Hatutan.com, (15 Abríl 2023), Díli— Sentru Nasionál Reabilitasaun, Institutu Públiku (CNR,I.P), Sesta (14/4/2023), selebra sira-nia aniversáriu bá da-XVIII ho serimónia misa agradesimentu no serimónia sira seluk tan ne’ebé konsentra iha edifísiu CNR nian iha Becora, Díli.

Lee Mós : CNR Kobra Funsionáriu Sira $5-$10 Atu Halo Festa Dies Natalis

Edífisiu Centro Nacional Reabilitação Instituto Publico (CNR,I.P). Foto/Lazaro Pereira Quefi

Ho serimónia ne’e, kargu xefia sira iha CNR hahú hosi diretora jerál to’o diretór programa halo kolekta bá funsionáriu na’in-92 iha CNR hosi kargu xefia, asesór  to’o motorista sira hatama osan tuir ida-idak nia kapasidade.

Dadus ne’ebé Hatutan.com asesu hatudu katak kolekta bá aniversáriu CNR nian hosi funsionáriu sira ho montante osan $960.00. funsionáriu balun  fó  osan $5.00, balun $10.00, balun $20.00 no balun fó $50.00. iha asesor internasionál ida iha CNR mak fó $100.00.

“Ha’u hakarak atu klarifika fila-fali informasaun katak autoridade superiór iha CNR halo kobransa obrigatóriu ba funsionáriu sira hotu iha CNR la loos.  Ha’u hanesan diretor  programa iha CNR informa katak ha’u konvoka duni enkontru  ne’ebé  direktora jerál mos marka prezensa, diretór administrasaun aprovizionamentu  no lojistiku ho diretór programa realiza enkontru jerál ida, bá funsionáriu hotu-hotu iha loron 03 fulan-Abríl 2023. Ami hotu aseita ho konsiénsia fó kontribuisaun osan bá serimónia selebrasaun aniversáriu CNR nian ne’e. iha enkontru ne’e, ema ida ka rua mak la aseita, maibé maioria aseita fó kontribuisaun osan,”  diretór programa CNR, Angelito Cárceres hateten hodi responde Hatutan.com,  iha nia knaar fatin, Díli, Sesta (14/4/2023).

Serimónia aniversáriu CNR nian bá da-XVIII ho misa agradesimentu iha Igreja Sagradu Korasaun Jesus, Becora, kontinua ho atividade reflesaun  edifísiu CNR  hamutuk ho kliente sira CNR nian no mós autoridade lokal.

Atividade seluk hodi selebra aniversáriu CNR nian ne’e mak animasaun bá funsionáriu hotu kompostu husi jogu football Salaun (FUTSAL), halai berlindu ne’ebé partisipa hosi kliente ho funsionáriu CNR, dada tali entre funsionáriu CNR iha diresaun rua hanesan diresaun admirasaun finansas aprovizionamentu no lojistiku ho diresaun reabilitasaun.

Diretór Programa CNR, Angelito Cárceres. Foto/Lazaro Pereira Quefi

“Desizaun sira ne’e atu informa katak la’ós obrigasaun, maibé  konsiénsia hosi funsionáriu hotu ne’ebé liuhosi desizaun koletiva iha enkontru jerál katak hotu-hotu hakarak no konkorda atu selebra loron aniversáriu  CNR,”  Diretór Programa CNR, Angelito Cárceres klarifika.

Selebrasaun aniversáriu CNR nian bá tinan ne’e, Angelito Cárceres hateten, la refleta iha programa no orsamentu CNR nian, tanba ne’e CNR liuhosi kargu xefia sira halo enkontru ho funsionáriu hotu hodi fó hanoin bá malu no kontribui osan uitoan-uitoan atu bele halo selebrasaun ne’e.

“Hanesan kontribuisaun solidariedade ha’u hanoin la’ós foin ami realiza iha 2023, dezde uluk kedas. Atu dehan de’it katak iha pasiente balun, ami nia kliente hanesan vulneravel, haree fali bá sistema labele fó apoiu, entaun superior anterior sira hanesan diretór anterior sira hasai desizaun ida katak funsionáriu CNR bele fó kontribuisaun ho konsiénsia oinsá bele apoiu ita maluk ho defisiénsia. Ne’ebé apoiu solidariedade iha CNR la’ós foin primeira vez, la’ós dehan katak iha aniversáriu ne’e mak foin halo apoiu solidariedade,” nia hateten.

Nia informa mós katak  funsionária CNR rasik sira mós estabelese sira-nia grupu ketak atu kada fulan feto sira ne’e tau osan uitoan to’o iha fin do ano, sira lori bá haree no identifika ona ema ho defisiénsia balun ne’ebé a merese atu hetan duni apoiu.

“Ha’u komprende katak iha indivíduu balu  la konkorda ho situasaun balu ne’ebé mak realiza,  tamba iha mudansa desizaun polítika ne’ebé akontese iha CNR,” nia afirma tan.

Nia sita mós nia hatene didi’ak indivíduu sira ne’ebé diskorda atu fó osan iha selebrasaun aniversáriu CNR nian bá tinan ne’e, maibé maioria funsionáriu sira CNR nian aseita no fó apoiu ba inisiativa ida-ne’e.

Jornalista Estajiáriu: Lazaro Pereira Quefi