Hatutan.com, (13 Abríl 2023), Díli—Tribunál Judisiál Primeira Instánsia Díli (TJPID) liuhosi juis de direitu, António José Fonseca Monteiro de Jesus, deside anula desizaun empreza Grupo Media Nacional (GMN) nian ne’ebé hasai nia traballadora nu’udár jornalista Carmelita Isaac Amaro de Jesus iha tinan 2019.

Tribunál Distritál Díli (TDD). Foto/Dok.Hatutan.com

Liuhosi dokumentu bá desizaun Tribunál Judisiál Primeira Instánsia Díli, iha loron 24 fulan-Janeiru 2023,  ne’ebé Hatutan.com asesu no asina hosi juis de direitu, António José Fonseca Monteiro de Jesus, no notifika bá parte sira, empreza GMN ho Carmelita Isaac Amaro Sarmento, katak desizaun hasai traballadora Carmelita Isaac Amaro Sarmento, la iha baze no la tuir rekizitu Lei ne’ebé vigora.  

Lee Mós : Jornalista Na’in-18 Simu Karteira Profisionál, CI Dezafia Hatudu Produtu ho Kualidade

Desizaun  Tribunál Judisiál Primeira Instánsia Díli nian mak hanesan;

1. Tribunál konsidera karta demisaun GMN nian bá traballadora Carmelita Isaac Amaro Sarmento nula
2. Tanba ne’e Tribunál deside atu re-integra fali Carmelita Isaac Amaro Sarmento bá servisu fatin iha GMN
3. Husu GMN atu selu remunerasaun bá Carmelita Isaac Amaro Sarmento  ho valor  $8,361,35 .  

Informasaun ne’ebé Hatutan.com asesu hosi fonte sira iha Tribunál katak parte GMN atu halo rekursu bá desizaun  Tribunál Judisiál Primeira Instánsia Díli tuir Lei haruka ka direitu bá rekursu dentru loron ne’ebé determinadu iha Lei (bele loron 10, loron 20 no loron  30). Maibé, sura hosi loron 24 fulan-Janeiru 2023 to’o mai loron 13 fulan-Abríl 2023, seidauk iha informasaun klaru katak GMN halo rekursu ka lae.

Tuir lei, bainhira parte ne’ebé la konkorda ho desizaun Tribunál Judisiál Primeira Instánsia bele halo rekursu hanesan direitu ida. Maibé, informasaun ne’ebé Hatutan.com asesu hosi parte sira katak GMN seidauk halo rekursu to’o agora no bainhira liu ona prazu rekursu nian, maka GMN iha obrigasaun tuir Lei atu kumpre desizaun hotu hosi Tribunál Judisiál Primeira Instánsia Díli.

Grupo Media Nacional (GMN) liuhosi nia jestorial sira deside hasai traballadora nu’udár mós jornalista Carmelita Isaac Amaro Sarmento iha fulan-Novembru tinan 2019 ho razaun tanba halo dezobediénsia iha servisu fatin.

Iha fulan hanesan no tinan hanesan empreza GMN mós foti desizaun hasai nia traballadór nu’udar mós jornalista na’in-tolu (3) seluk, mak hanesan Evaristo Maris, Julito Ximenes ho Ajinha Lola.

Desizaun GMN nian ne’e parte traballadór la simu husu protesaun advokasia bá asosiasaun jornalista sira, hanesan Timor-Leste Press Union (TLPU) ho Asosiasaun Jornalista Timor Lorosa’e (AJTL)   hodi prosesa kazu disputa laborál ne’e bá parte Sekretaria Estadu Formasaun Profisionál no Empregu (SEFOPE) liuhosi Diresaun Nasionál Relasaun Traballu (DNRN), Departamentu Mediasaun no Konsiliasaun  hodi halo mediasaun. Maibé ,iha prosesu ne’e la hetan solusaun tanba parte sira la konkorda malu, liuliu GMN la aseita atu rekupera evor time bá traballadór sira-ne’e.   

Ho prosesu mediasaun ne’ebé la iha solusaun ne’e, traballadór sira  nu’udár mós jornalista ho asisténsia legal hosi JU,S Jurídiku Sosiál hodi tama prosesu legal bá  Tribunál Judisiál Primeira Instánsia Díli.

Bá kazu traballadór nu’udár mós jornalista Evaristo Maris nian, Segunda (11/4/2023), halo ona julgamentu iha   Tribunál Judisiál Primeira Instánsia Díli hodi rona sasin ka testemuña sira ne’ebé parte sira arrola. Nune’e, iha loron 18 fulan-Abríl kontinua fali julgamentu bá faze alegasaun nian.  

Iha loron 19 fulan-Abríl 2023, Tribunál Judisiál Primeira Instánsia Díli mós sei halo julgamentu bá kazu disputa laborál entre GMN ho traballadora nu’udár mós jornalista Ajinha Lola, no iha fali loron 25 fulan-Abríl 2023, sei iha mós julgamentu bá disputa laborál entre GMN ho traballadór ka jornalista Julito Ximenes.   

Iha dokumentu karta notifikasaun bá traballadór sira ne’ebé empreza GMN hasai sira ho razaun mak hanesan; traballadora nu’udár jornalista Carmelita Isaac Amaro Sarmento, GMN deside hasai tanba dezobediénsia bá ierarkia servisu, traballadora nu’udar mós jornalista Ajinha Lola, GMN deside hasai tanba abandona servisu, GMN hasai Evaristo Maris nu’udár traballadór no jornalista tanba konsidera halo violasaun repetetivu bá regra jornalizmu no traballadór nu’udár mós jornalista Julito Ximenes, hasai tanba konsidera halo dupla funsaun.

Jornalista : Rogério Pereira Cárceres