Hatutan.com, (01 Dezembru 2022), Díli—Komandu Polísia Nasionál Timor-Leste (PNTL), deside hodi transfere ka muda fali Superintendente Xefe, Henrique da Costa ne’ebé nu’udár Komandante iha Komandu Munisípiu Díli, bá assume hikas kna’ar hanesan Xefe Departamentu Pesoál no Formasaun iha Kuartél Jerál Caicoli.

Komandu PNTL mós nomeia Superintendente Assistente, Luis da Silva bá asume fali pozisaun nu’udár Xefe Departamentu Transporte no Manutensaun iha Kuartél Komandu Jerál PNTL.

Lee Mós: Koñese Deviza PNTL no Formasaun atu Lidera Eskuadra to’o Komisáriu

Komandante Jerál PNTL, Komisáriu Polisia Faustino da Costa esplika, substitusaun ka mudansa pozisaun bá ofisiál superiór sira ne’e, bazeia bá Lei Orgánika foun PNTL nian ne’ebé durante fulan-ida ona tama iha vigór.

“Tanba ne’e mak ita hahú implementa. Maski Lei Orgánika ne’e hateten katak, implementasaun ne’e bele to’o tinan tolu maibé ita haree katak, unidade balun, departamentu balun ne’ebé nesesita ita tenke koloka ona ema atu bele halo serbisu. Ezemplu, durante ne’e akademia polisia submete direta komandu maibé, agora tenke liuhosi komandu ida maka Pesoál Informasaun,” Komisáriu Polísia Faustino da Costa hateten hafoin serimónia pose iha Kuartél Jerál Caicoli, Kinta (01/12/2022).

Komisáriu Faustino informa, Xefe Departamentu Pesoál no Formasaun ninia serbisu haree liu kona-bá Asuntu Rekursu Umanu ka pesoál PNTL ninian nomós halo Supervizaun direta bá iha Centro de Formação Academia da Policia (CFP), kona-bá dezeñamentu kurríkulu ka matéria sira ne’ebé mak merese uza hodi fasilita formasaun bá membru sira, hosi bázika to’o espesializada.

“Ita oras-ne’e daudaun iha faze ida halo hela revizaun bá kurrikulu formasaun bá ajente ninian. Entaun, situasaun ne’e ita nesesita atu haree oinsá mak sira tenke altera kurríkulu ida-ne’e nomós haree kona-bá rejime konkursu ka lei rekrutamentu ninian,” Faustino hateten.

Iha Lei Orgánika foun PNTL ne’e temi mós kona-bá Departamentu Lojístika no Manutensaun Viaturas bá PNTL ne’ebé uluk eziste nu’udár seksaun de’it maibé, agora tenke nafilak bá departamentu ida.

Komisáriu Faustino konsidera departamentu ida-ne’e nesesita duni tanba públiku hatene dala-barak, transporte sira ne’ebé membru PNTL utiliza, bainhira polisia bá atende kazu ruma tenke to’o bá dudu, hamoris no atende tiha problema tenke hamoris tán.

Iha okaziaun ne’e, komandu PNTL hala’o mós pose bá Ofisiál Superiór na’in-tolu seluk, nu’udár komandante bá Komandu Munisipiu Ainaro, Ermera no Aileu. 

Superintendente Polisia, Justino Menezes molok ne’e nu’udár komandante PNTL iha Komandu Munisipiu Ainaro sei lidera fali Komandu Munisípiu Ermera.

Superintendente Polísia, Ludzerio Lay molok ne’e nu’udár komandante PNTL iha Komandu Munisípiu Ermera sei lidera fali Komandu Munisipiu Aileu.

Superintendente Polísia, Paulino do Carmo da Silva ne’ebé uluk hanesan Xefe Departamentu Investigasaun Kriminál (DIC-Sigla Portugés) sei lidera fali Komandu PNTL Munisípiu Ainaro, tuir órden komandu nian ho mandatu tinan-tolu.

Komandu Munisípiu Díli sei lidera privizóriu hosi Segundu Komandante, Superintendente Polísia, João Sanches hodi hein desizaun seluk hosi komandu PNTL. 

Jornalista: Rogério Pereira Cárceres