Hatutan.com, (16 Dezembru 2022), Dili—Organizasaun sosiedade sivil Lalenok Bá Ema Hotu (LABEH) haree katak Estadu iha ona vontade politika hodi kombate aktu korrupsaun iha Timor-Leste (TL), liu hosi kriasaun Lei Medidas Preventivas bá Kombate Korupsaun (MPCC-Sigla Portuges), maibé iha ninia implementasaun mak seidauk dia’k.

Diretór Ezekutivu LABEH, Cristopher Henry Samson. Foto/Hatutan.com

Tanba ne’e LABEH dezafia Comissão Anti Corupção (CAC) ninia kapasidade atu halo implementasaun kona-bá lei ne’e hodi kombate krime korrupsaun ho sériu iha rai ne’e.

Lee Mós: Lei MPCC Nu’udár Afirmasaun ba Interese Superiór Povu Nian

“Signifika, vontade Estadu mak ne’e ona. Agora, instituisaun Estadu ne’ebé iha kompeténsia atu implementa lei ne’e preparadu ka la’e, sira iha kapasidade duni atu ezekuta lei ne’e ka la’e, implementa lei ne’e ka la’e. Ida ne’e mak realidade ne’ebé ita hasoru,” Diretór LABEH, Cristhopher Henry Samson hateten bá Hatutan.com iha Koléjiu São Miguel Arcanjo, Rai-kotu, Comoro, Sesta (16/12/2022).

Cristhopher Henry Samson, hateten, iha loron 09 dezembru 2022 nu’udár loron mundiál bá Anti Korupsaun bá dala-20. Loron ida ne’e, asina iha konvensaun ONU kona-bá kontra korrupsaun.

Tanba ne’e Lalenok bá Ema Hotu sempre hatete katak, luta hasoru korrupsaun ne’e importante. Simplesmente ida ne’e de’it mak ema bele komprende.

LABEH halo komparasaun katak, bainhira ema ida ho nia osan rasik hola motór ida, nia hetan dokumentu hosi motór ne’e, nia iha karta kondusaun no iha buat hothotu. Maibé, loron ida, motór ne’e lakon.

Sé motor ne’e lakon, ema ne’e tenke bá polisia hodi informa katak nia motor lakon no polisia bá buka to’o hetan motor ne’e. Bainhira prosesu Tribunál liu hotu ona tenke entrega motór ne’e bá na’in no ema ida ne’ebé na’ok motór ne’e tenke bá kadeia.

“Maibé, realidade ne’ebé ita hasoru durante ne’e, Tribunál kondena eis ministru sira, eis sekretáriu estadu balun, no kondena diretór balun, maibé laiha buat ida ne’ebé sira hatudu katak, ida ne’e mak sira na’ok, hodi fó fila-fali bá Estadu. Ida ne’e mak prosesu ida ne’ebé LABEH haree katak, ne’e sala,” diretór Cristhopher hateten.

Tanba ne’e, LABEH nafatin espera katak, iha tempu badak Estadu tenke hatudu fila-fali ninia vontade, hodi lee lei recovery assert ne’e, tempu ruma implementa fali.

Iha ámbitu sira kona-bá luta kontra korupsaun, CAC mak na’in bá lei PMCC, Prokuradór Jerál Repúblika ka Ministériu Públiku (MP) mak na’in bá krime. Tribunál maka deside.

Maibé, bainhira Prokuradór sira, CAC la hatudu evidénsia ne’ebé forte bá Tribunál sira maka Tribunál labele halo buat ida. Tanba ida ne’e, implementadór sira mak tenke hatudu bá Tribunál katak, ema na’ok duni povu nia rikusoin.

Nune’e LABEH husu bá Estadu atu kontinua ho vontade politika ne’ebé iha hodi kompleta enkuadramentu hotu ne’ebé iha ona.

Jornalista: Rogério Pereira Cárceres