Hatutan.com, (8 Jullu 2026), Díli – Ministru Interiór  (MI) Francisco da Costa Guterres,  garante  sidadaun Indonézia na’i- tolu ne’ebé tama no sai husi Timor-Leste hodi hamosu polémika ho prezensa  Jet Privadu  ho tipu Cesna C700 sei bolu fila mai Timor-Leste banhira rezultadu investigasaun hatudu katak,  iha ligasaun ho atividade   ilísitiu scam call centre.

Lee Mós: Polémika Jet Privadu Cesna C700, Jetrans Koordena no Komunika Ofisiál ho MNEK

Ministru Interiór Francisco da Costa Guterres. Foto/Juvinal Cabral dos Santos

Ministru Interiór Francisco da Costa Guterres hatete bá  Hatutan.com hafoin reuniaun konsellu Ministru iha Palásiu Governu, Kuarta (08/07/2026),  hateten katak to’o agora autoridade seidauk estabelese ligasaun direta entre sidadaun na’in-tolu ne’e ho atividade kriminál ruma. Tanba ne’e, autoridade husik sira fila bá Indonézia, maibé investigasaun kontinua la’o.

“Ita seidauk estabelese ligasaun iha ita nia investigasaun entre Migrasaun ho ema sira ne’e. Entaun ita husik sidadaun Indonézia na’in-tolu fila, inklui autoriza haruka fila Jet privadu ne’e,  mas bainhira prosesu investigasaun hatudu katak ema na’in-tolu ne’e envolve duni iha scam call centre ka jogu ilísitu online, ita sei bolu sira fila-fali,” Ministru Interiór ne’e hateten.

Membru  Governu ne’e hatutan,  suspeita de’it la sufisiente atu determina ema ida nia involvimentu iha krime  tanba ne’e  tenke bazeia bá evidénsia no faktu sira ne’ebé hetan durante investigasaun.

“Dala ruma ita desfkofia de’it, mais ita la hatene sira ne’e, no ivestigasaun ne’e mai katak ema  sira ne’e laiha,” nia  dehan .

Kona-bá pedidu husi empreza Jetrans ne’ebé hatudu katak pasajeiru sira hanesan bainaka Prezidente Repúblika, Ministru Interiór subliña  katak, dokumentu ne’e tama liu husi Ministériu Negósiu Estranjeiru no Kooperasaun (MNEK).

Tanba informasaun ne’e, Migrasaun hamutuk ho polísia investigadór sira halo intervensaun atu hapara Jet Privadu ho tipu Cesna C700 hodi halo verifikasaun no investigasaun.

Nia haktuir, molok autoriza aviaun ne’e fila ba Indonézia, autoridade Timor-Leste halo ona koordenasaun ho autoridade seguransa Indonézia. Kooperasaun ne’e importante atu fasilita prosesu investigasaun karik iha evidénsia foun mosu.

“Investigasaun kontinua la’o nafatin. Bainhira rezultadu investigasaun  hatudu faktu sira ne’ebé liga ema ruma ho kazu ne’e, ita bele husu autoridade seguransa Indonézia atu lori ema sira ne’e fila mai atu responde ba investigasaun,” dehan Ministru Interior.

Nia dehan tan,  Migrasaun rasik maka husu bá Autoridade Aviasaun Sivil Timor-Leste (AACTL) atu hapara temporariamente aviaun ne’e atu permite autoridade sira halo investigasaun didi’ak molok autoriza aviaun ne’e fila .

Nia  dehan,  sidadaun na’in tolu ne’ebé maka  servisu Migrasaun husik  tanba  halo komunikasaun ho Ministériu Públiku, PCIC, katak ema sira ne’e laiha ligasaun ho ema sira ne’e laiha ligasaun ho jogu Online Scam Call Centre iha Tibar.

“La’ós husik tanba Migrasaun maka hakarak, maibé Migrasaun hatene, nune’e, ikus ko’alia ho sidadaun na’in tolu ne’e, ko’alia ho Embaixada Indonézia , no mós  adidu Migrasaun Indonézia ninia  hodi bele intende sidadaun sira ne’e, sése maka sei  iha ne’ebá,” nia dehan.

Jornalista: Marcelino Tomae