Hatutan.com, (01 Marsu 2023), Díli-Forum ONG Timor-Leste (FONGTIL) to’o oras ne’e seidauk hetan informasaun ruma hosi parte relevante sira, liuliu Komisaun Anti Korrupsaun (CAC, sigla portugés) ho Ministériu Públiku (MP) kona-bá prosesu legal balun ne’ebé FONGTIL submete relasiona ho kazu Ró Tranship II.

Lee Mós : Kazu Ró Tranship II Sei Segredu Justisa

Diretór Ezekutivu FONGTIL, Valentim da Costa Pinto bá Hatutan.com hateten, kazu ida ne’e mós FONGTIL seidauk hetan atualizasaun bá informasaun ruma hosi parte relevante sira. Tanba ne’e, permite sira atu halo fali levantamentu ruma, halo fali kontaktu ruma, liu-liu ho APORTIL, Ministru Transportes no Komunikasaun (MTK) rasik, kona-bá kontratu ró ida-ne’e ne’ebé mak iha pasadu halo tiha ona mai, mais ró nia kondisaun ladi’ak, entaun labele halo operasaun.

Ró Tranship II enfrenta problema bainhira atu atraka iha Portu Ataúro, fulan-Jullu 2021. Foto/Dok.Hatutan.com

“Ami mós tenke hanoin katak, kontratu ne’e, ninia jestaun halo nusá, tanba ho osan nia montante ne’ebé mak boot oitoan, maibé sasán ne’e mai, sé ita la utiliza, ne’e kerdijerke ita hanesan kontribui bá iha despeza Estadu ne’ebé nia gastu mak boot liu la efisiénsia no la efikásia ka mágastu,” Valentim da Costa hateten.

Investigasaun bá kazu ró Tranship II nian ne’ebé hala’o hosi Komisaun Anti-Korrupsaun (CAC, sigla Portugés) finaliza ona no tuir mandatu Lei, CAC submete auto notísia dala-rua ona bá Ministériu Públiku hanesan na’in bá asaun penal.

Ministru Transporte no Komunikasaun (MTK), José Agustinho da Silva, ne’ebé Hatutan.com konfirma iha Kinta, 28 fulan-Abríl 2022, hateten nia prontu  kolabora ho instituisaun sira judisiáriu nian bá kazu Ró Tranship II.  

Ministru Transporte no Komunikasaun (MTK), José Agustinho da Silva hateten, instituisaun Estadu ho Governu nian hotu-hotu, hanesan CAC, Provedória dos Direitos Humanos e Justiça (PDHJ), Inspesaun Jerál Estadu (IJE), ho seluk tán, sira serbí Estadu ida de’it, mak estadu Timor-Leste, Governu, Oitavu Governu Konstitusionál.

Lee Mós : CAC sériu akompaña kazu Ró Tranship II iha MP

Instituisaun Estadu sira ne’e, tuir Ministru José Agustinho da Silva katak, ida-idak iha ninia kna’ar hodi hala’o servisu, atu serbí de’it Estadu TL, iha ne’ebé instituisaun balu ho papél bá ezekusaun programa, orsamentu, no mós balu halo akompañamentu, tau matan ka halo monitorizasaun bá atividade sira hosi ministériu seluk nian.

Hosi sorin seluk, Ministériu Públiku (MP) seidauk finaliza prosesu investigasaun bá kazu ró Tranship II, maske CAC submete ona auto notísia dala rua ba MP.

“Kona-bá ró Tranship II ha’u senti investigasaun sei lao hela no depois ita hein rezultadu investigasaun tanba bainhira investigasaun la’o hela maka ami seidauk bele ko’alia buat ruma,” Adjunta Prokuradora Jerál  Repúblika (PJR) Remigia de Fátima, hateten  bá Hatutan.com hafoin partisipa iha serimónia lansamentu relatóriu monitorizasaun setór justisa JSMP, iha El-Legendario, Díli, loron 28 fulan-Abríl 2022.

Iha loron 24 Juñu 2021, CAC hato’o ona auto partisipasaun rezultadu analiza kona-bá inspesaun ba ró Tranship II Gresik Indonézia, ba Ministériu Públiku, no iha loron 18 fulan-Agostu 2021, CAC submete tan bá daruak auto partisipasaun rezultadu analiza kona-bá inspesaun ba ró Tranship II Gresik Indonézia, bá iha MP maibé to’o agora seiduak iha rezultadu.

Rezultadu investigasaun ka analiza ne’ebé CAC halo ona ba ró Tranship II Gresik Indonézia, hatudu katak deskonfia iha indísiu áa krime partisipasaun ekonomia iha negósiu, tanba inkomprimentu ba prosedimentu aprovizionamentu.

Lee Mós : CAC Kontinua Buka-Tuir Irregularidade Hosi Kazu Ró Tranship II

Tuir kódigu prosesu penal katak na’in ba asaun penal maka Ministériu Públiku (MP), tanba ne’e bainhira CAC submete ona auto partisipasaun rezultadu analiza bá MP maka MP sei halo analiza provas ne’ebé aprezenta sufisiente ona hodi konklui iha akuzasaun ka lae no karik la sufisiente MP maka sei deside MP maka kontinua halo investigasaun ka delega fali ba CAC.

Iha kazu ne’e, Ministru Transporte no Komunikasaun (MTK), José Agostinho da Silva anunsia ofisiálmente katak, ró KMP Tranship II, hosi  Surabaya, Indonézia hahú substitui ró-ahi Berlin Nakroma no Success, iha loron  25 fulan-Maiu 2021.

MTK halo kontratu ho ró-ahi KMP Tranship II hosi kompañia estranjeiru Atralata Estrategi hosi Indonézia, ho kada fulan selu $220.000, ne’ebé iha kapasidade tula pasajeiru hamutuk na’in-300, inklui sasán ho tonelada 1.000-resin.

Razaun substituisaun ne’e tanba ró-ahi Berlin Nakroma avaria dezde tinan 2020, to’o agora seidauk hadi’a tanba situasaun COVID-19, no ró-ahi Success ba manutensaun durante fulan-tolu iha Indonézia, dezde tinan tolu hala’o operasaun iha Dili la halo manutensaun.

Iha loron 04 Juñu 2021, ekipa hosi CAC, akompaña hosi Diresaun Nasionál Transporte Marítima (DNTM), hahú halo inspesaun ba ró ne’e  hodi hatene kona-bá kondisaun no mós buka hatene kona-bá prosesu kontratu, molok hala’o operasaun.

Ho inísiu inspesaun ne’e, maka iha loron 08 Juñu 2021, Ministru MTK, José Agostinho da Silva, deklara katak, bazeia ba rezultadu inspesaun DNTM, katak ró KMP Tranship II iha kondisaun di’ak atu halo operasaun. 

Lee Mós : Kazu Ró Tranship II, Ministru José Agostinho Prontu Kolabora ho Justisa

Nune’e, iha loron tuir mai 11 fulan-Juñu 2021, Ró ne’e transporta Primeiru-Ministru (PM), Taur Matan Ruak  ho komitiva (Membru Governu lubuk ida), inklui Konselleiru másimu Partidu KHUNTO, José dos Santos Naimori Bucar ba Postu Administrativu  Ataúro, maibé susar atu atraka iha portu, ikus-mai tenke fila-fali mai Díli ho ró-ahi seluk.

Ho situasaun ne’e, iha loron 12 fulan-Juñu 2021 Ministru MTK José Agostinho da Silva, ezije fila-fali ba tékniku ró-ahi KMP Tranship II atu submete relatóriu ofisiál ho loloos ba parte investigadór-sira tanba deskonfia mákina ró nian mak avaria.

Jornalista : Rogério Pereira Cárceres