Jornalista: Felix Fernandes

 Hatutan.com, (03  outubru 2026) Díli- Tribunál Judisiál Primeira Instánsia Díli (TJPID) liberta hikas arguidu  ho inisiál RdC husi krime  burla agravadu tanba  konsidera  detensaun ne’ebé halo husi Polísia Nasionál Timor-Leste (PNTL) liu husi Diresaun  Servisu Investigasaun Kriminál (DSIC)  ba arguidu illegal ka la refleta rekizitu flagante delitu.

Tribunál liberta arguidu RdC tanba konsidera detensaun ba arguidu ilegál. Foto/Felix Fernandes

Iha Kuata-feira liubá, 30 fulan-Setembru, Polísia Nasionál Timor-Leste  liu husi  Diresaun  Servisu Investigasaun Kriminál detein arguidu iha fatin jogu kasino iha Timor plaza tanba deskomfia sai broker iha Sekretária Estadu Formasaun Profesionál no Empregu (SEFOPE) hodi bosok Timor-oan na’in-28 fó dokumentu pasaporte ho osan ba nia ho kompromisu atu fasilita sira bá servisu iha Austrália liu husi sitema SEFOPE nian.

Liu husi julgamentu primeiru interogatóriu iha TJPID, Sábadu (03/10/2026),  prokurador  Matias Soares ne’ebé  reprezenta Ministériu Públiku akuza arguidu RdC ho krime burla agravadu.

Advogada privada Elizabet Rosa da Rosa da Costa Lopes ho Advogadu Jorge Sabes Victor ne’ebé fó asisténsia legal ba arguidu RdC invoka rekerementu bá tribunál hodi  liberta arguidu husi krime burla agravadu tanba  konsidera detensaun autoridade polísial   bá  sira  nia kliente ilegál no fora husi flaglante delitu.

Juiza prosesu Maria da Silva intende katak arguidu RdC hetan detensaun ilegál husi autoridade polísia sira, nune’e  deside liberta husi krime burla agravadu.

Maske nune’e Prokuradór titular Matias Soares la aseita ho desizaun tribunál, nune’e sei rekore rekursu hodi kontra desizaun refere.

“Ohin ne’e iha primeiru interogátoriu judisial nian ne’e tanba husi ami defeza entende katak husi detensaun ne’ebé  mak halo ne’e ilegal tanba fora husi  flaglante delitu  la’ós  mandadu detensaun ruma,” advogada Elizabet Rosa da Rosa da Costa Lopes haktuir.

Advogada ne’e hatutan tan katak, sira-nia parte hanesan defeza mós aprezenta libertasaun imediata tanba detensaun ba nia kliente ho inisiál RdC la priense rekizitu sira  ka la tuir prosedimentu nebe mak iha tanba ne’e tribunal deside halo libertasaun imediata. (*)