Editór: Felix Fernandes  

Hatutan.com (9 Outubru 2026), Atambua—Tentara Nasionál Indonézia (TNI, sigla indonézia) husi Unidade Seguransa Fronteira (Satgas Pamtas) RI – RDTL Setór Lorosa’e susesu hapara tentativa hatama gazóleu tonelada haat (4) mai Timor-Leste liu husi dalan tikus.

Unidade Seguransa Fronteira-TNI (Satgas Pamtas) RI – RDTL Setór Lorosa’e susesu hapara tentativa hatama gasóleo tonelada haat (4) mai Timor-Leste liu husi dalan tikus. Foto/supply

Kontribuidór Hatutan.com husi Atambua, Distritu Belu, Provinsia Nusa Tenggara Timur (NTT)-Indonézia, informa katak Komandante Satgas (Dansatgas) Pamtas RI-RDTL Setór Lorosa’e, Letkol Arh Rudi Afrika, konfirma susesu ida-ne’e hanesan parte husi kompromisu Satgas nian hodi kontrola fali seguransa iha área fronteira terrestre RI-RDTL.

Operasaun ne’e hahú bainhira pesoál sira hala’o patrulla kalan-kalan no deteta movimentu ne’ebé deskonfia iha dalan illegal  (dalan tikus) besik área fronteira.

Bainhira halo persegisaun  iha operasaun rutina ne’e, parte Unidade Seguransa Fronteira RI-RDTL identifika ema deskoñsidu sira  lori gazóleu maibé sira konsege halai lakon no soe hela evidénsia sira ne’ebé ho intensaun atu hatama illegal ba teritóriu Timor-Leste.

“Ami-nia servisu báziku mak atu proteje soberania nasaun nian, maibé liután ne’e ami mós halo prevensaun ba kualkér asaun ne’ebé kontra bandu, inklui movimentu ilegal hanesan ida-ne’e,” Letkol Arh Rudi Afrika haktuir ba jornalista sira, Sesta (9/10/2026).

Asaun hapara atividade kontra bandu ne’e hahú husi informasaun  komunidade nian kona-bá atividade ilegalu. Ho nune’e, ekipa ida hala’o patrolla kalan-kalan ne’ebé envolve forsa na’in neen (6) kada agrupamentu hodi buka tuir no deteta atividade kontra bandu sira-ne’e.

Hale’u tuku 00.45 oras indonézia nian, pesoál sira konsege deteta jeriken hamutuk 27 ho kuantidade litru 35 nian ne’ebé nakonu ho gazóleu, ne’ebé planeia ona atu hatama ho modu ilegal ba Timor-Leste.

“Ami sei kontinua intensifika patrollamentu no kontrolu iha área fronteira, no mós foti asaun tuir prosedimentu hodi prevene atividade kontra bandu no proteje seguransa komunidade nian,” Letkol Arh Rudi Afrika afirma.

Nia mós fó énfaze katak importante tebes nafatin halo investigasaun kle’an ba buat ne’ebé hetan ona ne’e, atu bele simu informasaun ne’ebé loos liután kona-bá orijen husi gazólu sira ne’e, no mós atu identifika sé-sé de’it mak deskonfia involve an.

To’o agora, identidade husi ema ne’ebé halai lakon ne’e, inklui mós parte sira ne’ebé deskonfia nu’udar na’in, ba gazóleu tonelada haart ne’e seidauk identifika, tanba ne’e presiza pasu tuir mai no koordenasaun ho instituisaun relevante sira.

Satgas Pamtas RI-RDTL Setór Lorosa’e Yonarhanud 14/PWY sei intensifika liután patrollamentu, halo mapeamentu, no monitorizasaun ba dalan sira ne’ebé konsidera illegal  ne’ebé fasil tebes atu uza ba atividade kontra bandu. (*)