Hatutan.com, (06 Outubru 2022), Díli—Lei partidu polítiku bandu no la autoriza ona Partidu Asosiasaun Sosiál Demokrata Timorense (ASDT), Partidu Povu Timor (PPT) ho Klíbur Oan Timor Asuwain (KOTA), atu partisipa iha kampaña polítika eleisaun Parlamentár iha tinan 2023, tanba partidu hirak ne’e lakon ona estatutu nu’udár partidu polítiku.

Prezidente Tribunál Rekursu (PTR), Deolindo dos Santos. Foto/Hatutan.com.

Dadus hosi Tribunál Rekursu (TR) hatudu katak, oras-ne’e dadaun totál partidu polítiku ne’ebé Tribunál rejista inisialmente hamutuk 20-resin.

Lee Mós: Ministériu Justisa Halo Autentifikasaun Bá Dokumentu Partidu Foun Haat

Hosi númeru ne’e, iha mós partidu lubun boot ida mak lakon tiha ona sira-nia estatutu hanesan partidu polítiku.

“Tuir lei, sira-nia estatutu nu’udár partidu ne’e laiha tiha ona. Ne’ebé, sira labele tuir eleisaun. Mais de 4 ka 5. Ha’u lembra maka ASDT, PPT no KOTA ho tán partidu rua ka tolu tán, ne’ebé ha’u la lembra,” Prezidente Tribunál Rekursu (PTR), Deolindo dos Santos, hateten hafoin ho ekipa fó paresér tékniku iha Sala Komisaun A PN, foin lalais ne’e.

Tanba lakon ona estatutu nu’udár Partidu Politiku, nune’e iha eleisaun parlamentár 2023, sira sei la partisipa tán ona iha palku politika durante kampaña, no labele konkorre iha eleisaun.

“Sira ne’e labele, ne’e la’ós ha’u mak dehan, mais lei mak hateten katak, liu tinan-lima sira la tuir eleisaun. Entaun sira ne’e tuir lei katak, estatutu nu’udár partidu politiku ne’e la vale ona nune’e sira labele kompete ona iha eleisaun,” Deolindo dos Santos, hateten tán.

Os Verdes de Timor Rejistadu

Deolindo dos Santos informa mós katak, partidu foun ne’ebé antes ne’e submete sira nia dokumentu bá Tribunál Rekursu, ikus mai halo avaliasaun maka, partidu Os Verdes de Timor ne’ebé oras-ne’e rejistadu iha TR no iha eleisaun 2023 bele konkorre.

“Os Verdes sai ona partidu politiku tuir lei,” PTR, Deolindo dos Santos, informa.

Antes ne’e iha partidu haat (4) mak bá iha Tribunál, submete sira-nia dokumentu organizasaun nian, oinsá bele sai hanesan mós partidu politiku ida, hodi kompete iha eleisaun sira tuir mai. Maibé, depois liuhosi prosesu avaliasaun, TR deside indeferidu hotu, tanba seidauk kompleta rekezitu.

Parte TR haruka fila no ikus mai iha partidu rua mak remete fila-fali sira dokumentu iha Tribunál, no Os Verdes de Timor mak admitidu. Maibé, Partidu Timor Forte (PATIFOR) mak oras-ne’e Tribunál seidauk pronunsia definitiva.

Tribunál mós remete fila-fali ona PATIFOR ninia dokumentu bá Ministériu Justisa atu haree tarrefa sira, bainhira kompleta ona maka Tribunál foin deside.

Jornalista: Rogério Pereira Cárceres