nu’udar defeza sei halo rekursu hasoru despaixu tribunál nian, tanba nia klienta sira nega la involve iha kazu omesidu hamate matebian Constâncio Saldanha Bere.

Nia dehan, durante prosesu primeiru interogatóriu, arguidu sira deklara katak, sira la iha koñesimentu saida mak akontese ba matebian Constâncio Saldanha Bere.

Antes ne’e Arguidu na’in-tolu ne’ebé autoridade seguransa aprezenta iha  primeira interogatóriu iha TJPID ne’e  ho naran inisiál, ASP, JPX ho CSP. Kazu ne’e Ministériu Públiku reprezenta husi Prokuradór Pedro Baptista promove ho krime rua ba arguidu na’in-tolu, mak krime omisidiu simples ne’ebé previstu iha artigu 138° husi Kodigu Penál Timor-Leste no krime arma branka iha lei númeru 5/2017.

Julgamentu primeiru interogatóriu ne’e prezide husi Juiza  Jumiati Freitas, Ministeriu Públiku reprezenta husi Prokuradór Pedro Baptista no arguidu sira hetan asisténsia legál husi advogadu privadu, Americo Martins.

Jornalista: Juvinal Cabral dos Santos