Hatutan.com, (09 Novembru 2022), Díli – Inspektór   sira servisu Diresaun Nasionál  Kuarentena no Bio-Seguransa, Ministériu Agrikultura no Peska (MAP)  nian hamutuk na’in-53 seidauk simu sira-nia direitu bá osan han nian fulan-11 ona.

Lee Mós : Kuarentena no Bio-Seguransa Seidauk Simu Relatóriu Madena Tama Ilegál

Logotipu Servisu Kuarentena Timor-Leste

Inspektór servisu Kuarentena no Bio-Seguransa nian sira-ne’e destaka iha postu estrada sira no postu vijilánsia nian iha Rejiaun Administrativu Espesiál Oé-Cusse Ambeno (RAEOA), iha  Munisípiu Baucau, Lautem, Atauro, Dili, Bobonaro ho Covalima.

Durante tinan hirak liubá MAP aplika osan han bá Inspektór Servisu Kuarentena no Bio-Seguransa nian iha postu entrada ho postu vijilánsia sira kada loron $5,75 sentavu. Maibé dezde fulan-11 ona osan han ne’e seidauk simu.

Advertisement

Ministériu Agrikultura no Peska (MAP), Pedro dos Reis, ne’ebé Hatutan.com konfirma iha Parlamentu Nasionál, Kuarta (09/11/2022), rekoñese katak, to’o oras ne’e sira seidauk halo pagamentu subsídiu bá pesoál inspektór Servisu Kuarentena no Bio-Seguransa nian. Maibé, problema ida ne’e la’ós fallansu iha MAP, mas Ministériu Finansas (MF) mak prosesa pagamentu.

“Sim, ida ne’e normálmente, laiha problema. Ami manda hotu númeru, pesoál sira-nia direitu ne’e bá hotu Ministériu Finansa. Tanba tarde ona, entaun, Ministériu Finansas husu fali rekizitu, tenke iha karta legál ka haree bá nia jurídiku para oinsá atu trata sira-nia subsídiu ho sira-nia osan han sira ne’e. Ne’ebé prosesu la’o hela,” Ministériu Agrikultura no Peska (MAP), Pedro dos Reis, hateten.

Hatán kona-bá karik situasaun ne’e mosu tanba MAP rasik mak tarde iha submisaun lista pesoál sira ne’e nian bá iha MF, Pedro dos Reis, dehan, la’ós MAP mak halo tarde, maibé tanba mosu mudansa barak iha sistema sira administrativu nian inklui orsamentu, nune’e presiza kompleta tuir rekizitu lei nian.

“La’ós tarde, ami fó hotu. Maibé iha mudansa, ha’u hanoin orsamentu mudansa, buat sira ne’e, entaun, prienxe nia rekizitu, sé oras ida ha’u foti fó de’it, ikus mai, ha’u mak kulpa fila-fali,” Pedro dos Reis, hateten.

Pedro dos Reis, klarifika katak pesoál servisu Kuarentena nian la’ós la simu sira-nia osan iha fulan-11, maibé fulan-neen (6) de’it mak seidauk simu.

Advertisement

“Laiha, balu simu tiha ona, kala iha fulan-neen (6) ida mak la simu. Iha mudansa, ne’ebé ita buka para atu hadi’a. Maibé, espera katak, hothotu tenke pasiénsia lala’ok mak hanesan ne’e ita tenke tuir nia dalan di’ak para labele prejudika fali ema ida,”  Ministru Pedro dos Reis hateten.

Nia promete atu iha tempu besik MAP sei halo duni pagamentu subsídiu ne’e bá iha pesoál hirak ne’ebé mak durante sakrifika aan serbisu ona iha Kuarentena sira iha postu entrada no postu vijilánsia nian.

“Tenke selu, sé enkuantu ida ne’e sira-nia direitu. Maibé, tenke tuir nia dalan ne’ebé mak loos. Ha’u labele hateten, agora ne’e prosesu sei la’o hela, imi husu dehan bainhira ne’e, ha’u atu hatán halo nusa,” Pedro dos Reis tenik.

Jornalista: Rogério Pereira Cárceres

Advertisement