Hatutan.com, (06 Marsu 2023), Díli-Suspeitu joven ida, daudaun ne’e, kumpre detensaun iha Sela Polísia Munisípiu Díli bá interese  identifikasaun no investigasaun hafoin komete aktu tentativa omisídiu ne’ebé akontese iha área Fatumeta, Suku Bairru-Pité, Munisípiu Díli, Segunda (06/3/2023), hale’u tuku  00:35 Otl.  

Lee Mós : Kazu Omesídiu Elemloi, PNTL Bolu no Halo Ona Identifikasaun bá Sidadaun 23

Portavós komandu jerál PNTL, Superintendente Xefe Polisia, Arnaldo de Araújo. Foto/Elio dos Santos da Costa

Kronolojia ne’ebé relata hosi oprtavós Komandu Jerál PNTL, Superintendente Xefe Polísia, Arnaldo de Araújo, liuhosi konferénsia imprensa katak, Komandu Munisípiu Díli, liuhosi Eskuadra Dom Aleixo, simu keixa ka informasaun hosi sidadaun mane ida (lezadu) liuhosi telefone, katak, nia hetan agresaun fízika to’o hetan tán sona hosi ema ne’ebé mak durante sira hela hamutuk  ho nia iha uma ida de’it, área Fatumeta, Suku Bairru-Pité.

Hafoin simu tiha informasaun ne’e, Polísia Eskuadra Dom Aleixo, liuhosi ekipa patrullamentu to’o kedas iha fatin akontesimentu, nune’e bele halo atendimentu bá kazu ne’e. Maibé, bainhira ekipa patrullamentu to’o iha fatin ne’ebá, suspeitu ne’e iha hela uma-laran.

Advertisement

Polísia bolu nia, dala-ua’in, nia lakohi sai mai liur. Nia hakilar hosi laran dehan katak, sé mak tama tuir nia iha uma-laran, nia sei sona mate.

Iha altura uainhira polísia bolu suspeitu ne’e atu sai mai liur, iha fatin hanesan, suspeitu ne’e nia alin mane ida mós hamriik besik hela iha odamatan kuartu nian. Nune’e, nia alin dudu odamatan ne’e nakloke, suspeitu ne’e halai sai kedas mai liur, kaer ho kroat atu hanesan tudik, inklui safenda ne’ebé sikat hela iha ninia kanotak.

Halai sai mai liur, suspeitu ne’e, tenta atu sona tán membru Polísia ida ne’ebé mak hamriik loos iha ninia oin. Sira see oin hela bá malu, nune’e membru PNTL ne’e, hakiduk mai kotuk atu bele salva aan. Maibé membru PNTL ne’e mós monu bá rai. Komandante seksaun ne’ebé lidera hela ekipa ne’e, hakilar iha oin ho lian maka’as katak, para!, maibé  suspeitu ne’e la para.

“Suspeitu ne’e mai sona fali komandante seksaun, ho ida ne’e, komandante seksaun ne’e dehan katak, ha’u polísia, para, nia la para maka, fó tiru dala-ida bá kona iha nia  kelen,” Superintendente Xefe Polísia, Arnaldo de Araújo haktuir.

Komandante Arnaldo dehan, PNTL iha ninia regra rasik kona-bá oinsá halo atuasaun bá kazu ruma iha terrenu. Uainhira iha situasaun ruma mak fó perigu bá sira-nia vida, opsaun ikus mak  tiru’, atu nune’e bele normaliza situasaun iha lokál akontesimentu.

Advertisement

“Nia tenta atu sona dala-ida, dala-rua to’o dala-tolu, tanba ne’e maka komandante ekipa halo auto-defeza. Entaun, bá sé-sé de’it, kuandu nia hetan ameasadu, ami mós estuda hotu bá ida ne’e. Tanba nia mós sente katak, ami ameasadu, atu tenkeser hasai ona kilat ne’ebé mak iha ami nia isin-lolon, hodi bele halo auto-defeza. Ho ida ne’e, nia hasai tiru dala-ida bá suspeitu nia kelen no halo suspeitu monu bá rai,” Arnaldo de Araújo   hateten.

Hafoin tiru, suspeitu ne’e mós monu bá rai, nune’e Polisia nia ekipa patrullamentu sira, foti kedan suspeitu ne’e, inklui vitima ida seluk ne’ebé nia antes, hamutuk ho komadante seksaun ne’ebé hetan sona no kanek iha liman karuk, transporta  bá Ospitál Nasionál Guido Valadáres (HNGV) hodi halo tratamentu saúde.

Ekipa Investigasaun Kriminál Komandu Munisípiu Díli nian halo hela prosesu identifikasaun bá suspeitu no vítima, hodi hatene klean informasaun ka kauza hosi kazu insidente ne’e.

Jornalista: Rogério Pereira Cárceres

Advertisement