Hatutan.com, (02 Dezembru 2022), Díli-Konsellu Ministru (KM) propoin bá Prezidente Repúblika (PR), José Ramos-Horta, atu  atribui Medalla Orden Timor-Leste nian bá eis-Embaixadór Austrália, Peter Roberts.

Lee Mós : Embaixadór Peter Roberts Triste Husik Hela Timor-Leste

Eis-Embaixadór Austrália iha Timor-Leste, Peter Roberts. Foto/Dok.Hatutan.com.

Ministru Finansas (MF), Rui Augosto Gomes, hateten, reuniaun KM estraordináriu, Sesta (02/12/2022), husu bá Xefe Estadu Timor-Leste atu atribui mós Medalla Orden Timor-Leste bá Peter Roberts tanba Governu haree katak, asaun diplomátika ne’ebé dezenvolve hosi Embaixadór Peter Roberts, kontributu signifikativu tebes hodi benefísia bá nasaun no Timoroan sira.

“Konsellu Ministru delibera hodi propor bá Prezidente Repúblika bá atribuisaun ordém Timor-Leste, Grau Medalla, bá señor Peter Roberts, eis Embaixadór Austrália iha Timor-Leste,” Ministru Finansas (MF), Rui Augosto Gomes, hateten bá jornalista sira hafoin surumutu konsellu ministru estraordináriu iha Palásiu Governu Díli.

Ministru Rui Gomes dehan, papél fundamental ne’ebé eis-Embaixadór Austrália ne’e halo, liu-liu dezempeña iha konsolidasaun no hametin relasaun amizade no kooperasaun ne’ebé estabelese hosi Estadu Timoroan no Estadu Autralianu, ninia intervensaun bá konkretizasaun bá apoiu sira ne’ebé fó hosi Estadu Australianu bá Estadu Timoroan hodi kombate bá pendemia Covid-19.

Apoiu hirak ne’e, hodi hatán no asisténsia bá vítima inundasaun sira ne’ebé Timor-Leste enfrenta iha loron 04 fulan-Abríl 2021, ninia asaun empeñu no permite ona atu garante apoiu Estadu Australianu hodi ezekuta medida balun ne’e, prevee ona iha ámbitu kapasitasaun no formasaun rekursus umanus timoroan nian, liu-liu liuhosi Australian Pacific Training Coaliation.

Eis-Embaixadór Peter Roberts hala’o nia misaun diplomata iha Timor-Leste dezde loron 04 fulan-Janeiru 2018 no termina iha tinan 2021. 

Jornalista: Rogério Pereira Cárceres