Hatutan.com, (11 Janeiru 2023), Díli-Polisia Nasionál Timor-Leste (PNTL) Munisípiu Manufahi, Tersa (10/01/2023), kaptura ona joven mane ida ho inisial OdxX  deskonfia nu’udár autór bá kazu tentativa omesídiu iha área Bidau, Ponte B.J. Habibie, foin lalais ne’e. 

Lee Mós : Vítima Ne’ebé Hetan Sona iha Área Ponte Habibie Seidauk Fó Informasaun bá Polísia

Munisípiu Manufahi, Tersa (10/01/2023), iha Manufahi, kaptura OdxX nu’udár autór sona joven ida iha área Ponte B.J. Habibie nian. Foto/PNTL

Hafoin kapturasaun bá autor ho inisiál OdxX, PNTL Manufahi komunika kedan bá unidade Servisu Investigasaun Kriminál Nasionál (SIKN). Nune’e, SIKN hamutuk ho Servisu Sekreta forsa rua ne’ebé envolve Servisu Informasaun Polísia Nasional (SIPN-PNTL), Aranha, Makikit, Servisu Informasaun Militar (SIM-F-FDTL), Unidade Falintil, J2 junta ho Servisu Nasional Intelijensia (SNI) bá foti kedan suspeitu OdxX iha Manufahi.

Iha prosesu rekollamentu informasaun no investigasaun kriminál, autór OdxX (tinan 21), rekoñese katak, nia rasik mak sona vitima Damazo Correia Guterres, iha ponte B.J Habibie.

Advertisement

Durate identifikasaun, suspeitu OdxX deklara kronolíjia katak, iha Sábadu kalan (07/01/2023), nia bá partisipa seremónia festa iha paradise Área Branca-Cristo Rei. Iha festa laran, autór dansa hela, maibé ho kondisaun lanu to’o isin kona malu ho joven mane sira seluk, nune’e mosu dezentendimentu entre OdxX ho joven mane balu iha festa ne’e nia laran. Maibé, la’ós ho vitima Damazo ne’ebá nia sona.

Iha dezentendimentu ne’e, suspeitu OdxX sente la satisfás no nia deside fila ho motór marka Honda Scopy kor mean-metan, Xapa matrikula P. 6232, fila-fali bá nia uma iha Bidau-Masaur, Rai-hun, objetivu atu foti kroat (tudik) iha uma Bidau Masaur, hodi lori fila-fali bá iha festa ne’e, buka tuir joven hirak ne’ebé sira diskute malu ne’e.

“Suspeitu OdxX la konsege hetan, nune’e suspeitu sona fali ema seluk ho naran Damazo Correia Guterres (DCG) iha parte kotuk laran ho tudik iha área Bidau Lecidere, besik ponte B.J. Habibie.” Hatutan.com sita komunikadu imprensa hosi Komandu Jerál PNTL.

Vitima Damazo Correia Guterres, tinan 30, hosi Basarawai, Haeconi, Postu-Administrativu Baguia, Munisípiu Baucau, hela iha Aldeia Bekusi Sentru, Suku Becora, Postu-Administrativu Cristu-Rei, Munisipiu Díli, hetan asaltu no tentativa omisídiu agravadu iha  07 fulan-Janeiru 2023, hale’u tuku 21:45 Otl.

Hafoin hetan sona iha parte kotuk laran no tudik belit hela iha nia kotuk laran, vítima Damazo Correia Guterres, sa’e rasik ninia motór konsege bá to’o iha Ospitál Nasionál Guido Valadares (HNGV), Bidau, Díli, atu hetan tratamentu intensivu.

Advertisement

Jornalista: Rogério Pereira Cárceres