Hatutan.com, (11 Setembru 2026), Díli—Ekonomista Timor-oan, Rui Gomes sujere ba Governu atu halo supervizaun ka kontrola presu kombustível sira iha merkadu nasionál tanba presu kombustível seidauk hatudu redusaun maski Governu aprova ona fundu subsidiu ba importasaun kombustível.

Atividade Estasaun Kombustível balun iha Díli. Foto/Dok. Hatutan.com

“Ha’u rasik seidauk komprende tansá presu sei aas, dala barak ba iha estasaun kombustível sira ne’e, ha’u husu ba sira simu ona subsidiu ruma husi Governu ka lae. Tanba ne’e maka presu sira sei aas nafatin,” antigu Ministru Finansas, Rui Gomes, haktuir bainhira sai oradór iha lansamentu relatóriu Banku Sentral Timor-Leste (BCTL) 2026 iha Salaun Instituto of Business (IOB), Kinta (10/09/2026).

Rui Gomes husu Governu atu konsidera mekanizmu subsidiu ne’ebé diretamente to’o ba konsumidor sira, duke fó de’it ba kompañia importadór kombustível, no  bazeia ba esperiénsia durante nia mandatu  hanesan Ministru Finansas uluk, subsidiu ne’ebé fó diretamente ba konsumidor bele ajuda proteje povu, liuliu sira ne’ebé depende ba transporte terrestre, tantu privadu no públiku.

Nia subliña katak aumentu ki’ik iha presu kombustível bele hamosu impaktu boot ba família sira ho rendimentu ki’ik, inklui ema ne’ebé uza mikrolete atu halo atividade loro-loron.

“Ba sira ne’ebé iha klase média, aumentu 0,5 sentavu ka 0,10 sentavu bele haree hanesan buat ki’ik. Maibé, ba sira ne’ebé uza mikrolete, lorloron lori oan ba eskola, ka tula paun atu fa’an, sira sente tebes impaktu ne’e,”  Rui Gomes hateten.

Rui Gomes hatutan Timor-Leste sei enfrenta limitasaun atu kontrola presu sasan iha merkadu, tanba nasaun ne’e depende barak ba produtu importadu.

Tuir nia, Governu atualmente uza fundu mina-rai atu ajuda hamenus impaktu husi presu kombustível, maibé instrumentu ne’e de’it la sufisiente atu garante estabilizasaun presu iha merkadu. Tanba ne’e,  Governu tenke uza nia instrumentu fiskál atu bele proteje konsumidor sira.

Antes ne’e, Governu aprova iha Konsellu Ministru alokasaun subsidiu ho montante millaun US$186 ba kompañia importadór kombustível Esperança Timor Oan (ETO) atu bele garante estoke kombustivel nasionál perante impaktu global husi funu iha Médiu Oriente. (*)