Hatutan.com, (02 Juñu 2026) Díli-Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK), Tersa (02/06/2026), ezekuta  Mandadu Buska Domisiíliu no Apreensaun husi Tribunal Judisiál Primeira Instánsia Díli (TJPID) hodi halo apreensaun ba karreta Triton ida ne’ebé pesoal Autoridade Alfándega sira prende iha tinan 2024  no asegura iha Portu Tibar.

Karreta ho marka Triton ne’ebé autoridade sira halo apreensaun iha Portu Tibar, Tersa (02/06/2026). Foto/Juvinal Cabral dos Santos

Fontes servisu sekreta ba  Hatutan.com informa Tersa-ne’e, hale’u tuku 11:08 Otl, ekipa Diresaun Servisu Investigasaun Kriminál (DSIK) ezekuta mandadu buska domisíliu no prende sasán ho prosesu NUK: 0066/26.PNSIC ba suspeitu RX nia edefisiu iha Portu Tibar, Aldeia Turleu, Suku Tibar, Postu-Administrativu Bazartete, Munisipiu Liquiça, relasiona ho krime  Abuzu de Poder Art. 297° Kódigu-Penál, no Administrasaun Danoza Art. 274° Kódigu-Penál.

Objetu ne’ebé  autoridade sira halo aprensaun mak karreta marka  Triton Kor Mutin kahor Mean ida, Númeru Chassis: MMAZLKL10NH021125, Númeru motór: 4N15UHY0102 ho Xave kareta ida. Ezekusaun Mandadu ne’e la’o-di’ak no suspeitu mós hetan mandadu-orijinal ne’ebé sertifika ona.

Antes ne’e mós  iha Kuarta 25 Marsu 2026,  hale’u 09:30 Otl  PNTL liuhusi DSIK ezekuta Mandadu Buska Domisíliu no Apreensaun husi TJPID ho Nuk: 0066/26.PNSIC  iha Portu Tibar, operasaun ne’e hodi foti evidensia karreta neen (6) ne’ebé relasionadu ho kazu kriminál.

Autoridade sira  kumprimenta no prezente Mandadu Buska Domisíliu no Apreensaun ho prosesu NUK: 0066/26.PNSIC ba suspeitu, no halo apreensaun ba evidénsia karreta antes ne’e foti neen (6) no ohin foti tan ida (1) hamutuk hitu (7) iha Portu Tibar.

Kazu ne’e deskonfia mosu irregularidade iha Portu Tibar ne’ebé involve mós husi funsionáriu RX servisu iha Alfándega.

Fontes servisu sekreta ne’e informa mós karreta neen (6) ne’ebé mak antes ne’e foti uluk ona katak, despaixu husi Tribunál karreta ne’e entrega hikas ona ba na’in  ka ofendida Cesaltina Tilman foti hadi’a hotu ona hein xapa matrikula husi Diresaun Nasionál Transporte Terrestre (DNTT) hodi bele fa’an ona.

Jornalista: Juvinal Cabral dos Santos