Hatutan.com, (29 Setembru 2022), Díli—Prezidente Repúblika (PR), José Ramos-Horta hamutuk ho Governadór Nusa Tenggara Timur (NTT) Viktor Laiskodat ho ekipa prezidensiál Indonézia, diskute Kriasaun Zona Komérsiu Livre no Parke Industriál iha Fronteira Timor-Leste ho Indonézia.

Prezidente Repúblika (PR), José Ramos-Horta hamutuk ho Governadór Nusa Tenggara Timur (NTT) Viktor Laiskodat ho ekipa prezidensiál Indonézia, diskute Kriasaun Zona Komérsiu Livre no Parke Industriál iha Fronteira Timor-Leste ho Indonézia. Foto/Média PR.

Diskusaun ne’e realiza tanba José Ramos-Horta ho nia omólogu Joko Widodo hakarak atu Indonézia apoia ekonomia Timor-Leste hodi la’o ba oin, ho apoiu husi entidade oi-oin.

Lee Mós: Ramos-Horta Ho Governadór NTT Diskute Estabelesimentu Zona Komérsiu Livre

Projetu rua ne’e, governu ba governu, business ba business, signifika parte rua envolvidu, ida mak governu Indonézia no Timor-Leste, seluk maka seitór privadu hosi Indonézia no Timor-Leste, atu projetu rua ne’e benefisia Timor-Leste,  hotu-hotu tenke badinas, bo’ok an, mobiliza an, mobiliza seitór privadu nasionál.

Governu Indonézia apoia seitór privadu no haruka nafatin ekipa  empreza estatal Indonézia (Badan Usaha Milik Negara – BUMN) atu kontinua partisipa ativu iha prosesu dezenvolvimentu Timor-Leste.

Governu Indonézia mós delega atu Ministru Koordenadór Luhut Panjaitan, hodi lidera Kriasaun Zona Komérsiu livre no Parke Industrial iha Rejiaun Administrativa Espesiál Oecusse Ambeno.

“Prezidente Joko Widodo interessadu no motivadu teb-tebes, delegasaun ida hosi Jakarta mai iha Bali no sira hateten, Prezidente Joko Widodo foin dadaun, bolu sira no ko’alia ho sira. Iha semana ida nia laran, Prezidente Joko Widodo sei telefone ba ha’u no ohin kalan duni, ko’alia telefone ho Ministru Koordenadór Luhut Panjaitan, nia mak sei reprezenta Indonézia ba hodi koordena projetu ne’e,” Hatutan.com sita deklarasaun Ramos-Horta iha komunikadu, Kuarta (28/09/2022).

Xefe Estadu mós husu ba governu, liu-liu Ministériu responsável ba projetu ne’e, hodi deskuti detallu ho Indonézia, tanba Prezidente Repúblika bele halo diplomasia ekonómika, maibé labele assina akordu ruma.

“Ita labele la’o neineik, ita atu tama daudaun ba ASEAN, se ita la la’o, la asselera ita nia prosesu dezenvolvimentu ekonómiku, ita la konsege hanesan toman ASEAN nian. Ne’e duni Prezidente Jokowi hakarak, book no book lalais, ajuda ita ho ita nia ekonomia,” Xefe Estadu subliña.

Durante Vizita Prezidente Repúblika bá Indonézia, membru governu ne’ebé hola parte iha delegasaun, assina akordu iha seitór agrikultura, ekonomia no transportes.

Projetu seluk ne’ebé sei iha faze diskussaun mak apoiu kriasaun komité konjunta iha fronteira, apoia dezenvolvimentu ekonómiku iha Fronteira, Kriasaun Zona Komérsiu livre no Parke Industriál iha RAEOA.

Jornalista: Vito Salvadór