Hatutan.com, (04 Abríl 2023), Díli—Prezidente Repúblika (PR), José Ramos-Horta dezafia joven sira atu apreende Lian Inglés ne’ebé sai hanesan pilár importante bá Adezaun Timor Leste nian bá Association of Southeast Asian Nations (ASEAN).

Ramos-Horta dezafia ne’e iha ámbitu fahe informasaun bá funsionáriu Ministériu Negósiu Estranjeiru no Kooperasaun (MNEK) kona-bá adezaun bá ASEAN, iha Salaun MNEK, Tersa (04/04/2023).

Lee Mós: ASEAN Simu Ona Submisaun TL, Ramos-Horta ho Órgaun Soberania Sira Prepara Pré-deklarasaun

Advertisement

Prezidente Repúblika promete atu koopera ho lider hotu-hotu, hodi konsolida relasaun esterna, liu-liu adezaun ba ASEAN no mós dezafia joven sira atu kontinua aperende língua ne’ebé sai mós pilár importante iha kontestu organizasaun rejionál ne’e.

‘’Língua Inglés importante ba diplomasia, komérsiu no pessoál. Ha’u haree joven Timor-oan jeitu ba lian nian, apreende língua fásil loos. Xineza no Koreia hateten ba ha’u katak jóven sira ba estuda iha-ne’e, fulan neen no to’o tinan ida, sira hatene ona língua hosi nasaun ne’ebé sira hela bá,” Hatutan.com sita deklarasaun Prezidente Repúblika iha komunikadu.

Ramos-Horta kontente ho kapasidade Timor oan sira nian no konsidera Timor-Leste sai únika nasaun iha ASEAN ne’ebé ko’alia lian hosi nasaun oin-oin.

“Konvite hosi Ministra nian atu mai ko’alia ho funsionáriu sira, liu-liu preokupasaun kona-bá adezaun ba ASEAN ne’ebé mai daudaun ona hodi halo apelu ba diplomata no funsionáriu sira iha MNEK. Maibé mós ba Ministériu sira hotu. Onra bo’ot ida ho oportunidade di’ák ba ita, luta ba independénsia no kompleta mós ita nia integrasaun rejionál,” Xefe Estadu Horta hateten.

Integrasaun ba organizasaun rejionál ne’e, Xefe Estadu konsidera hanesan responsabilidade bo’ot, tanba kumpre kompromissu, hodi partisipa iha reuniaun oi-oin no inisia estabelesimentu akordu ho governu no Parlamentu hosi nasaun ASEAN.

Advertisement

“Posibilidade Timor-Leste tama formalmente ba ASEAN iha Setembru 2023. Singnifika, akordu sira hosi governu foun fulan Maiu ba oin, tenke assina hodi kompleta. Ha’u fiar katak, ASEAN sei fó ba ita tempu ba tinan tolu ka haat, hodi implementa akordu sira-ne’e, ne’e normal maibé tenke servisu ho lideransa konsensuál,” Ramos-Horta subliña.

Xefe Estadu mós louva servisu hosi Ministra Negósiu Estranjeiru no Kooperasaun, Adalgiza Magno ho nia ekipa ne’ebé servisu maka’as, hodi lori Timor-Leste sai membru ASEAN no iha tinan kotuk aprova ona estatutu Timor-Leste hanesan observadór permanente ASEAN nian. 

Xefe Estadu mós dezafia MNEK atu aposta nafatin ba reforsu institusionál, hodi hatudu nafatin abilidade no komportamentu di’ak.

Minisrtru Negósiu Estranjeiru no Kooperasaun dahuluk iha 1975 mak Premiadu Nobel da Pás, José Ramos-Horta no lidera hikas Ministériu ne’e iha tinan 2022, ho funsionáriu na’in 50.

Jornalista: Vito Salvadór

Advertisement