Hatutan.com, (22 Setembru 2022), Díli– Servisu Informasaun Polísia (SIP), Komandu Polísia Nasionál Timor-Leste (PNTL), Kinta (22/09/2022), hale’u tuku 10:00 Otl, halo apreensaun bá karreta kamioneta tolu ne’ebé tama hosi Indonézia mai transporta sasán mekadoria.

Lee Mós : Deskobre fukun-sira fó espasu ba pasajen ilegál buras iha fronteira

PNTL Halo Apreensaun bá Kamioneta Tolu Hosi Indonézia Tula Sasán Merkadoria. Foto/Elio dos Santos da Costa

Servisu Informasaun Polísia akompaña movimentu karreta kamioneta tolu xapa mátrikula DH:85.14, DH:84.36 no DH:81.32 mai hosi fronteira Motain, Munisípiu Bobonaro deskonfia hasees-an selu impostu bá Autoridade iha liña fronteira.

Liuhusi konferensia imprensa Sesta  (23/09/2022), iha Kuartél Jerál PNTL, portavós Komandu PNTL, Superintendente Xefe Armando Monteiro  hateten, aktu hasees-an hosi autoridade sira iha fronteira, maka autoridade seguransa liuhosi SIP akompaña hafoin to’o iha Díli halo apreensaun.

“Hafoin halo aprensaun, Servisu Investigasaun Kriminal Nasional (SIKN) halo enkontru urjente ida ho ita-nia Autoridade servisu iha Postu Integradu Liña fronteira nian no  Sesta (23/09/2022), SIKN kontinua ho kareta no sasan na’in, sasan hirak ne’ebe halo apreensaun, ita halo kontajen no hosi kontajen ida ne’e maka 20% tuir faktura ne’ebe maka selu impostu bá iha ita nia autoridade iha fronteira no 80% dezvia tiha selu impostu bá Estadu,”  Armando Monteiro hateten.

SIKN kontinua halo prosesu bá kazu ida ne’e no tuir ajenda Sábadu (24/09/2022),  sei aprezenta bá Ministeriu Públiku (MP) nu’udar nain ba Prosesual nian.

“Sasán hirak ne’ebe tuir dalan legal 20% ohin kedas ita entrega ona bá sasan nain no sasan hirak ne’ebe la tuir dalan legal 80%  ita aprezenta bá MP nu’udár titulár bá prosesual, bá ema hirak ne’ebe maka importa sasán la tuir dalan legal, ita konsidera hanesan deskamiñu ida, tenta hasees-an hosi autoridade hodi la selu impostu,” Armando Monteiro afirma.

Hatán kona-bá, tansá mak sasán sira-ne’e tama tiha hosi fronteira to’o tiha iha Díli mak PNTL foin identifika, karik kontrolu iha fronteira mak ladun másimu ka oinsá, portavós PNTL ne’e lia tun dehan, tanba preukupasaun ida-ne’e mak horseik kedan, sira halo reuniaun koordenasaun urjénsia, oinsá atu bele intensiva sistema kontrolu, hodi nune’e, sasán hirak ne’ebé tama mai tenke liuhosi prosesu legál.

PNTL Halo Apreensaun bá Kamioneta hosi Indonézia. Foto/Elio dos Santos da Costa

“Labele viola ita-nia regras ka ita nia-lei ne’ebé  vigóra. Maibé, sasán ho 20% ne’ebé mak tuir dalan legál, ita sei entrega sasán ne’e, ohin kedas ba sasán na’in no 80% ida-ne’e, ita aprezenta bá Ministériu públiku, nu’udár titulár bá prosesál,” Armando Monteiro esplika.

Ho aktu dezvizasaun hosi sasán na’in ne’e, komandu PNTL konsidera hanesan deskamiñu ida, tanba tenta hasees-aan hosi autoridade sira iha fronteira, hodi la selu impostu.

Bá oin, Komandu PNTL, sei kontinua halo koordenasaun no komunikasaun entre instituisaun sira iha liña fronteira, nune’e mós iha nivel postu integradu sira, nivel sira tátika nian iha área fronteira terrestre hanesan Mota-masin, Batugade, no mós iha Sakato, Oé-Cusse hodi evita atividade trasasaun ilegál.

Jornalista: Rogério Pereira Cárceres