Hatutan.com, (19 Dezembru 2022), Díli-Polisia Nasionál Timor-Leste (PNTL) Munisípiu Dili, liuhosi Unidade Tránzitu no Seguransa Rodviáriu, halo apreensaun  bá motór ho kareta hamutuk 300-resin.

Lee Mós : Adeptu Portugál 38 Ne’ebé Kontra Regra Tránzitu, Selu Multa Kada Motór $120

Motór sira ne’e estasiona hela iha arredores PNTL Munisípiu Díli tanba komete infrasaun kodigu estrada. Foto/Elio dos Santos da Costa

Transporte hirak ne’e tama iha serku apreensaun polísia nian tanba viola kódigu estada durante halo komboiu iha sidade Dili hosi adeptu kopa mundiál 2022.

Motór sira ne’ebé mak polísia prende kompostu hosi motór sira  uza kanu-resin 27, la monta espellu iha 61, la uza kapasete 47, la monta xapa matrikula 70, kontra sinais ka viola lei kódigu estrada hamutuk 90, kontra ordém autoridade 4, halai la tuir regra iha ida (1). Nune’e, karreta kontentór, prende dokumentus 43, estasiona ka para iha zembra cross ida (1), no dokumentu ida mak liu prazu.

Advertisement

Komandante unidade Polisia Tránzitu iha Komandu Munisípiu Dili, Inspetór Domingos Sarmento Gama, fó razaun katak, evidénsia hirak ne’e PNTL halo apreensaun, tanba halo komboiu iha Díli hafoin selebrasaun bá vitória nasaun ne’ebé adeptu sira fans ka apoia bá.

“Hosi loron 21 fulan-Novembru mai to’o mai iha loron 19 fulan-Dezembru ne’e, totál osan ne’ebé mak adeptu ka infratór sira selu hamutuk $8,285. Koima hirak ne’e, PNTL rekolla hosi evidénsia hamutuk 300-resin ne’ebé mak PNTL prende,” Inspetór Polísia, Domingos Sarmento Gama, hateten bá jornalistra sira iha kna’ar, Segunda (19/12/2022).

Infratór barak mak seidauk selu multa ka koima, tanba koima ne’ebé aplika, konsidera boot liu. Bá motorizada sira ho kondisaun kanu-resin hamutuk 27 ne’ebé PNTL rejistu, tenke selu $120. Laiha xapa matrikula $60.

“Sé kapasete la tau tán, ou dokumentus ruma mak liu prazu, ne’e mais pior, bele to’o $240 ka $250. Entaun, balu mak selu ona, no barak tebes mak seidauk selu,” Domingos Gama, informa.

Durante halo apreensaun bá evidénsia sira iha terrenu, membru PNTL sira, aplika kedan noa infrasaun ka banku nian bá iha infartór sira atu bele bá selu molok foti fila sira nia motorizada. Infelizmente, barak mak la selu, tanba koima ne’ebé aplika iha multa, boot liu, no infratór barak tenta halai sees hosi responsábilidade.

Advertisement

“Bá infrasaun sira ne’ebé maka balu seidauk pasa nota banku nian, no sira ne’ebé mak pasa ona, maibé, seidauk selu koima ne’e, hela $1,398. Sira ne’e, simu ona nota banku nian, maibé seidauk selu,” Domingos Sarmento informa tan.

 Jornalista: Rogério Pereira Cárceres