Hatutan.com, (03 Marsu 2023), Díli- Komisáriu  Komisaun Anti Korrupsaun (CAC, sigla portugés), Sérgio de Jesus Fernandes da Costa Hornai, hateten kazu ró Tranship II nia prosesu investigasaun sira lao tiha ona no CAC halo ona submisaun bá iha Ministériu Públiku hodi kontinua prosesu ne’e bá oin.

Lee Mós : Kazu Ró Tranship II, FONGTIL Sei Buka Konfirma ho CAC no MP

Komisáriu CAC, Sérgio de Jesus Fernandes da Costa Hornai. Foto/Helio dos Santos da Costa

Komisáriu CAC ne’e konfirma katak CAC konklui ona prosesu investigasaun bá kazu Ró Tranship II no haruka bá iha Ministériu Públiku hanesan nain ba asaun penál hodi halo prosesu kontinuasaun.

“Kazu Ró Tranship II nia delegasaun sira CAC halo ona submisaun bá Ministériu Públiku iha tinan kotuk,” Sérgio de Jesus Fernandes da Costa Hornai bá jornalista sira iha Palásiu Governu, Sesta (03/03/2023).

Kona-bá konteúdu sira prosesamentu bá kazu Ró Tranship II nian CAC sei la pronunsia buat ruma tamba kabe bá segredu justisa, maibé buat ne’ebé serteza maka delegasaun sira kazu Ró Tranship II CAC haruka hotu ona bá iha Ministériu Públiku.

“Hanesan orgaun polísial kriminál no hanesan mós koajugador bá iha Ministériu Públiku, ita halo ona servisu para oinsa halais prosesu sira lao bá oin,”  Komisáriu  CAC, Sérgio de Jesus Fernandes da Costa afirma.

Lee Mós : Kazu Ró Tranship II, Ministru José Agostinho Prontu Kolabora ho Justisa

Jornalista: Vito Salvadór