Hatutan.com, (23 Juñu 2026) Lisboa— Primeiru Ministru Kay Rala Xanana hamutku ho   lider sira hosi Komunidade Nasaun Sira Lían Portugés (CPLP) presta omenajen no hato’o sentidu respeitu bá saudozu eis-Prezidente Repúblika Timor-Leste, Francisco Guterres Lú-Olo, ne’ebé fila ona bá Aman Maromak Nia Kadunan Santu.

PM Xanana hamutuk ho lider sira CPLP presta omenajen ba maktoban Francisco Guterres “Lú-Olo”. Foto/Espesiál

Komunikadu  ne’ebé Hatutan.com asesa, Tersa (23/06/2026), haktuir, omenajen ne’e realiza antes hahú reuniaun durante vizita kortezia Primeiru-Ministru Timor-Leste, Kay Rala Xanana Gusmão, bá Sekretariadu Ezekutivu CPLP, iha Rua de São Mamede 21, Lisboa.

Molok hahú enkontru formál, Sekretária Ezekutiva CPLP no embaixadora Angolana, Maria de Fátima Monteiro Jardim konvida partisipante sira hamrik no halo minutus respeitu ida bá eis Xefe Estadu Timor-Leste ne’ebé durante nia lideransa kontribui mós bá fortalesimentu relasaun entre Timor-Leste ho komunidade luzófona.

Iha oportunidade ne’e, líder sira CPLP nian hato’o sentidu solidariedade no konsiderasaun bá povu Timor-Leste no família enlutada, rekoñese Francisco Guterres Lu-Olo nu’udár líder ida ne’ebé dedika nia-an bá servisu públiku no dezenvolvimentu nasaun.

Vizita Primeiru-Ministru bá Sekretariadu Ezekutivu CPLP realiza iha kontestu hametin kooperasaun no relasaun entre Timor-Leste ho organizasaun luzófona ne’e.

Iha vizita ne’e, Primeiru-Ministru Xanana Gusmão akompaña hosi Ministru Justisa, Sérgio da Costa Hornai; Ministra Edukasaun, Dulce de Jesus Soares; Embaixadora Timor-Leste bá CPLP, Natália Carrascalão; Xefe Gabinete Primeiru-Ministru, Elizabeth Exposto; no Inês Araújo Gonçalves.

Jornalista:Marcelino Tomae