Jornalista: Maria Angelita Sandi Belo

Hatutan.com, (30 setembru 2026), Díli- iha Janeiru 2027, Prezidente Repúblika José Ramos-Horta sei dekreta kalendáriu eleisaun prezidensiál períodu 2027-2032.

Ministru Administrasaun Estatál Tomas do Rosário Cabral. Foto/espesiál

“Prezidente ko’alia ona sei hala’o eleisaun iha Marsu 2027, faze daruak iha fulan-Abríl no prezidente foun sei iha fulan ida atu prepra nia relatóriu, normalmente Janeiru hanesan ne’e dekretu bele sai no  marka eleisaun ne’e monu iha loron Domingu, sei ko’alia ho Igreja,  ita marka eleisaun iha loron sábadu ita nia maluk sira iha rai-li’ur sira labele vota, hanesan sira iha Englatera, Irlandia, Austrália, sira hili ba servisu duke sira ba vota, nune’e Janeiru mak foin Prezidente dekreta,” Ministru Administrasaun Estatál, Tómas do Rosario Cabral ba jornalista sira hafoin  reuniaun Konsellu Ministru iha Palásiu Governu, Kuarta (30/09/2026).

Kalendáriu ba resenseamentu ba rai-li’ur ne’e sei públika iha Jornál Repúblika, Sekretariadu Téknuku Administrasaun Eleitorál (STAE sigla portugés) sei prepara programa depois Ministériu Negosiu Estranjeiru no Kooperasaun (MNEC sigla portugés) haree oinsá bá halo resenseamentu iha rai-li’ur inklui Indonézia, ba sira iha Atambua fila mai sira nia Munisípiu hodi bele vota.   

“STAE mak prepara mákina hotu, agora ita resensia biométriku ita iha númeru resensaun ne’e 23%, ema ne’ebé mate tiha ona la atualiza, ema muda hela fatin la atualiza no agora resenseamentu biométriku ne’e sese de’it mak la ba atualiza nia kartaun sei lakon direitu votus tanbá lista sei la sai,” Ministru Tomas Cabral esplika. 

Nune’e ba se de’it mak servisu iha Díli periodu ida ne’e troka kartaun evita ba vota iha foho, depois eleisaun prezidensiáis, sei iha eleisaun Munisípiu nune’e durante eleisaun Munisípiu la’o ema labele muda ba mai, tanba lista ba asembleia Munisipál husi rezultadu totál eleitór kada Munisípiu. 

STAE ne’e institutu públiku sira iha autonomia rasik depois kalendariu bá resenseamentu atualizasaun ne’e sai tiha sira sei fó sai iha rádiu, televizaun no media sosiál ema hotu bele hatene ida ne’ebé mak sentru atualizasaun resensamentu.

“Ami hasoru ona Prezidente Repúblika no prezidente Repúblika komunika ho Primeiru Ministru hein hela kalendáriu resenseamentu sai uluk lai,” Tomas Cabral konklui. (*)